മാഡ്രിഡ്: സ്പാനിഷ് ലീഗില് ഇടറിയാണ് ഓടുന്നതെങ്കിലും ചാംപ്യന്സ് ലീഗില് തളര്ച്ച കാട്ടാതെ ലാലിഗാ വമ്പന്മാര് റയല് മാഡ്രിഡ്. യുവേഫാ ചാംപ്യന്സ് ലീഗ് ഫുട്ബോളില് ഒന്നിനെതിരേ മൂന്ന് ഗോളുകള്ക്ക് പ്രീമിയര് ലീഗ് പ്രതിനിധികളായ ലിവര്പൂളിനെ തോല്പ്പിച്ച് ആദ്യപാദ മേല്ക്കോയ്മയുമായി റയല് നേടി. അതേസമയം പ്രീമിയര് ലീഗിലെ കുതിപ്പ് ചാംപ്യന്സ് ലീഗിലും മാഞ്ചസ്റ്റര് സിറ്റി തുടര്ന്നപ്പോള് ജര്മ്മന് ക്ലബ്ബ് ബോറൂഷ്യയ്ക്ക് കാത്തിരിപ്പ്. ആദ്യപാദ മത്സരത്തില് സിറ്റിയും റയലും എതിരാളികള്ക്ക് മേല് ഉജ്വല വിജയം നേടി.
വിനീഷ്യസ് ജൂനിയറിന്റെ ഇരട്ടഗോളുകളും അസെന്സിയോയുടെ ഗോളുമായിരുന്നു റയലിനെ തുണച്ചത്. ലിവര്പൂളിനായി മുഹമ്മദ് സലാ ഒരു ഗോള് മടക്കി. ആദ്യ പകുതിയിലായിരുന്നു മൂന്ന് ഗോളുകളും. 25 ാം മിനിറ്റില് ടോണി ക്രൂസിന്റെ ലോംഗ് പാസ് ചെസ്റ്റില് സ്വീകരിച്ച് വിനീഷ്യസ് തൊടുത്ത അടി ഗോളിലെത്തി. പത്തു മിനിറ്റിന് ശേഷം പ്രതിരോധക്കാരന് ട്രെന്റ് അലക്സാണ്ടര് വരുത്തിയ പിഴവ് മുതലാക്കി അസെന്സിയോ സ്കോര് കൂട്ടി. രണ്ടാം പകുതിയില് മുഹ്മദ് സലാ ഒരു ഗോള് മടക്കിയെങ്കിലും വിനീഷ്യസ് വീണ്ടും റയലിനായി സ്കോര് ചെയ്തു. ലിവര്പൂളിന്റെ തട്ടകമായ ആന്ഫീല്ഡില് ഏപ്രില് 14 നാണ് രണ്ടാം പാദ മത്സരം നടക്കുക. പരിക്കേറ്റ നായകന് റാമോസും കോവിഡ് ബാധിച്ച വരാനേയെയും കൂടാതെയാണ് റയല് ഇറങ്ങിയത്.
അവസാന മിനിറ്റില് ഫില് ഫോഡന് നേടിയ ഗോളാണ് മാഞ്ചസ്റ്റര് സിറ്റിയെ ബോറൂഷ്യയ്ക്ക എതിരേ തുണച്ചത്. ബല്ജിയം താരവും നായകനുമായ കെവിന് ഡിബ്രൂയന് ആദ്യം തന്നെ ടീമിനെ മുന്നില് എത്തിച്ചെങ്കിലും 80 ാം മിനിറ്റി റൂസ് ബോറൂഷ്യയ്ക്കായി ഒരു ഗോള് മടക്കി. ഇതിന് പിന്നാലെ 90 ാം മിനിറ്റിലായിരുന്നു ഫോഡന്റെ ഗോള് വന്നത്. ഈ ഗോളിന് പിന്നില് പ്രവര്ത്തിച്ചതും ഡിബ്രൂയനായിരുന്നു. കളിയുടെ അവസാന മിനിറ്റില് ഡിബ്രൂയന്റെ ക്രോസ് ഗുണ്ടോഗന് ഫോഡന് നല്കുകയും ഷോട്ട് ഗോളി മാര്വിന് ഹിറ്റ്സിനെ മറികടന്ന് ലക്ഷ്യം കാണുകയുമായിരുന്നു.
