ന്യൂഡല്ഹി: രാജ്യത്തെ പൗരന്മാർ കോവിഡ് വ്യാപനം സംബന്ധിച്ചുള്ള ആശങ്കകൾ സാമൂഹിക മാധ്യമങ്ങളില് പങ്കുവെക്കുന്നത് തടയുന്നതിനെതിരെ സുപ്രീംകോടതി. ഒരു സംസ്ഥാന സര്ക്കാരിനും അതിനുള്ള അവകാശമില്ലെന്നും കോടതി മുന്നറിയിപ്പു നൽകി. പൗരന്മാര് അവരുടെ ദുരിതം സംബന്ധിച്ച് സാമൂഹിക മാധ്യമങ്ങളിലും ഇന്റര്നെറ്റിലും ആശയവിനിമയം നടത്തുന്നുണ്ടെങ്കില് അത് തെറ്റായ വിവരമാണെന്ന് പറയാനാവില്ല. അതിന്റെ പേരില് ഏതെങ്കിലും പൗരനെ സംസ്ഥാന സര്ക്കാരുകളും പോലീസും ഉപദ്രവിക്കാന് നിന്നാല് അത് കോടതിയലക്ഷ്യമായി കണക്കാക്കുമെന്നും സുപ്രീംകോടതി വ്യക്തമാക്കി. ഇത് എല്ലാ സംസ്ഥാനങ്ങളിലേക്കും ഡിജിപിമാരിലേക്കും എത്തിക്കണമെന്നും കോടതി പറഞ്ഞു. ജസ്റ്റിസ് ഡി.വൈ.ചന്ദ്രചൂഡ് അധ്യക്ഷനായ ബെഞ്ചിന്റേതാണ് ഉത്തരവ്.
കോവിഡ് വ്യാപനം രൂക്ഷമായതോടെ രാജ്യത്തിന്റെ പല ഭാഗത്തും ഓക്സിജൻ ക്ഷാമവും അതിരൂക്ഷമായി. സമൂഹമാധ്യമങ്ങളിലൂടെ ഓക്സിജൻ അഭ്യർത്ഥിച്ചവർക്കെതിരെ കേസെക്കുകയും സാമൂഹിക മാധ്യമങ്ങളില് തെറ്റായ വിവരം പങ്കുവെച്ചെന്നാരോപിച്ച് ദേശീയ സുരക്ഷാ നിയമം ആളുകളുടെ മേല് ചുമത്തണമെന്ന ഉത്തര്പ്രദേശ് സര്ക്കാര് തീരുമാനത്തിന്റെ പശ്ചാത്തലത്തിലായിരുന്നു സുപ്രീംകോടതിയുടെ ഇടപെടല്.
സംസ്ഥാനത്ത് യാതൊരു ഓക്സിജന് പ്രതിസന്ധിയും ഇല്ല. ഇത്തരം പ്രചാരണം നടത്തുന്നവര്ക്കെതിരെ ദേശീയ സുരക്ഷാ നിയമം ചുമത്തി കേസെടുക്കുകയും സ്വത്ത് കണ്ടുകെട്ടുകയും ചെയ്യുമെന്ന് യുപി മുഖ്യമന്ത്രി യോഗി ആദിത്യനാഥ് പറഞ്ഞിരുന്നു. 'ഒരു പൗരന് എന്ന നിലയിലും ഒരു ന്യായാധിപന് എന്ന നിലയിലും എന്നെ സംബന്ധച്ചിടത്തോളം വലിയ ആശങ്കയുണ്ടാക്കുന്നു. പൗരന്മാര് അവരുടെ ആവലാതികള് സാമൂഹിക മാധ്യമങ്ങളില് പങ്കുവെക്കുകയാണെങ്കില് ആ ആശയവിനിമയത്തെ തടസ്സപ്പെടുത്താന് ഞങ്ങള് ആഗ്രഹിക്കുന്നില്ല. അവരുടെ ശബ്ദം നമുക്ക് കേള്ക്കാം. ബെഡ് വേണമെന്നോ ഓക്സിജന് വേണമെന്നോ ആവശ്യപ്പെട്ടതിന്റെ പേരില് ഒരു പൗരനെ ഉപദ്രവിച്ചാല് ഞങ്ങളത് കോടതിയലക്ഷ്യമായി കാണും. നമ്മള് വലിയൊരു പ്രതിസന്ധിയിലാണ്'. ജസ്റ്റിസ് ഡി.വൈ.ചന്ദ്രചൂഡ് പറഞ്ഞു.
ഓക്സിജന്, മരുന്ന് വിതരണം, വാക്സിന് എന്നിവയുമായി ബന്ധപ്പെട്ട് സ്വമേധായാലുള്ള ഹര്ജിയില് വാദം കേള്ക്കെയാണ് സുപ്രീംകോടതിയുട ഉത്തരവ്.
