കൊല്ക്കത്ത: പശ്ചിമബംഗാളില് ബിജെപിയ്ക്ക് കാര്യങ്ങള് കൂടുതല് വഷളാകുന്നെന്ന് റിപ്പോര്ട്ട്. ബംഗാള് നിയമസഭയില് പ്രതിപക്ഷ നേതാവായി മാറിയിരിക്കുന്ന തൃണമൂല് കോണ്ഗ്രസ് വിമതന് സുവേന്ദു അധികാരിയ്ക്കെതിരേ തന്നെ എംഎല്എമാര് കലാപക്കൊടി ഉയരുന്നു. ബിജെപി വിട്ടു തൃണമൂലിലേക്ക് തിരിച്ചു ചാടാനൊരുങ്ങുന്ന എംഎല്എ മാരെ കൂറുമാറ്റ നിരോധന നിയമത്തില് കുരുക്കി തടയിടാനാണ് സുവേന്ദു അധികാരിയും ബിജെപിയും ആലോചിക്കുന്നത്.
പ്രതിപക്ഷ നേതാവായി മാറിയിട്ടുള്ള സുവേന്ദു അധികാരിയുടെ നേതൃത്വം എംഎല്എ മാരില് പലര്ക്കും ദഹിക്കാത്തതിനും കൊഴിഞ്ഞുപോക്കിന് കാരണമാകുന്നുണ്ട്. 74 എംഎല്എ മാരുള്ള ബിജെപി സുവേന്ദു അധികാരിയുടെ നേതൃത്വത്തില് കഴിഞ്ഞ ദിവസം ഗവര്ണറെ കാണാന് പോയപ്പോള് സംഘത്തില് നിന്നും 24 എംഎല്എ മാരോളം വിട്ടു നിന്നതാണ് പുതിയ വര്ത്തമാനങ്ങള്ക്ക് കാരണമായി മാറിയിട്ടുള്ളത്. ബംഗാളിലെ സംഭവ വികാസങ്ങളും പ്രധാന ചില വിഷയങ്ങളും ചര്ച്ച ചെയ്യാന് തിങ്കളാഴ്ച വൈകിട്ടായിരുന്നു സുവേന്ദു അധികാരിയും പ്രതിപക്ഷ എംഎല്എമാരും ഗവര്ണര് ജഗ്ദീപ് ധന്കറുമായി കൂടിക്കാഴ്ച നടത്തിയത്.
സുവേന്ദു അധികാരിയുടെ നേതൃത്വത്തില് അതൃപ്തിയുള്ളവരാണ് യോഗത്തില് പങ്കെടുക്കാന് കൂട്ടാക്കാതെ വിട്ടു നിന്നതെന്നും തൃണമൂലിലേക്ക് മടങ്ങാന് താല്പ്പര്യമുള്ള എംഎല്എ മാരാണ് ഇവരെന്നും ശ്രുതിയുണ്ട്. തെരഞ്ഞെടുപ്പില് വന് വിജയം നേടിയതോടെയാണ് വിജയിച്ചിട്ടും പലരും മാതൃസംഘടനയിലേക്ക് മടങ്ങാന് താല്പ്പര്യം കാട്ടുന്നെന്നാണ് വിവരം.
മമതാബാനര്ജിയുടെ വലംകൈ ആയിരുന്ന സുവേന്ദു അധികാരി കഴിഞ്ഞ ഡിസംബറിലാണ് തൃണമൂല് വിട്ട് ബിജെപിയില് ചേര്ന്നത്. പിന്നീട് തെരഞ്ഞെടുപ്പില് നന്ദിഗ്രാമില് മമതാബാനര്ജിയെ പരാജയപ്പെടുത്തുക കൂടി ചെയ്തതോടെ ബിജെപിയില് അധീശത്വം കൂടി. എന്നാല് പല എംഎല്എ മാരും ഇപ്പോള് ബന്ധപ്പെട്ടു കഴിഞ്ഞെന്നും പലരും തിരിച്ചുപോയ മുകുള്റോയിയുടെ പാത പിന്തുടരാന് ആഗ്രഹിക്കുകയാണെന്നുമാണ് തൃണമൂലുകാര് പറയുന്നത്.
മുകുള്റോയിയ്ക്ക് പിന്നാലെ രജീബ് ബാനര്ജി, ദീപേന്ദു ബിശ്വാസ്, സുഭ്രാംശു റോയ് തുടങ്ങിയ നേതാക്കളും സംസ്ഥാനം ഭരിക്കുന്ന പാര്ട്ടിയിലേക്ക് മടങ്ങാന് താല്പ്പര്യപ്പെടുകയാണ്. ബിജെപിയുടെ ഭാഗമായി എംഎല്എമാരായി മാറിയിരിക്കുന്ന 30 പേരോളം തൃണമൂല് നേതൃത്വത്തെ സമീപിച്ചിട്ടുള്ളതായിട്ടാണ് മമതാബാനര്ജിയുടെ വൃത്തങ്ങള് പറയുന്നത്. സോണാലി ഗുഹയും ദീപേന്തു ബിശ്വാസും അടക്കമുള്ളവര് പരസ്യമായി മാപ്പു പറയാനും തയ്യാറായിട്ടുണ്ട്. തൃണമൂലിലേക്ക് തിരിച്ചുപോകുന്ന എംഎല്എ മാര്ക്കെതിരേ കൂറുമാറ്റം ഉപയോഗിച്ച് നിയമനടപടിക്ക് മുതിരുമെന്നാണ് സുവേന്ദു അധികാരി പറയുന്നത്.
അതേസമയം നേതാക്കള് മാത്രമല്ല പാര്ട്ടി അണികള്ക്ക് വരെ തൃണമൂലിലേക്ക് തിരിച്ചു പോയാല് കൊള്ളാമെന്നുണ്ട്. തൃണമൂലിലേക്ക് തിരിച്ചെടുക്കണം എന്നാവശ്യപ്പെട്ട് ബിര്ഭൂമില് തൃണമൂല് ഓഫീസിന് മുന്നില് ബിജെപിയുടെ ഭാഗമായി മാറിയ പ്രവര്ത്തകര് ധര്ണ്ണ നടത്തുന്നതിന്റെ വീഡിയോ കഴിഞ്ഞ ദിവസം പ്രത്യക്ഷപ്പെട്ടിരുന്നു. മമതാബാനര്ജി ക്ഷമിക്കണം എന്ന് എഴുതിയ പ്ലാക്കാര്ഡും ഇവര് പിടിച്ചിരിക്കുന്നതായി വീഡിയോയില് കാണാം.
