ഇസ്ലാമാബാദ്: പാകിസ്താനില് ബലാത്സംഗം കൂടാന് കാരണം പുരുഷന്മാരില് ആസക്തി ഉണ്ടാക്കുന്ന രീതിയിലുള്ള സ്ത്രീകളുടെ വസ്ത്രധാരണയാണെന്ന പ്രധാനമന്ത്രി ഇമ്രാന്ഖാന്റെ പ്രസ്താവന രാജ്യത്ത് വന് വിവാദം ഉണ്ടാക്കുന്നു. ഒരു ടെലിവിഷന് അഭിമുഖത്തില് ഇമ്രാന്ഖാന് വന്ന നാക്കുപിഴയില് അദ്ദേഹത്തെ വിമര്ശിക്കാന് മുന് ഭാര്യ ജമൈമ പോലും രംഗത്തെത്തി.
ഏത് സമൂഹത്തിലായാലും മ്ളേച്ഛത കൂടുന്നതിന്റെ പരിണിതഫലം എന്നായിരുന്നു ഇമ്രാന്ഖാന്റെ പ്രതികരണം. പുരുഷനിലെ ആസക്തി ഉണര്ത്താതിരിക്കാന് സ്ത്രീകള് മൂടിവെയ്ക്കേണ്ടവ ശരിയായ രീതിയില് മറയ്ക്കണം. പ്രലോഭനത്തെ ഒഴിവാക്കാന് അസാധാരണമായ മനോബലം വേണം. ശരീരം പൂര്ണ്ണമായും മൂടുന്ന പര്ദ്ദ എന്ന ആശയം പ്രലോഭനത്തെ ഒഴിവാക്കും. വസ്ത്രധാരണത്തെ മാന്യമായിട്ടുള്ളത് എന്നോ ലിംഗത്വത്തിന്റെ വേര്തിരിക്കല് അനുസരിച്ചുള്ളതോ എന്നോ പറയാമെന്നും ഇമ്രാന് പറയുന്നു.
അതേസമയം ഇമ്രാനെ വിമര്ശിച്ച് മനുഷ്യാവകാശപ്രവര്ത്തകരും സ്ത്രീപക്ഷ വാദികളുമെല്ലാം രംഗത്ത് വന്നിട്ടുണ്ട്. ഇതില് മുന് ഭാര്യയും ബ്രിട്ടീഷ് സിനിമാക്കാരിയുമായ ജമൈമ ഗോള്ഡ്സ്മിത്തിന്റെ കമന്റ് ഏറെ ശ്രദ്ധനേടി. സ്വന്തം കണ്ണുകളെയും സ്വകാര്യ ഭാഗങ്ങളെയും അടക്കി നിര്ത്തുന്നതില് വിശ്വസിക്കാന് പുരുഷന്മാരോട് പറയൂ എന്ന ഖുറാന് വാക്യം ഉദ്ധരിച്ചായിരുന്നു ജമൈമയുടെ ഉപദേശം. അത് പുരുഷന്മാരുടെ ഉത്തരവാദിത്വ ആണെന്നും തന്റെ ട്വീറ്റില് ജമൈമ പറഞ്ഞു. ജമൈമയുടെ ട്വീറ്റിന് പ്രധാനമന്ത്രിയെ വിമര്ശിക്കുന്ന ആയിരങ്ങളാണ് ലൈക്ക് ചെയ്തിരിക്കുന്നത്.
തൊട്ടുപിന്നാലെ ഒരു പക്ഷേ പരിഭാഷപ്പെടുത്തിയതിലെ പിഴവായിരിക്കും എന്നും ജമൈമ പറഞ്ഞു. താന് അറിയുന്ന ഇമ്രാന് പുരുഷന്മാരുടെ കണ്ണ് മൂടണമെന്നായിരിക്കും സാധാരണ പറയുക എന്നും അടുത്ത ട്വീറ്റില് പറഞ്ഞു. പാകിസ്താനിലെ ബലാത്സംഗത്തെക്കുറിച്ച് ഇമ്രാന്റേത് ചിന്താക്കുഴപ്പം ഉണ്ടാക്കുന്ന അവഗണിക്കലാണ് എന്നാരോപിച്ച് പാകിസ്താന് മനുഷ്യാവകാശ പ്രവര്ത്തകര് എത്തിയിട്ടുണ്ട്. അദ്ദേഹത്തിന്റെ പ്രസ്താവനകള് ഘടനാപരമായി തെറ്റാണെന്നും അപകടകരമാണെന്നും കാണിച്ച് നൂറു കണക്കിന് പേര് ഒപ്പുവെച്ച പ്രസ്താവന ഓണ്ലൈനില് പ്രചരിക്കുന്നുണ്ട്.
പാകിസ്താനിലെ മനുഷ്യാവകാശ കമ്മീഷനും ഇമ്രാനെ അപലപിച്ചിട്ടുണ്ട്. പാകിസ്താനില് ബലാത്സംഗം കൂടിക്കൂടി വരുന്ന കാര്യത്തില് സ്വന്തം നാട്ടിലെ സ്ത്രീകളെ കുറ്റപ്പെടുത്തുന്ന ഇമ്രാന് അഭിമുഖത്തില് ഇന്ത്യയെ വിമര്ശിക്കാനും മറന്നില്ല. ബോളിവുഡ് ഇപ്പോള് ഹോളിവുഡിനെ അനുകരിക്കാനുള്ള പ്രവണതയാണ് കാട്ടുന്നതെന്നും പാകിസ്താനിലേതിന് സമാനമായ സാഹചര്യമാണ് ഇന്ത്യയിലെന്നും ബലാത്സംഗത്തിന്റെ തലസ്ഥാനമായിട്ടാണ് ഡല്ഹി അറിയപ്പെടുന്നതെന്നും ഇമ്രാന്ഖാന് പറയുന്നു. 1995 മുതല് പത്തുവര്ഷം ഇമ്രാനുമായി കുടുംബജീവിതം നയിച്ചയാളാണ് ജമൈമ.
