കൊല്ക്കത്ത: തന്റെ അനന്തിരവനും ടിഎംസി നേതാവുമായ അഭിഷേക് ബാനര്ജിയെയും ത്രിപുരയിലെ ടിഎംസി പ്രവര്ത്തകരെയും തിങ്കളാഴ്ച ബിജെപി പ്രവര്ത്തകര് ആക്രമിച്ചതിന്റെ ഉത്തരവാദിത്വം കേന്ദ്ര ആഭ്യന്തരമന്ത്രി അമിത്ഷായ്ക്ക് ആണെന്ന് ബംഗാള് മുഖ്യമന്ത്രി മമതാബാനര്ജി. ഇത്തരം നാണംകെട്ട പ്രവര്ത്തികൊണ്ട് താന് ഭയപ്പെടില്ലെന്നും പറഞ്ഞു.
തൃണമൂല് കോണ്ഗ്രസ് ജനറല് സെക്രട്ടറി അഭിഷേക് ബാനര്ജിയ്ക്കും ത്രിപുരയിലെ ടിഎംസി വിദ്യാര്ത്ഥി നേതാവിനു നേരെയും ആക്രമണം നടന്നതായി ആരോപണം ഉയര്ന്ന് ദിവസങ്ങള്ക്ക് ശേഷമാണ് മമത ആരോപണവുമായി വരുന്നത്. ത്രിപുരയിലും അസമിലും ഉത്തര്പ്രദേശിലും എവിടെല്ലാം ഭരിക്കുന്നോ അവിടെയെല്ലാം ബിജെപിയുടെ അരാജകത്വമാണെന്നും മമത ആരോപിച്ചു. പരിക്കേറ്റ് ആശുപത്രിയില് കഴിയുന്ന ത്രിപുരയിലെ ടിഎംസി പ്രവര്ത്തകരെ സന്ദര്ശിച്ച ശേഷമാണ് മമത ഈ ആരോപണം നടത്തിയത്.
ഇത്തരം ആക്രമണങ്ങള് കേന്ദ്ര ആഭ്യന്തരമന്ത്രി അമിത്ഷായുടെ പിന്തുണയില്ലാതെ നടക്കാന് സാധ്യതയില്ലെന്നും ത്രിപുര പോലീസിന് മുന്നില ഇത്തരം സംഭവങ്ങള് ത്രിപുര പോലീസിന് മുന്നില് നടക്കുമ്പോള് അവര് നിശബ്ദമായി ഇരിക്കുന്നെങ്കില് അമിത്ഷാ തന്നെയാണ് പിന്നിലെന്ന് ഉറപ്പാണെന്നും മമത പറഞ്ഞു. ഇത്തരം ആക്രമണം നടത്താന് ത്രിപുര മുഖ്യമന്ത്രിയ്ക്ക് നാണമില്ലെന്നും മമത പറഞ്ഞു. ത്രിപുരയില് നടക്കുന്ന 2023 ലെ തെരഞ്ഞെടുപ്പാണ് അക്രമികള് ലക്ഷ്യമിടുന്നതെന്നും മമത പറഞ്ഞു.
