ന്യൂഡല്ഹി : കോവിഡ് വ്യാപനം രൂക്ഷമാകുന്ന സാഹചര്യത്തില് മാസ്കും, സാമൂഹിക അകലവും പോലുള്ള സുരക്ഷാ മനദണ്ഡങ്ങള് പാലിക്കണമെന്ന് മുന്നറിയിപ്പുമായി കേന്ദ്രം. ശരിയായ രീതിയില് ഇവയൊക്കെ പാലിക്കാതിരുന്നാല് ഒരാളില് നിന്ന് 406 പേര്ക്കെങ്കിലും ഒരു മാസത്തിനുള്ളില് രോഗം പകരാം എന്നാണ് കേന്ദ്ര ആരോഗ്യ കുടുംബക്ഷേമ മന്ത്രാലയം ജോയിന്റ് സെക്രട്ടറി ലവ് അഗര്വാള് മുന്നറിയിപ്പ് നല്കിയിരുക്കുന്നത്.
സാമൂഹിക അകലവും, മാസ്കും അനിവാര്യമാണന്നും അത് ശരിയായ രീതിയില് ഉപയോഗിക്കണമെന്നും ആരോഗ്യമന്ത്രാലയം ആവശ്യപ്പെടുന്നു. രോഗവ്യാപനത്തിന്റെ തോത് കുറയ്ക്കാന് ഇത് സഹായിക്കും. കോവിഡ് പോസിറ്റീവായ ഒരു വ്യക്തിയില് നിന്ന് മുപ്പത് ദിവസത്തിനുള്ളില് 406 പേര്ക്ക് രോഗവ്യാപനത്തിനുള്ള സാധ്യതയുണ്ടന്ന് വിവിധ സര്വ്വകലാശാലകള് നടത്തിയ പഠനങ്ങള് ചൂണ്ടികാണിക്കുന്നന്നതായി ലവ് അഗര്വാള് പറഞ്ഞു.
രോഗിയായ ഒരാള് ശാരീരിക അകലം 50 ശതമാനം കുറച്ചാല് രോഗവ്യാപനം 406 പേരില് നിന്ന് 15 പേരായി ചുരുങ്ങും. 75 ശതമാനമായി കുറച്ചാല് രോഗവ്യാപനമുണ്ടാകുന്നവരുടെ എണ്ണം 30 ദിവസത്തിനുള്ളില് 2.5 ആക്കി കുറയ്ക്കാം.ആറ് അടി അകലത്തില് നില്ക്കുകയാണെങ്കില് പോലും കോവിഡ് പോസിറ്റീവായ ആളില് നിന്നും മറ്റൊരാള്ക്ക് രോഗവ്യാപനമുണ്ടാകും. മാസ്ക് ശരിയായ രീതിയില് ഉപയോഗിച്ചില്ലെങ്കില് രോഗിയില് നിന്നും രോഗവ്യാപനമുണ്ടാകാനുള്ള സാധ്യത 90 ശതമാനമാണെന്നും അഗര്വാള് പറഞ്ഞു.
കോവിഡ് ബാധിക്കാത്തയാള് മാസ്ക് ധരിക്കുകയും പോസിറ്റീവായ ആള് മാസ്ക് ധരിക്കാതിരിക്കുകയും ചെയ്താല് രോഗവ്യാപന സാധ്യത 30 ശതമാനമാണ്. കോവിഡ് പോസിറ്റീവായ വ്യക്തിയും കോവിഡ് ബാധിക്കാത്തയാളും മാസ്ക് ധരിച്ചാല് രോഗവ്യാപനത്തിനുള്ള സാധ്യത 1.5 ശതമാനമായി കുറയുമെന്നും അദ്ദേഹം ചൂണ്ടിക്കാട്ടി. ഇതേ രീതിയില് ആറടി ദൂരമുള്ള രണ്ടുപേര്ക്കിടയില് അണുബാധ പടരാനുള്ള സാധ്യത വളരെ കുറവാണെന്നും അദ്ദേഹം പറഞ്ഞു.
