സാധാരണക്കാരായ ചില ആളുകളുടെ പ്രതികരണങ്ങളും പെരുമാറ്റങ്ങളും വളരെ എളുപ്പത്തിലാണ് പലരെയും സ്വാധീനിക്കുന്നത്. പ്രത്യേകിച്ച് ഒട്ടും പ്രതീക്ഷിക്കാത്ത ആളുകളില് നിന്ന് കിട്ടുന്ന ചില പ്രതികരണങ്ങള് വളരെ പെട്ടെന്ന് സോഷ്യല് മീഡിയയില് ഇടം പിടിക്കാറുണ്ട്.
ഇപ്പോഴിതാ താന് അയച്ച ഒരു മെസേജിന് ‘കോർപ്പറേറ്റ്’ രീതിയിലുള്ള മറുപടി നല്കിയ ഓട്ടോ ഡ്രൈവറെക്കുറിച്ച് പറയുന്ന ഒരു യുവതിയുടെ വീഡിയോയാണ് സോഷ്യല് മീഡിയയിലൂടെ വൈറലാകുന്നത്. നിഷിത ഷെട്ടി എന്ന യുവതിയാണ് ഇൻസ്റ്റാഗ്രാമില് വീഡിയോ പങ്കിട്ടിരിക്കുന്നത്. താൻ ജോലിസ്ഥലത്തേക്ക് പോയ ഓട്ടോയുടെ ഡ്രൈവർക്ക് ഗൂഗിൾ പേ വഴിയാണ് നിഷിത പണം നല്കിയത്. എന്നാൽ, പിന്നീട് പെയ്മെന്റ് ഐഡിയുടെ പ്രശ്നം കാരണം പേയ്മെന്റ് ഫെയിലായിപ്പോയി. തുടർന്ന് നിഷിത ഡ്രൈവർക്ക് ഹിന്ദിയിൽ മെസ്സേജ് അയച്ചു.
‘പേയ്മെന്റ് പരാജയപ്പെട്ടു, ഐഡിയുടെ എന്തോ പ്രശ്നം കാരണം പണം അയക്കാനായില്ല...’ എന്നാണ് താൻ ഹിന്ദിയിൽ മെസ്സേജ് അയച്ചതെന്ന് നിഷിത വീഡിയോയിൽ പറയുന്നുണ്ട്. തുടര്ന്ന് ഡ്രൈവർ നൽകിയ മറുപടി തന്നെ അമ്പരപ്പിച്ചു കളഞ്ഞെന്നും അതോടെ തനിക്ക് ഇംഗ്ലീഷിൽ മെസ്സേജ് അയക്കേണ്ടി വന്നെന്നുമാണ് പോസ്റ്റില് നിഷിത കുറിച്ചിരിക്കുന്നത്.
ഡ്രൈവറുടെ മറുപടി ഇങ്ങനെയായിരുന്നു, ‘‘നിങ്ങൾ ഓട്ടോയിൽ തന്നെയാണ് തിരികെ വരാൻ ഉദ്ദേശിക്കുന്നതെങ്കിൽ, ഞാൻ വന്ന് നിങ്ങളെ കൂട്ടാം. തിരിച്ചു വരുമ്പോൾ പണം തന്നാൽ മതി, അത് മതിയോ? അതല്ലെങ്കിൽ ഞാൻ നിങ്ങളെ ഇറക്കിവിട്ട സ്ഥലത്തേക്ക് വരാം, കൈയിൽ കാശുണ്ടെങ്കിൽ അവിടെ വച്ച് വാങ്ങാം...’’ എന്നായിരുന്നു അദ്ദേഹത്തിന്റെ മെസേജ്.
‘ഇദ്ദേഹം എന്തിനാണ് ഒരു ഒഫീഷ്യൽ ഇമെയിലിന് മറുപടി നൽകുന്നത് പോലെ സംസാരിക്കുന്നത്?’. ഡ്രൈവറുടെ മറുപടി കണ്ട് ഞാൻ പെട്ടെന്ന് ഭയന്നുപോയി. ഉടൻ തന്നെ ഇംഗ്ലീഷിൽ ‘തിരികെ പോകുമ്പോൾ വൈകുന്നേരം 6 മണിക്ക് വരൂ’ എന്ന് മറുപടി നൽകി. ഇതിന് ഡ്രൈവർ നൽകിയ മറുപടിയാണ് ശരിക്കും തന്നെ അമ്പരപ്പിച്ചത്. തികച്ചും കോർപ്പറേറ്റ് ശൈലിയിലുള്ള ഒരൊറ്റ വാക്കായിരുന്നു അതെന്നും അത് ‘നോട്ടഡ്’ എന്നായിരുന്നു.
ഞാൻ കൂടെ ജോലി ചെയ്തിരുന്ന പല ആളുകളേക്കാളും മികച്ച രീതിയിലാണ് അദ്ദേഹം സംസാരിച്ചത്...’ തമാശയോടെ നിഷിത പറഞ്ഞു. വീഡിയോ വളരെ പെട്ടെന്ന് വൈറലായി മാറി. ‘ഈ ഡ്രൈവറുടെ പ്രൊഫഷണലിസം കൊള്ളാമല്ലോ, ഈ ഓട്ടോ ഡ്രൈവർക്ക് ഒരു ലിങ്ക്ഡ്ഇൻ പ്രൊഫൈൽ ആവശ്യമുണ്ട്, അവസാനത്തെ ആത് ‘നോട്ടഡ്’ ആണ് യഥാർത്ഥ കോർപ്പറേറ്റ് ശൈലി...’ എന്നതടക്കമാണ് കമന്റുകള്.
