ബുക്കാറെസ്റ്റ് : ഗോളിന് മറുപടി ഗോള്, പെനാല്റ്റി സേവുകള്, ഇരട്ടഗോളുകള്. എല്ലാറ്റിനും ഇരുടീമുകളും ഒപ്പത്തിനൊപ്പം നിന്ന മത്സരത്തില് ലോകചാംപ്യന്മാരായ ഫ്രാന്സിനെ ഷൂട്ടൗട്ടില് തകര്ത്ത് സ്വിറ്റ്സര്ലന്റ് യൂറോപ്യന്കപ്പ് ക്വാര്ട്ടറില്. ആദ്യന്ത്യം ത്രില്ലിംഗായ മത്സരത്തില് സാധാരണ സമയത്ത് കണ്ട 3-3 സമനിലയ്ക്കും അധിക സമയത്തിനും പിന്നാലെ ഷൂട്ടൗട്ടിലായിരുന്നു ജേതാക്കളെ നിര്ണ്ണയിച്ചത്. ഷൂട്ടൗട്ടില് ഫ്രാന്സിന്റെ സൂപ്പര്താരം എംബാപ്പേയ്ക്ക് പിഴച്ചത് ഫ്രാന്സിന്റെ വിധിയായി. യുറോയിലെ നിലവിലെ ചാംപ്യന്മാരായ പോര്ച്ചുഗലിന് പിന്നാലെ ലോകചാംപ്യന്മാരായ ഫ്രാന്സും മടങ്ങി.
റഗുലര് ടൈമിലെ കഥ; ആദ്യ പകുതിയില് സ്വിറ്റ്സര്ലന്റ്
ആദ്യ പകുതിയില് ഗോള് വഴങ്ങി പിന്നില് പോകുക, രണ്ടാം പകുതിയില് പെനാല്റ്റി സേവ് ചെയ്ത് തിരിച്ചുവരിക, രണ്ടു മിനിറ്റിനിടയില് രണ്ടു ഗോളുകള് നേടി 3-1 ന് മുന്നില് കയറുക. 90 മിനിറ്റിലെ ഫ്രഞ്ചുവിപ്ലവം ഇങ്ങിനെയായിരുന്നെങ്കില് രണ്ടുഗോളിന് പിന്നില് പോയ ശേഷം ലോകചാംപ്യന്മാരെ ഭയക്കാതെ അസാധാരണ മനസ്സാന്നിദ്ധ്യത്തിലൂടെ രണ്ടുഗോള് തിരിച്ചടിച്ച് 3-3 ന് ഒപ്പമെത്തിയത് ആയിരുന്നു സ്വിറ്റ്സര്ലന്റിന്റെ റഗുലര് ടൈമിലെ കഥ.
രണ്ടു ടീമിലും രണ്ടുപേര് ഇരട്ടഗോളുകള് നേടിയപ്പോള് ഇരു ടീമിലെയും സൂപ്പര്സബ്ബുകളായിരുന്നു കളി തിരിച്ചുവിട്ടത്. നാടകീയമായ മാറിമറിയലുകള് കണ്ട മത്സരത്തില് ആദ്യം ഗോള് മുന്നിലെത്തിയത് സ്വിറ്റ്സര്ലന്റായിരുന്നു. കളിയുടെ 15 ാം മിനിറ്റില് ലോകചാംപ്യന്മാരെ ഞെട്ടിച്ച് സ്റ്റീവന് സൂബര് നല്കിയ മികച്ച ഒരു ക്രോസില് ഫ്രഞ്ച് പ്രതിരോധക്കാരന് ക്ളെമെന്റ് ലാംഗ്ലെറ്റിന്റെ തലയ്ക്ക് മേല് ചാടി ഹാരിസ് സെഫറോവിക് തൊടുത്ത ഹെഡ്ഡര് ഫ്രഞ്ച് വലയുടെ ഇടതു മൂലയിലേക്ക് പറന്നിറങ്ങി. ഒന്നാം പകുതിയില് പിന്നീട് ഫ്രഞ്ച് ടീമിനെ പ്രതിരോധിക്കുന്ന സുന്ദരന് കളിയും പുറത്തെടുത്തതോടെ ഒന്നാം പകുതിയ്ക്ക് പര്യവസാനമായി.
