തിരുവനന്തപുരം: കേരളത്തിലെ ഒരു പൊലീസ് ഉദ്യോഗസ്ഥനും തനിക്ക് സല്യൂട്ട് ചെയ്തുകൊണ്ട് അഭിവാദ്യം അറിയിക്കുന്ന രീതി വേണ്ടന്ന് ടിഎന് പ്രതാപന് എംപി. ഇതുസംബന്ധിച്ച് പൊലീസുകാര്ക്കും ഉദ്യോഗസ്ഥര്ക്കും നിര്ദേശം നല്കണമെന്നാവശ്യപ്പെട്ട് ചീഫ് സെക്രട്ടറിക്കും ഡിജിപിക്കും എംപിയുടെ കത്തുനല്കി. സുരേഷ് ഗോപി എംപിയുമായി ബന്ധപ്പെട്ട സല്യൂട്ട് വിവാദത്തിന്റെ പശ്ചാത്തലത്തിലാണ് കത്ത്.
'കേരളത്തിലെ ഒരു പൊലീസ് ഉദ്യോഗസ്ഥനും തനിക്ക് സല്യൂട്ട് ചെയ്തുകൊണ്ട് അഭിവാദ്യം അറിയിക്കുന്ന രീതി ഉണ്ടാകരുതെന്ന് ആഗ്രഹിക്കുകയാണ്. അതുപോലെ പൊലീസ് ഉദ്യോഗസ്ഥരും, സിവില് സര്വീസുകാരും, മറ്റു സര്ക്കാര് ഉദ്യോഗസ്ഥരും എന്നെ ''സാര്'' എന്ന് അഭിവാദ്യം ചെയ്യുന്നതും ഒഴിവാക്കണമെന്ന് ഇതിനാല് താല്പര്യപ്പെടുന്നു. പകരം, എംപി എന്നോ, അല്ലെങ്കില് പേരോ, അതുമല്ലെങ്കില് സാധാരണ ജനങ്ങള് പരസ്പരം അഭിവാദ്യം ചെയ്യുന്ന ഏതെങ്കിലും രീതിയിലോ എന്നെയും അവര്ക്ക് അഭിവാദ്യം ചെയ്യാവുന്നതാണ്.'- എംപി കത്തില് പറയുന്നു.
പ്രോട്ടോകോള് പ്രകാരം എംപി ഒരുപക്ഷെ ചീഫ് സെക്രട്ടറിക്കും പൊലീസ് മേധാവിക്കും മുകളിലായിരിക്കും. എന്നാല് ജനങ്ങള് തിരഞ്ഞെടുത്ത അവരുടെ ഒരു പ്രതിനിധി മാത്രമാണ് എംപി ഉള്പ്പെടെയുള്ള ജനപ്രതിനിധികള്. അഞ്ചോ, ആറോ വര്ഷം കൂടുമ്പോള് മാറുന്നവരാണ് എല്ലാ ജനപ്രതിനിധികളും. അതുകൊണ്ടുതന്നെയായിരിക്കണം കേരള പൊലീസ് മാനുവലില് സല്യൂട്ടിന് അര്ഹരായവരുടെ പട്ടികയില് എംപിമാര് ഉള്പ്പെടെയുള്ളവരെ ഒഴിവാക്കിയതെന്ന് മനസ്സിലാക്കുന്നു.
എന്നിരുന്നാലും എംപിമാരെ പൊലീസ് ഉദ്യോഗസ്ഥര് സല്യൂട്ട് നല്കി ആദരിക്കുന്നത് കാണുന്നുണ്ട്. എന്നാല് 'സല്യൂട്ട്', 'സാര്' വിളി തുടങ്ങിയവ കൊളോണിയല് ശീലങ്ങളുടെ തുടര്ച്ചയാണെന്ന് വിശ്വസിക്കുന്ന ഒരാളെന്ന നിലയില് ഇത് ഒരു അവകാശവും അധികാരവുമായി കാണുന്ന പ്രവണത വര്ദ്ധിച്ച് വരുന്നതില് അതിയായ ഖേദമുണ്ട്. ജനപ്രതിനിധികളെ തെരഞ്ഞെടുക്കുന്നത് ജനങ്ങളാണ്. ജനങ്ങള് എന്നു പറഞ്ഞാല് എല്ലാവരും ഉള്പ്പെടും. തങ്ങള് തെരഞ്ഞെടുത്ത വ്യക്തിയെ തങ്ങള് തന്നെ 'സല്യൂട്ട്' ചെയ്യുന്നതും 'സാര്' എന്നുവിളിക്കുന്നതും ജനാധിപത്യ സങ്കല്പ്പങ്ങള്ക്ക് വിരുദ്ധവുമാണെന്നും എംപി കത്തില് പറയുന്നു.
