ന്യൂഡല്ഹി: ഡല്ഹിയുടെ അതിര്ത്തികളില് പ്രക്ഷോഭം നടത്തുന്ന കര്ഷകരെ ബലംപ്രയോഗിച്ച് നീക്കാന് ശ്രമിച്ചാല് കടുത്ത പ്രത്യാഘാതം നേരിടേണ്ടിവരുമെന്ന് ഭാരതീയ കിസാന് യൂണിയന് നേതാവ് രാകേഷ് ടികായത്. പ്രക്ഷോഭകരെ നീക്കാന് ശ്രമിച്ചാല് രാജ്യത്തെ മുഴുവന് സര്ക്കാര് ഓഫീസുകളും ഭക്ഷ്യധാന്യ ചന്തകളാക്കി മാറ്റുമെന്ന് അദ്ദേഹം പറഞ്ഞു.
സമരപ്പന്തലുകള് പൊളിച്ചുനീക്കാന് ശ്രമിച്ചാല് പോലീസ് സ്റ്റേഷനുകളിലും ജില്ലാ മജിസ്ട്രേട്ടുമാരുടെ ഓഫീസുകളിലും സമരപ്പന്തല് കെട്ടുമെന്നും അദ്ദേഹം ട്വീറ്റ് ചെയ്തു.
കര്ഷക പ്രക്ഷോഭം തുടങ്ങിയതിന് പിന്നാലെ കഴിഞ്ഞ 11 മാസങ്ങളായി ഈ ഭാഗത്തെ റോഡുകള് അടച്ചിരിക്കുകയാണ്. ഇതോടെ യാത്രക്കാര് കടുത്ത ദുരിതത്തിലായിരുന്നു. അതിനിടെ കര്ഷകര്ക്ക് പ്രക്ഷോഭം നടത്താന് അവകാശമുണ്ടെങ്കിലും അനിശ്ചിത കാലത്തേക്ക് റോഡ് ഉപരോധിക്കാനുള്ള അവകാശമില്ലെന്ന് കഴിഞ്ഞയാഴ്ച സുപ്രീം കോടതി ചൂണ്ടിക്കാട്ടിയിരുന്നു. എന്നാല് ബാരിക്കേഡുകള് സ്ഥാപിച്ച് ഗതാഗതം തടസപ്പെടുത്തുന്നത് പോലീസാണെന്ന് കര്ഷക സംഘടനകള് കോടതിയില് ചൂണ്ടിക്കാട്ടി. പിന്നാലെയാണ് ബാരിക്കേഡുകളും കോണ്ക്രീറ്റ് ബ്ലോക്കുകളും പോലീസ് നീക്കിയത്.
ടിക്രി അതിര്ത്തിയിലെ റോഡിലൂടെ ഗതാഗതം സുഗമമായാല് രാജസ്ഥാന്, ഹരിയാണ സംസ്ഥാനങ്ങളില്നിന്ന് രാജ്യതലസ്ഥാനത്തേക്ക് വരുന്നവര്ക്കടക്കം വലിയ ആശ്വാസമാകും. കേന്ദ്ര സര്ക്കാര് കൊണ്ടുവന്ന മൂന്ന് കാര്ഷിക നിയമങ്ങള്ക്കെതിരെ 2020 നവംബര് 26 മുതല് ഡല്ഹിയുടെ അതിര്ത്തികളില് കര്ഷകര് പ്രക്ഷോഭം നടത്തുകയാണ്. ഗാസിപുര്, ടിക്രി, സിംഘു അതിര്ത്തികളിലാണ് പ്രക്ഷോഭം.
