സെന്റ്പീറ്റേഴ്സ് ബര്ഗ്: യൂറോ 2020 ലെ അട്ടിമറി വീരന്മാരായ സ്വിറ്റ്സര്ലന്റെ ആളിക്കത്തല് ക്വാര്ട്ടറില് അവസാനിപ്പിച്ചപ്പോള് സ്പെയിന് സെമിയില് കടന്നു. തുടര്ച്ചയായി രണ്ടാം മത്സരത്തിലും വമ്പന് എതിരാളികളെ ഷൂട്ടൗട്ടില് എത്തിക്കാന് സ്വിറ്റ്സര്ലന്റിന് കഴിഞ്ഞെങ്കിലും സ്പാനിഷ് ഗോള്കീപ്പര് സിമോണിനെ മറികടക്കാനുള്ള മനക്കരുത്ത് ഇല്ലാതെ പോയി. കളിയില് പത്തുപേരായി ചുരുങ്ങിയിട്ടും യൂറോപ്പിലെ കരുത്തരായ സ്പെയിനെ റഗുലര് സമയത്തും അധികസമയത്തും പിടിച്ചു നിര്ത്താന് കഴിഞ്ഞത് മാത്രമായി അവരുടെ നേട്ടം.
പന്തടക്കത്തിലും മുന്നേറ്റത്തിലും സ്പെയിനായിരുന്നു മുന്തൂക്കം. കളിയുടെ 72 ശതമാനം സമയവും പന്ത് കൈവശം വെച്ച അവര് 28 തവണയാണ് ഗോളിലേക്ക് ലക്ഷ്യം വെച്ചത്. ഷോട്ട് ഓണ് ടാര്ഗറ്റ് 10, കോര്ണറുകള് 13 തുടങ്ങിയ കണക്കുകള് അവരുടെ മേധാവിത്വം വ്യക്തമാക്കുന്നു. ഷൂട്ടൗട്ടില് സ്പെയിന്റെ രണ്ടു കിക്കുകള് പാഴായപ്പോള് ആദ്യ കിക്കെടുത്ത മരിയോ ഗാവ്റനോവിക്കിന്റെ കിക്ക് മാത്രമാണ് സ്വിറ്റ്സര്ലന്റിന് ആശ്വാസം നല്കിയത്.
സാധാരണസമയത്ത് ഇരുടീമും ഓരോഗോള് അടിച്ച് സമനിലയിലായിരുന്നു. മദ്ധ്യനിര പ്രതിരോധിക്കുകയും ആക്രമിക്കുകയും ചെയ്യുന്ന സ്പെയിന്റെ കളി ശൈലിയില് കളിയുടെ എട്ടാം മിനിറ്റില് തന്നെ അവര് മുന്നിലെത്തി. ജോര്ഡി ആല്ബയുടെ ഷോട്ട് സ്വിസ് പ്രതിരോധതാരം സക്കറിയയുടെ കാലില് തട്ടി വലയില് കയറി. ഒരുഗോള് വീണതോടെ ആശയക്കുഴപ്പത്തിലായെങ്കിലും സ്പാനിഷ് മുന്നേറ്റത്തെ ഫലപ്രദമായി തടഞ്ഞു നിര്ത്താന് സ്വിറ്റ്സര്ലന്റിനായി. രണ്ടാം പകുതിയില് അവര് ഒപ്പമെത്തി. 68 ാം മിനിറ്റില് സ്പാനിഷ് പ്രതിരോധത്തിന്റെ ആശയക്കുഴപ്പം മുതലെടുത്ത് വര്ഗാസ് നല്കിയ പന്ത് ഷക്കീരി അനായാസം വലയിലേക്ക് തിരിച്ചുവിട്ടു.
ബോള് പൊസഷനിലും പാസുകളിലും മുന്നില് നിന്ന സ്പെയിനെ കൗണ്ടര് അറ്റാക്കിലൂടെ സ്വിറ്റ്സര്ലന്റും പരീക്ഷിച്ചു കൊണ്ടിരുന്നു. എന്നാല് 77 ാം മിനിറ്റില് ഫ്രൌളര് ചുവപ്പ് കാര്ഡ് കണ്ട് പുറത്ത് പോയത് സ്വിറ്റ്സര്ലന്റിന്റെ നീക്കങ്ങളെ ബാധിച്ചു. ഇതോടെ പൂര്ണ്ണമായും പ്രതിരോധത്തില് ഉൗന്നിയുള്ള കളിയിലേക്ക് സ്വിറ്റ്സര്ലന്റ് മാറിയതോടെ കളി സ്വിറ്റ്സര്ലന്റ് ഗോളി സോമാറും സ്പാനിഷ് മുന്നേറ്റവും തമ്മിലായി. സ്പാനിഷ് മദ്ധ്യനിര ഉജ്വലമായി നെയ്തെടുത്ത മുന്നേറ്റങ്ങളെല്ലാം ഫൈനല് തേഡില് സോമറിന് മുന്നില് തകര്ന്നതോടെ സ്പെയിന് വിയര്ത്തു.
കഴിഞ്ഞ മത്സരത്തില് ഫ്രാന്സിനെ വീഴ്ത്തിയ ഗോളി സോമറിനെ വിശ്വസിച്ച് എങ്ങിനെയും ഷൂട്ടൗട്ടില് കളിയെത്തിക്കുക എന്ന ലക്ഷ്യത്തില് അധികസമയത്ത് ബെല്ജിയം പന്തു തട്ടിയത് മുഴുവന് സ്പാനിഷ് മുന്നേറ്റത്തെ തടയുക മാത്രം അടവാക്കിയായിരുന്നു. അധികസമയം കൂടി പൂര്ത്തിയായതോടെ സ്വിറ്റ്സര്ലന്റ് ആശ്വസിച്ചെങ്കിലും വലിയ വിപത്ത് വരാനിരിക്കുന്നതേയുണ്ടായിരുന്നുള്ളൂ. ഷൂട്ടൗട്ടില് സ്പെയിന് മൂന്ന് കിക്കുകള് വലയില് എത്തിച്ചപ്പോള് സ്വിറ്റ്സര്ലന്റിന് നേടാനായത് ഒരു ഗോളാണ്. അവസാന പെനാല്റ്റി എടുത്ത വര്ഗ്ഗാസിന്റെ കിട്ട് ബാറിന് മുകളിലൂടെ പറക്കുകയും പിന്നാലെ സ്പെയിനായി കിക്കെടുക്കാന് വന്ന മൈക്കല് ഒയാര്സബാല് പന്ത് വലയിലാക്കുകയും ചെയ്തതോടെ സ്വിസ് ചരിതം അവസാനിച്ചു.
