കൊല്ക്കത്ത: രാജ്യത്ത് ക്രൂരമായി ഇന്ധനവില ഉയര്ത്തി ജനങ്ങള്ക്ക് കനത്ത ദുരിതം കൊണ്ടുവരരുതെന്ന് പ്രധാനമന്ത്രിക്ക് കത്തെഴുതി പശ്ചിമ ബംഗാള് മുഖ്യമന്ത്രി മമതാബാനര്ജി. മെയ് മാസം മാത്രം എട്ടു തവണ , ജൂണില് ആറു തവണയും വില കൂട്ടിയെന്നും കത്തില് ചൂണ്ടിക്കാട്ടുന്നു.
ഞെട്ടിക്കുന്ന പെട്രോള് വിലയില് പല സംസ്ഥാനങ്ങളിലും വില ലിറ്ററിന് 100 രൂപയായി. പെട്രോളിനും ഡീസലിനും വില കുറയ്ക്കുന്നത് ജനങ്ങള്ക്ക് വലിയ ആശ്വാസം ആയിരിക്കുമെന്നും രാജ്യത്തെ വിലക്കയറ്റ പ്രവണത പരിശോധിക്കണമെന്നും ആവശ്യപ്പെട്ടു. പെട്രോള്വില ബംഗാളിലെ 19 ജില്ലകളില് 100 കടന്നു. കൊല്ക്കത്തയില് പെട്രോള് ലിറ്ററിന് 99.84 രൂപയായിട്ടുണ്ട്.
സെസ്സും മറ്റും തുടര്ച്ചയായി ഉയര്ത്തി 42 ശതമാനത്തോളം പിടിച്ചെടുക്കുന്ന കേന്ദ്രത്തിന്റെ നികുതി നയത്തെയും മമത വിമര്ശിച്ചു. കഴിഞ്ഞ ഏതാനും വര്ഷമായി ഫെഡറല് വിരുദ്ധ നടപടികളെ ചെറുക്കേണ്ട സ്ഥിതിയാണ് സംസ്ഥാനങ്ങള്ക്കെന്നും കത്തില് പറയുന്നു. പെട്രോള് വില വര്ദ്ധിപ്പിച്ച് രാജ്യത്ത് വിലക്കയറ്റം ഉണ്ടാക്കാനാണ് കേന്ദ്രം ശ്രമിക്കുന്നത്. ഇത്തരം വിലക്കയറ്റം സാധാരണ ജനങ്ങളുടെ വരുമാനം ഗണ്യമായി കുറയ്ക്കും.
2014-15 മുതല് കേന്ദ്രത്തിന്റെ നികുതി പിരിച്ചെടുക്കല് 370 ശതമാനമായിട്ടാണ് ഉയര്ന്നിരിക്കുന്നതെന്നും കത്തില് ചൂണ്ടിക്കാട്ടുന്നു. ബംഗാളിലെ എല്ലാ ബ്ളോക്കുകളിലും ജൂലൈ 10 നും 11 നും രാവിലെ 10 മണി മുതല് 4 മണി വരെ പ്രതിഷേധം നടത്താന് തൃണമൂലിന് പദ്ധതിയുണ്ടെന്നും മമത കത്തില് വ്യക്തമാക്കിയിട്ടുണ്ട്.
