കൊല്ലം: രോഗിയുടെ ബന്ധുവായ യുവതിയെ പീഡിപ്പിക്കാന് ശ്രമം നടത്തിയതിന് ആംബുലന്സ് ഡ്രൈവര് അറസ്റ്റില്. ചവറ നടുവത്ത് ചേരി തെക്കുംഭാഗം സ്വദേശി സജിക്കുട്ടന് എന്ന 34 കാരനാണ് അറസ്റ്റിലായത്. കോവിഡ് രോഗിയെ ആശുപത്രിയിലേക്ക് കൊണ്ടുപോകുന്നതിനിടയില് ആയിരുന്നു സംഭവം. ജൂണ് 3 ന് നടന്ന സംഭവത്തില് മുഖ്യമന്ത്രിയ്ക്ക് നല്കിയ പരാതിയുടെ അടിസ്ഥാനത്തിലായിരുന്നു നടപടി.
ഈ മാസം ആദ്യ അബോധാവസ്ഥയിലായ രോഗിയെ വീട്ടില് നിന്നും കോവിഡ് കേന്ദ്രത്തിലേക്ക് മാറ്റാന് കൊണ്ടുപോകുമ്പോഴായിരുന്നു സംഭവം. വീട്ടില് താമസിച്ചിരുന്ന രോഗിയുടെ അവസ്ഥ ഗുരുതരമായതിനെ തുടര്ന്ന് ആശുപത്രിയിലേക്ക് കൊണ്ടുപോകാന് വന്ന ആംബുലന്സ് ഡ്രൈവര് രോഗിയ്ക്കൊപ്പം ബന്ധുവായ യുവതി മാത്രം മതിയെന്ന് നിലപാട് എടുത്തിരുന്നു. വീട്ടില് പുരുഷന്മാര് ഉണ്ടായിട്ടും അവര് വരേണ്ട സ്ത്രീകള് ആരെങ്കിലും വന്നാല് മതിയെന്ന് ഇയാള് പറയുകയായിരുന്നു.
തുടര്ന്ന് രോഗിയുമായി പോകുന്നതിനിടയില് ഇടയ്ക്ക് സമീപത്തെ പ്രാഥമികാരോഗ്യ കേന്ദ്രത്തിന് മുന്നില് വാഹനം നിര്ത്തിയ രോഗി കയ്യുറ എടുക്കാന് വേണ്ടി പോകുകയും തിരികെ വരുമ്പോള് യുവതിയെ ആക്രമിക്കാന് ശ്രമിക്കുകയുമായിരുന്നു. എന്നാല് മറ്റൊരു വാഹനം വന്നതിനാല് ഈ ശ്രമം ഉപേക്ഷിക്കുകയും ചെയ്തു. രോഗി പിന്നീട് മരണപ്പെട്ടതിന് പിന്നാലെ യുവതി മുഖ്യമന്ത്രിയ്ക്ക് പരാതി അയയ്ക്കുകയായിരുന്നു.
യുവതിയുടെ പരാതി മുഖ്യമന്ത്രി കൊല്ലം സിറ്റി പോലീസ് കമ്മീഷണര്ക്ക് കൈമാറുകയും കേസ് എടുക്കുകയുമായിരുന്നു. കഴിഞ്ഞ ദിവസം വനിതാപോലീസ് രഹസ്യമായി യുവതിയുടെ വീട്ടിലെത്തി മൊഴി ശേഖരിച്ചു. അതിന് പിന്നാലെയാണ് സജിക്കുട്ടനെ അറസ്റ്റ് ചെയ്തത്. കോവിഡ് പ്രതിരോധത്തിനായി പഞ്ചായത്ത് അടിസ്ഥാനത്തില് കരാര് എടുത്തിരിക്കുന്ന ആംബുലന്സ് ഡ്രൈവറാണ് സജിക്കുട്ടന്.
അതേസമയം ഇത്തരം സംഭവം കേരളത്തില് ഇത് രണ്ടാമത്തേതാണ്. നേരത്തേയും ആംബുലന്സ് ഡ്രൈവര് യുവതിയെ ബലാത്സംഗം ചെയ്ത കേസ് പുറത്തുവന്ന സാഹചര്യത്തില് പിന്നീട് ആംബുലന്സുകള്ക്ക് നിരീക്ഷണം ഏര്പ്പെടുത്തിയിരുന്നു. എന്നാല് ഈ സംവിധാനം കാര്യക്ഷമമായി പ്രവര്ത്തിക്കുന്നില്ല എന്ന പരാതിയുണ്ട്. പ്രതിയെ തെക്കുംഭാഗം സ്റ്റേഷനില് പാര്പ്പിച്ചിരിക്കുകയാണ്.