ഫ്രാന്സ് കളം നിറഞ്ഞ രണ്ടാം പകുതി; ബെന്സേമയ്ക്ക് ഡബിള്
രണ്ടാം പകുതി ലാംഗെല്റ്റിനെ മാറ്റി ഫ്രാന്സ് കിംഗ്സ്ലി കോമാനെ കൊണ്ടുവന്നത് കളിയുടെ ഗതി തിരിച്ചുവിട്ടു. ഫ്രാന്സ് കളിയില് താളം കണ്ടെത്തി മുന്നേറുമ്പോള് കളിക്ക് വിപരീതമായി 55 ാം മിനിറ്റില് ഫ്രാന്സ് പെനാല്ട്ടി വഴങ്ങി. സൂബറിനെ വരാനെ ബോക്സില് വീഴ്ത്തിയതിന് സ്വിറ്റ്സര്ലന്റിന് പെനാല്റ്റി. എന്നാല് റിക്കാര്ഡോ റോഡ്രിഗസിന്റെ പെനാല്റ്റി വലത്തേക്ക് ചാടി ഫ്രഞ്ച് ഗോളി ലോറിസ് രക്ഷപ്പെടുത്തി. ഈ സംഭവത്തോടെ കളി നാടകീയമായി ഫ്രാന്സ് ഏറ്റെടുത്തു.
തുടരെത്തുടരെ ഫ്രഞ്ച് മുന്നേറ്റം കണ്ടതിനൊടുവില് പോഗ്ബ നല്കിയ പന്തില് എംബാപ്പേ തൊടുത്ത ഷോട്ട് പുറത്ത് പോയി. തൊട്ടടുത്ത രണ്ടു മിനിറ്റിനിടയില് രണ്ടു ഗോളുകള് നേടി കരിം ബെന്സേമ ഫ്രഞ്ച് ടീമിനെ മുന്നിലെത്തിച്ചു. 65 ാം മിനിറ്റില് കാന്റേയില് നിന്നും കിട്ടിയ പന്ത് എംബാപ്പേ മറിച്ചു നല്കിയത് കരീം ബെന്സേമ സ്വിറ്റ്സര്ലന്റ് വലയില് എത്തിച്ചു. തൊട്ടടുത്ത മിനിറ്റില് ബെന്സേമ വീണ്ടും സ്കോര് ചെയ്തു. കോമാന് എംബാപ്പേ വഴി വന്ന ഒരു നീക്കം ഗ്രീസ്മാന് ഗോള്കീപ്പറെ മറികടന്ന് ഉയര്ത്തി നല്കിയ പന്ത് ബെന്സേമ ഹെഡ്ഡറിലൂടെ ഗോളാക്കി.
തുടര്ച്ചയായി രണ്ടാം മത്സരത്തിലാണ് ബെന്സേമ ഡബിള് നേടുന്നത്. ഗ്രൂപ്പ് മാച്ചില് പോര്ച്ചുഗലിനെതിരേയും ബെന്സേമ രണ്ടുഗോള് നേടിയിരുന്നു. രണ്ടുഗോളിന്റെ ആവേശത്തില് ഫ്രഞ്ചു പട സ്വിസ് ഗോള്മുഖം തുടര്ച്ചയായി വിറപ്പിച്ചുകൊണ്ടിരുന്നു. എംബാപ്പേയും കോമാനും പോഗ്ബയുമെല്ലാം ഗോള്മുഖത്തേക്ക് ഇരച്ചുകയറിയെങ്കിലും സ്വിറ്റ്സര്ലന്റ് പ്രതിരോധത്തില് തട്ടി പാഴായി. 74ാം മിനിറ്റില് സ്വിറ്റ്സര്ലന്റ് ആരാധകരുടെ നെഞ്ചിടിപ്പ് കൂട്ടി പോഗ്ബയുടെ ഗോളും വന്നു.
