കാബൂള്: അമേരിക്കക്കാര് സമ്പൂര്ണ്ണമായും ഒഴിഞ്ഞുപോയതോടെ അഫ്ഗാനില് താലിബാന്സേന അവശേഷിച്ചിട്ടുള്ള അമേരിക്കക്കാര്ക്കായി വീടുവീടാന്തരം കയറിയിറങ്ങി തെരച്ചില് നടത്തുന്നതായി വിദേശ മാധ്യമങ്ങള്. പുറത്തേക്ക് പോകാന് മാര്ഗ്ഗമില്ലാതെ ഇപ്പോഴും അഫ്ഗാനില് 100 ലധികം അമേരിക്കക്കാര് കുടുങ്ങിക്കിടക്കുന്നു എന്നും ഇവരെ കണ്ടെത്താനായി താലബാന് ശ്രമം തുടരുകയാണെന്നും കാലിഫോര്ണിയയില് നിന്നുള്ള നസ്രിയ എന്ന ഗര്ഭിണിയായ 25 കാരിയെ ഉദ്ധരിച്ച് ബ്രിട്ടീഷ് മാധ്യമങ്ങളാണ് വാര്ത്ത പുറത്തുവിട്ടിട്ടുള്ളത്.
തനിക്ക് വീട്ടിലേക്ക് പോകാനാകുമോ? അതോ ഇവിടെ തന്നെ ജീവിതകാലം മുഴുവന് കിടക്കേണ്ടി വരുമോ? അതോ ഇവിടെ മരിച്ചൊടുങ്ങുമോ? എന്താണ് സംഭവിക്കാന് പോകുന്നത്? വോയ്സ് ഓഫ് അമേരിക്കയോട് നസ്രിയയുടെ പ്രതികരണം ഇങ്ങിനെയെല്ലാമായിരുന്നു. നീല പാസ്പോര്ട്ട് കൈവശം വെച്ചിരിക്കുന്നവരെ കണ്ടെത്താന് വീടു വീടാന്തരം കയറിയിറങ്ങി താലിബാന് സൈന്യം തെരച്ചിലിലാണെന്നും ഇവര് പറയുന്നു.
കുടുംബാംഗങ്ങളെ കാണാനും ദീര്ഘകാലമായി പ്രണയത്തില് കഴിയുന്ന അഫ്ഗാന് യുവാവുമായുളള വിവാഹത്തിനുമായി കഴിഞ്ഞ ജൂണിലാണ് നസ്രിയ അഫ്ഗാനില് എത്തിയത്. നസ്രിയ എന്ന തന്റെ ആദ്യപേര് മാത്രമേ ഉപയോഗിക്കാവൂ എന്നും ഇവര് പറയുന്നു. അമേരിക്കക്കാരെ രാജ്യത്തില് തന്നെ കുരുക്കിയിടുന്ന നടപടി താലിബാന് തുടരുകയാണെന്ന് ടെക്സാസ് പ്രതിനിധി മൈക്ക് മക് കൗളിന്റെ ഞായറാഴ്ചത്തെ പ്രസ്താവനയെ ന്യായീകരിക്കുന്ന നടപടിയാണ് താലിബാനില് നിന്നും കേള്ക്കുന്നതെന്നാണ് ഡെയ്ലിമെയില് പറയുന്നത്. തങ്ങളുടെ പൗരന്മാരെ വിട്ടയയ്ക്കണമെന്ന് അമേരിക്ക ആവര്ത്തിച്ചു പറയുമ്പോഴും മസര് ഇ ഷെരീഫില് നിന്നും അമേരിക്കക്കാരുമായി പറക്കാനിരുന്ന ആറ് വിമാനങ്ങളാണ് തടഞ്ഞു വെച്ചിരിക്കുന്നത്.
അതേസമയം വിമാനം താലിബാന് തടഞ്ഞുവെച്ചിരിക്കുന്നത് ഡിമാന്റ് വെയ്ക്കാന് വേണ്ടിയാണെന്നും സൂചനയുണ്ട്. അഫ്ഗാനിസ്ഥാനില് ഇപ്പോഴും കുടുങ്ങിക്കിടക്കുന്ന 100 ലധികം അമേരിക്കക്കാരുമായി സംസാരിച്ചതായി ഞായറാഴ്ച വൈറ്റ് ഹൗസ് ചീഫ് ഓഫ് സ്റ്റാഫ് റോണ് ക്ളെയ്നും പറഞ്ഞു. ഇവരെ രക്ഷപ്പെടുത്താന് ഏതറ്റം വരെയും പോകുമെന്നും എല്ലാവരെയും പുറത്തിറക്കുമെന്നും അമേരിക്കന് അധികൃതര് പറയുന്നു.
നസ്രിയയെ രക്ഷിക്കാന് കാലിഫോര്ണിയന് അധികൃതരും ശ്രമിക്കുണ്ട്. ഗര്ഭിണിയായിരിക്കുന്ന നസ്രിയയ്ക്ക് താലിബാനില് നിന്നും മോശം അനുഭവം ഉണ്ടായതായി കാലിഫോര്ണിയന് അധികൃതര് ആരോപിച്ചിട്ടുണ്ട്. വിമാനത്താവളത്തിലെ ചെക്ക് പോയിന്റില് വെച്ച് ഇവരുടെ വയറ്റില് തൊഴിച്ചെന്നാണ് ആരോപണം. വിമാനത്തില് കയറാന് വേണ്ടി ആള്ക്കാര് തിക്കും തിരക്കും കൂട്ടിയപ്പോള് വിമാനത്താവള പ്രവേശന വാതിലില് തന്നെ താലിബാന് സേന ആള്ക്കാരെ തടഞ്ഞു. വിമാനം കിട്ടാന് പാടാണെന്നും ഏതാനും ദിവസമായി തങ്ങളെല്ലാം തെരുവിലാണ് കഴിയുന്നതെന്നും ഇവര് പറഞ്ഞിട്ടുണ്ട്.
ഭക്ഷണവും വെള്ളവും ഒന്നുമില്ലാതെ 12 - 13 മണിക്കൂറുകളാണ് ഇവര് കാത്തിരുന്നത്. സഹായത്തിനായി സ്റ്റേറ്റ് ഡിപ്പാര്ട്ട്മെന്റിനെ വിളിച്ചപ്പോള് വിമാനത്താവളത്തിന് പുറത്ത് ലൊക്കേഷന് സെറ്റ് ചെയ്ത് കാത്തുനില്ക്കാനും തങ്ങള് വന്ന് കൊണ്ടുപോകാമെന്നുമായിരുന്നു പറഞ്ഞിരുന്നത്. എന്നാല് ആരും വന്നില്ലെന്ന് നസ്രിയ പറയുന്നു.
