തിരുവനന്തപുരം: മാറി മറിയുന്ന ഭരണരീതിയ്ക്ക് തടയിട്ട് കേരളം ചരിത്രത്തില് ആദ്യമായി തുടര്ഭരണത്തിന് വിധിയെഴുതിയപ്പോള് ജോസ് കെ മാണിക്ക് പണി കൊടുത്ത് പാലാ. അഞ്ചു പതിറ്റാണ്ട് പാലാ ഭരിച്ച കെ.എം. മാണി അന്തരിച്ചതിന് പിന്നാലെ ഉപതെരഞ്ഞെടുപ്പില് എല്ഡിഎഫിന് വിജയം നല്കിയ പാലാക്കാര് രണ്ടു വര്ഷത്തിന് ശേഷം അടുത്ത നിയമസഭാ തെരഞ്ഞെടുപ്പില് വീണ്ടും യുഡിഎഫിനെ തുണച്ചു.
കഴിഞ്ഞ തവണ യുഡിഎഫിലായിരുന്ന ജോസ് കെ മാണി എല്ഡിഎഫ് സ്ഥാനാര്ത്ഥിയായും എല്ഡിഎഫിനൊപ്പം മത്സരിച്ച് ജയിച്ച മാണി സി കാപ്പന് യുഡിഎഫിനൊപ്പവും ജനവിധി തേടിയതിലൂടെ ശ്രദ്ധേയമായി മാറിയ മണ്ഡലത്തില് വന് വിജയമാണ് മാണി സി കാപ്പന് യുഡിഎഫിന് നല്കിയത്. വോട്ടിന്റെ ഭൂരിപക്ഷത്തില് മാണി സി കാപ്പന് വന് വിജയം നേടിയപ്പോള് വോട്ടെണ്ണലിന്റെ ഒരു ഘട്ടത്തില് പോലും മാണി സി കാപ്പന് മേല് മുന്തൂക്കം നേടാന് ജോസ്.കെ. മാണിക്ക് കഴിഞ്ഞില്ല. എന്സിപിയുടെ സ്ഥാനാര്ത്ഥിയായി 2019 ഉപതെരഞ്ഞെടുപ്പ് മുതല് വിജയം തുടങ്ങിയ കാപ്പന് നിയമസഭാ തെരഞ്ഞെടുപ്പിലും അത് തുടര്ന്നു.
ഉപ തെരഞ്ഞെടുപ്പില് 2000 വോട്ടിന്റെ ഭൂരിപക്ഷത്തില് ജോസ് ടോം പള്ളിക്കുന്നേലിനെ ആയിരുന്നു മാണി സി കാപ്പന് തോല്പ്പിച്ചത്. തൊട്ടുപിന്നാലെ നിയമസഭാ തെരഞ്ഞെടുപ്പില് ജോസ് കെ മാണിയെ മലര്ത്തിയടിച്ചത് വന് ഭൂരിപക്ഷത്തിലാണ്. 2011 ലും 2016 ലും ഇടതുസ്ഥാനാര്ത്ഥിയായി കെ.എം. മാണിയോട് തുടര്ച്ചയായി പരാജയപ്പെട്ട മാണി സി കാപ്പന് രണ്ടാം തവണ വിജയം നേടുമ്പോള് തുടര്ച്ചയായി രണ്ടു തെരഞ്ഞെടുപ്പുകളില് എല്ഡിഎഫിനും യുഡിഎഫിനും മത്സരിച്ചു ജയം നേടുന്ന ആളായിട്ടാണ് ചരിത്രമെഴുതിയത്.
മറുവശത്ത് മുന്നണിമാറ്റത്തിലൂടെ വന് മാറ്റം പ്രതീക്ഷിച്ച ജോസ് കെ മാണിക്ക് ഇടതിനൊപ്പം ആദ്യ തെരഞ്ഞെടുപ്പില് തന്നെ പരാജയം രുചിക്കേണ്ടി വന്നത് തിരിച്ചടിയായി. എല്ഡിഎഫിന്റെ തുടര്ഭരണത്തില് കരുത്തുറ്റ വോട്ടു സംഭാവനകള് നല്കാന് കഴിഞ്ഞിട്ടും മന്ത്രിയാകാന് സാധ്യത ഉണ്ടായിരുന്ന നേതാവ് തന്നെ പരാജയമറിഞ്ഞത് കേരളാകോണ്ഗ്രസ് ജോസ് വിഭാഗത്തിന് നല്കുന്ന ദു:ഖം ചില്ലറയായിരിക്കില്ല.
മുഖ്യഎതിരാളി ജോസഫ് ഗ്രൂപ്പുമായി നേരിട്ട് മത്സരിച്ച പലയിടത്തും തങ്ങളുടെ സ്ഥാനാര്ത്ഥികള്ക്ക് വിജയം നേടാനായെങ്കിലും പാര്ട്ടി ആസ്ഥാനമായ പാലായിലെ തോല്വി കേരളാ കോണ്ഗ്രസ് മാണി വിഭാഗത്തിന് നല്കുന്ന ആകുലതകള് ചില്ലറയായിരിക്കില്ല. 50 വര്ഷം പാലായെ സേവിച്ച കെ.എം. മാണിയുടെ മകന് എന്ന പരിഗണനയേക്കാള് പാലക്കാര് മാണി സി കാപ്പന്റെ വ്യക്തിത്വത്തിന് കൂടുതല് പ്രധാന്യം നല്കിയെന്ന് കരുതേണ്ടി വരും.
വിജയം ഉറപ്പാക്കിയതിന് പിന്നാലെ ചങ്കാണ് പാലാ എന്നെഴുതിയ കേക്ക് മുറിച്ചാണ് മിന്നുംവിജയം മാണി സി കാപ്പന് ആഘോഷിച്ചത്. ഇടതു സ്ഥാനാര്ത്ഥിയായി വിജയം നേടിയ മാണി സി കാപ്പന് പാലാ സീറ്റിന്റെ പേരിലായിരുന്നു ഇടതുപക്ഷത്ത് നിന്നും യുഡിഎഫില് എത്തിയത്. രാജ്യസഭാ സീറ്റ് വാഗ്ദാനം ചെയ്തിട്ടും മറ്റ് സീറ്റുകള് വെച്ചു നീട്ടിയിട്ടും പാലായില് ഉറച്ചു നിന്ന മാണി സി കാപ്പന്റെ തീരുമാനം ശരി വെയ്ക്കുന്നതാണ് വിജയം.
