തൃശൂര് മെഡിക്കല് കോളേജ് വിദ്യാര്ഥികളുടെ വൈറല് ഡാന്സ് വിവാദമായതിനു പിന്നാലെ പിന്തുണയുമായി കോളേജ് യൂണിയന്റെ ഗ്രൂപ്പ് ഡാന്സ്. ലൗ ജിഹാദ് ആരോപണവുമായി ഒരു വിഭാഗം ആളുകള് മെഡിക്കല് വിദ്യാര്ഥികളുടെ നൃത്തത്തിനെതിരെ രംഗത്തെത്തിയിരുന്നു. ഇതിനു പിന്നാലെ നവീനും ജാനകിക്കും പിന്തുണയുമായി നിരവധി പേരെത്തിയിരുന്നു. ഇതിനു പിന്നാലെയാണ് തുറന്ന പിന്തുണയുമായി തൃശൂര് മെഡിക്കല് കോളേജ് ഐക്യ കോളേജ് യൂണിയന് രംഗത്തെത്തിയത്.
വെറുക്കാനാണ് ഉദ്ദേശമെങ്കില് ചെറുക്കാനാണ് തീരുമാനം എന്ന ക്യാപ്ഷനോടു കൂടിയാണ് ഫേസ്ബുക്കില് വീഡിയോ പങ്കവച്ചിരിക്കുന്നത്. വൈറലായ നൃത്തത്തില് നവീന് റസാഖും ജാനകി ഓംകുമാറും മാത്രമായിരുന്നു ഉണ്ടായിരുന്നതെങ്കില് കോളേജ് യൂണിയന് പുറത്തു വിട്ട വീഡിയോയില് 12 നര്ത്തകരാണ് ഉള്ളത്. കൂടാതെ നര്ത്തകരായ വിദ്യാര്ഥികള് എല്ലാവരുടെയും പേരുവിവരങ്ങളും വീഡിയോയ്ക്കൊപ്പം നല്കിയിട്ടുണ്ട്. 'ഇവരുടെ പേരുകളിലെ തലയും വാലും തപ്പി പോയാല് കുറച്ചുകൂടി വക കിട്ടും, ഫേസ്ബുക്ക് പോസ്റ്റുകള് ഇടാന്.' എന്ന വര്ഗീയവാദികളെ പിഹസിക്കുന്നുമുണ്ട് ് യൂണിയന്റെ ഫേസ്ബുക്ക് പോസ്റ്റ്.
വിവാദങ്ങളെ ഗൗനിക്കുന്നില്ലെന്നും അതൊന്നും തങ്ങളെ ബാധിക്കുന്നില്ലെന്നുമായിരുന്നു വൈറല് വീഡിയോ വിവാദമായതിനു പിന്നാലെ ജാനകിയുടെയും നവീന്റെയും പ്രതികരണം. ഇനിയും നൃത്തം ചെയ്യുമെന്നും വീഡിയോകള് ഇറക്കുമെന്നും ഇവര് വ്യക്തമാക്കി. ഇതിനു പിന്നാലെയാണ് കോളേജ് യൂണിയന്റെ പേജില് പുതിയ വീഡിയോ പുറത്തു വിട്ടത്. വെറുപ്പിനെതിരെ നൃത്തം ചെയ്യാം എന്ന ഹാഷ് ടാഗോടു കൂടിയാണ് വീഡിയോ പങ്കുവെച്ചിട്ടുള്ളത്. വിഭജനമില്ലാത്ത സ്നേഹം എന്ന മറ്റൊരു ഹാഷ് ടാഗും ഒപ്പമുണ്ട്.