ബെന്സേമയുടെ ഇരട്ടഗോളിന് സഫറോവിക്കിലൂടെ സ്വിസ് മറുപടി
ബോക്സിന് 30 വാര അകലെ നിന്നും പോഗ്ബ തൊടുത്ത ലോംഗ് റേഞ്ചര് സ്വിസ് ഗോളി സോമറിന് ഒരു അവസരവും നല്കാതെ വലയുടെ ഇടതുമൂലയില് പറന്നിറങ്ങി. ഫ്രാന്സ് വിജയം പ്രതീക്ഷിച്ച് പ്രതിരോധം അലസമാക്കിയത് വിനയായി. 81 ാം മിനിറ്റില് സ്വിറ്റ്സര്ലന്റിന്റെയും തന്റെയും രണ്ടാംഗോള് സഫറോവിക് നേടി. എംബാബുവിന്റെ ക്രോസില് സഫറോവിക്കിന്റ ഹെഡ്ഡര് ലീഡ് 3-2 ആക്കി കുറച്ചു. മൂന്ന് മിനിറ്റ് കഴിഞ്ഞപ്പോള് 84 ാം മിനിറ്റില് മരിയോ ഗാവ്രനോവിക് വീണ്ടും ഫ്രഞ്ച് വലയില് പന്ത് എത്തിച്ചെങ്കിലും ഓഫ്സൈഡ് ഫ്ളാഗ് ഉയര്ന്നിരുന്നു.
കളി അവസാന മിനിറ്റിലേക്ക് കടക്കുമ്പോള് ഫ്രാന്സ് 3-2 വിജയം ഉറപ്പിച്ച് ആരാധകര് പാട്ടു തുടങ്ങിയപ്പോഴായിരുന്നു ഗാവ്രനോവികിലൂടെ സ്വിറ്റ്സര്ലന്റ് വീണ്ടും തിരിച്ചടിച്ചത്. 90 ാം മിനിറ്റില് ഗാവ്രനോവികിന്റെ തകര്പ്പന് ലോംഗ് റേഞ്ചര് ലോറിസിനെ മറികടന്ന് വലയില് എത്തിയതോടെ കളി വീണ്ടും മാറി മറഞ്ഞു. ഇഞ്ചുറി സമയത്ത് സ്വിറ്റ്സര്ലന്റിന്റെ വര്ഗാസിന് അവസരം കിട്ടിയെങ്കിലും ലോറിസിന്റെ മനസ്സാന്നിദ്ധ്യം തുണയായി. തൊട്ടുടുത്ത നിമിഷം സിസേക്കോ നല്കിയ പന്തില് കോമാന്റെ അടി ബാറില് തട്ടി മടങ്ങിയപ്പോള് ഫ്രാന്സും നിരാശപ്പെട്ടതോടെ സാധാരണ സമയം അവസാനിച്ചു.
അധികസമയത്തെ കളി ; എംബാപ്പേയുടെ പിഴവ്
ആദ്യ നീക്കം നടത്തിയത് ഫ്രാന്സായിരുന്നു ബോക്സില് നിന്നും പവാഡിന്റെ ഷോട്ട് അസാദ്ധ്യ സേവില് സ്വിസ് ഗോളി സോമര് രക്ഷപ്പെടുത്തി. തൊട്ടടുത്ത മിനിറ്റില് സ്വിറ്റ്സര്ലന്റിന്റെ മുന്നേറ്റം ഫ്രഞ്ച് ബോക്സില് ഗോളിക്ക് തൊട്ടുമുന്നില് രക്ഷപ്പെടുത്തി. 109 ാം മിനിറ്റില് കോമാന് നല്കിയ പന്തില് പോഗ്ബ നല്കിയ ഒന്നാന്തരം ത്രൂബോള് എംബാപ്പേ സ്വിറ്റ്സര്ഗോളി സോമര് മാത്രം മുന്നില് നില്ക്കേ എംബാപ്പേ പുറത്തേക്ക് അടിച്ചുകളഞ്ഞു. 118 ാം മിനിറ്റില് ഒളിവര് ജിറൂഡിന്റെ ഉജ്വല ഹെഡ്ഡറും സോമര് രക്ഷപ്പെടുത്തി. 119 ാം മിനിറ്റില് കളിയുടെ അവസാന സെക്കന്റില് ഫ്രഞ്ച് ബോക്സിന് തൊട്ടുമുന്നില് സ്വിറ്റ്സര്ലന്റിന് കിട്ടിയ ഫ്രീകിക്ക് പോസ്റ്റിന് മുകളിലൂടെ പറന്നകന്നു.
