കൊല്ലം: ആഴക്കടല് മത്സ്യബന്ധന വിവാദത്തില് മെഴ്സിക്കുട്ടിയമ്മയ്ക്കും എല്ഡിഎഫ് സര്ക്കാരിനും എതിരേയുള്ള പോരാട്ടമെന്ന് പ്രഖ്യാപിച്ച് കളത്തിലിറങ്ങിയ ഇ.എം.സി.സി. ഉടമ ഷിജു വര്ഗ്ഗീസിന് ആസ്തി വെറും 10,000 രൂപ മാത്രം. നാമനിര്ദേശ പത്രികയ്ക്ക് ഒപ്പം സമര്പ്പിച്ചിട്ടുള്ള സത്യവാങ്മൂലത്തിലാണ് ഇക്കാര്യമുള്ളത്. കൈയിലുള്ള 10,000 രൂപ ഒഴികെ ഇന്ത്യയില് മറ്റു സ്വത്തുവകകളൊന്നും ഇല്ലെന്നാണ് ഷിജു കാണിച്ചിട്ടുള്ളത്. ആഴക്കടല് മത്സ്യബന്ധനവുമായി ബന്ധപ്പെട്ട് 5000 കോടിയുടെ ധാരണാപത്രം ഉണ്ടാക്കിയ കമ്പനിയാണ് ഇ.എം.സി.സി.
കുണ്ടറയിലാണ് ഷിജു വര്ഗ്ഗീസ് സ്ഥാനാര്ത്ഥിയാകുന്നത്. ആഴക്കടല് മത്സ്യബന്ധനവുമായി ബന്ധപ്പെട്ട് 5000 കോടി രൂപയുടെ കരാറുമായി എത്തിയ ആളുടെ ആസ്തി വിവരം സംശയങ്ങള്ക്കിടയാക്കിയിട്ടുണ്ട്. തിരഞ്ഞെടുപ്പില് മത്സരിക്കുന്നവര് സ്വന്തം പേരില് വിദേശത്തും സ്വദേശത്തുമുള്ള സ്വത്തുവിവരങ്ങള് കൃത്യമായി രേഖപ്പെടുത്തണമെന്നാണ് ചട്ടം. ഇ.എം.സി.സിയില് 13 ഓളം കമ്പനികളുണ്ട്. ഇതില് ചില കമ്പനികള് തനിക്ക് 100 ശതമാനം ഷെയറുണ്ട്. ചിലത് പാര്ട്ണര്ഷിപ്പാണെന്നുമാണ് ഷിജുവര്ഗ്ഗീസ് പറയുന്നത്.
ഇ.എം.സി.സി ഡയറക്ടറുടെ മത്സരിക്കാനുള്ള തീരുമാനം ഗൂഢാലോചനയുടെ ഭാഗമെന്നാണ് നേരത്തേ മേഴ്സിക്കുട്ടിയമ്മ പ്രതികരിച്ചത്. മന്ത്രി മെഴ്സിക്കുട്ടിയമ്മ പറയുന്നതും പ്രചരിപ്പിക്കുന്നതും കള്ളമാണെന്നും അത് ജനങ്ങളെ ബോദ്ധ്യപ്പെടുത്താനാണ് താന് മത്സരിക്കുന്നതെന്നും ഷിജുവര്ഗ്ഗീസ് പ്രതികരിച്ചിരുന്നു. മുപ്പതിനായിരത്തിലധികം വോട്ടിനായിരുന്നു കുണ്ടറയില് കഴിഞ്ഞ തവണ മേഴ്സിക്കുട്ടിയമ്മയുടെ വിജയം.
ഇത്തവണ പി.സി. വിഷ്ണുനാഥാണ് യുഡിഎഫ് സ്ഥാനാര്ത്ഥി. ബിഡിജെഎസ് നേതാവ് വനജ വിദ്യാധരനാണ് എന്ഡിഎ സ്ഥാനാര്ത്ഥി. മണ്ഡലവുമായുളള ദീര്ഘകാല ബന്ധം ഇക്കുറിയും വിജയം കൊണ്ടുവരുമെന്ന പ്രതീക്ഷയിലാണ് മേഴ്സിക്കുട്ടിയമ്മ. ഇത് ആറാം തവണയാണ് മെഴ്സിക്കുട്ടിയമ്മ ജനവിധി തേടുന്നത്. മുമ്പ് മൂന്ന് തവണ വിജയം നേടിയിട്ടുള്ള അവര് രണ്ടു തവണ തോറ്റിട്ടുമുണ്ട്. അപ്രതീക്ഷിതമായി പി.സി. വിഷ്ണുനാഥ് കൂടി സ്ഥാനാര്ത്ഥിയായി പ്രചരണം തുടങ്ങിയതോടെ മണ്ഡലത്തില് മത്സരം കടുക്കും.