ഷൂട്ടൗട്ടിലും സ്വിറ്റ്സര്ലന്റ്
യൂറോ 2020 ല് ഷൂട്ടൗട്ടിലേക്ക് നീങ്ങിയ ആദ്യ മത്സരത്തില് ആദ്യ കിക്ക് സ്വിറ്റ്സര്ലന്റിന്. ഗാവ്രനോവിക്കിന്റെ കിക്ക് വലത്തേക്ക് ലോറിസ് നീങ്ങിയത് ഇടതുവശത്തേക്ക്. പോള് പോഗ്ബയിലൂടെ ഫ്രാന്സിന്റെ മറുപടി. തൊട്ടുമുമ്പത്തെ രംഗത്തിന്റെ ആവര്ത്തനം. രണ്ടാമതെത്തിയ സ്വിറ്റ്സര്ലന്റിന്റെ സ്കാറിന്റെ കിക്ക് വലയുടെ വലതുമൂലയില്. ഫ്രാന്സിനായി ജിറൂഡിന്റെ മറുപടിയും വലയുടെ വലതുമൂലയില്. പിന്നാലെ മാനുവല് അകാന്ഡിയുടെ ഗ്രൗണ്ടറും വലയില്. ഫ്രാന്സിന്റെ മാര്ക്കസ് തുറാമിന്റെ മറുപടിയും വലയില്. സ്വിറ്റ്സര്ലന്റിന്റെ പകരക്കാരന് വര്ഗാസിന്റെ കിക്ക് ഫ്രഞ്ച് ഗോളി ലോറിന്റെ കയ്യില് തട്ടി വലയില്. ഫ്രാന്സിന്റെ കിംബബേയുടെ മറുപടിയും ഒരവസരവും നല്കാതെ വലയില്. സ്വിറ്റ്സര്ലന്റിന്റെ അവസാനത്തെ കിക്കെടുത്ത നഗുമേല് മഗമതിയ്ക്കും പിഴച്ചില്ല. ഫാന്സിന്റെ അവസാന കിക്ക് എടുത്ത എംബാപ്പേയ്ക്ക് പക്ഷേ പിഴച്ചു. സ്വിസ് ഗോളി യാന് സോമര് തട്ടിയകറ്റി.
യൂറോ 2020 ല് സ്വിറ്റ്സര്ലന്റ് ചരിത്രമെഴുതി. ഇതാദ്യമായിട്ടാണ് അവരുടെ ടീം യൂറോയില് ക്വാര്ട്ടറില് കടക്കുന്നത്. മുമ്പ് പല തവണ യൂറോയില് എത്തിയപ്പോഴെല്ലാം അവര്ക്ക് ആദ്യ റൗണ്ടില് മടങ്ങാനായിരുന്നു വിധി. ഷൂട്ടൗട്ടില് നാലിനെതിരേ അഞ്ചുഗോളുകളുമായി സ്വിറ്റ്സര്ലന്റ് ക്വാര്ട്ടറില് മുന്നേറിയപ്പോള് യൂറോ ചാംപ്യന്മാരായ പോര്ച്ചുഗലിന് പിന്നാലെ ലോക ചാംപ്യന്മാരായ ഫ്രാന്സിനും മടക്കം.
