കൊച്ചി: നടിയെ ആക്രമിച്ച കേസില് ദിലീപിനെതിരേ കൂടുതല് വെളിപ്പെടുത്തലുള്ള ശബ്ദരേഖ പുറത്തുവിട്ടു വാര്ത്താചാനല്. അന്വേഷണ ഉദ്യോഗസ്ഥരെയും ഒന്നാം പ്രതി പള്സര് സുനിയെയും വകവരുത്താന് ദീലിപ് പദ്ധതിയിട്ടതിനു തെളിവുണ്ടെന്ന രീതിയിലാണു ശബ്ദരേഖ പുറത്തുവിട്ടത്. ദിലീപിന്റെയും ഇപ്പോഴും അജ്ഞാതനായ വി.ഐ.പിയുടെയും ശബ്ദരേഖയെന്നാണു പറയുന്നത്.
ദിലീപിന്റെ സഹോദരന് അനൂപ്, ദിലീപിന്റെ സഹോദരീ ഭര്ത്താവ് സുരാജ് എന്നിവര് സംസാരിക്കുന്നതാണു ശബ്ദരേഖയിലുള്ളത്. കേസിലെ അഞ്ച് ഉദ്യോഗസ്ഥര്മാര് അനുഭവിക്കുമെന്നു ദിലീപ് പറയുന്നതു ശബ്ദരേഖയില് കേള്ക്കാം.
ദിലീപ് ജാമ്യത്തിലിറങ്ങിയശേഷം തന്നെ അറസ്റ്റ്ചെയ്തു കൊണ്ടു പോകുന്ന ദൃശ്യങ്ങള് ടെലിവിഷന് സ്ക്രീനില് പോസ് ചെയ്ത് അഞ്ചു പോലീസ് ഉദ്യോഗസ്ഥരെ ചൂണ്ടിക്കാണിച്ച് ഇവര് അനുഭവിക്കുമെന്നു ദിലീപ് പറഞ്ഞതിനു താന് സാക്ഷിയാണെന്നു നടനെതിരേ വെളിപ്പെടുത്തലുകള് നടത്തിയ സംവിധായകന് ബാലചന്ദ്രകുമാറും പറഞ്ഞിരുന്നു.
ബാലചന്ദ്രകുമാറിന്റെ രഹസ്യമൊഴിയെടുക്കും
കൊച്ചി: നടിയെ ആക്രമിച്ച കേസില് പുതിയ വെളിപ്പെടുത്തല് നടത്തിയ സംവിധായകന് ബാലചന്ദ്രകുമാറിന്റെ രഹസ്യമൊഴിയെടുക്കാന് പ്രോസിക്യൂഷന് സി.ജെ.എം. കോടതിയില് അപേക്ഷ നല്കി. അപേക്ഷ അടുത്ത ദിവസം തന്നെ പരിഗണിച്ച് സി.ജെ.എം. കോടതി മൊഴി രേഖപ്പെടുത്താന് മജിസ്ട്രേറ്റിനെ ചുമതലപ്പെടുത്തും. ദിലീപ് ഉള്പ്പെടെയുള്ള പ്രതികളെ വീണ്ടും ചോദ്യംചെയ്യും. ദിലീപിന്റെ കുടുംബാംഗങ്ങള് ഉള്പ്പെടെ ശബ്ദരേഖയില് പരാമര്ശിക്കുന്നവരെയും ചോദ്യംചെയ്യാനാണു ഉദ്ദേശിക്കുന്നത്. വിയൂര് ജയിലുള്ള ഒന്നാംപ്രതി പള്സര് സുനിയെ കഴിഞ്ഞ ദിവസം കോടതിയില് ഹാജരാക്കിയിരുന്നു.
താന് പലതവണ ദിലീപിന്റെ വീട്ടില് പോയിട്ടുണ്ടെന്നു സുനി മൊഴി നല്കിയിട്ടുണ്ട്. ബാലചന്ദ്രകുമാറിനെ ദിലീപിന്റെ വീട്ടില്വച്ചു താന് കണ്ടിട്ടുണ്ടെന്നു സുനി അഭിഭാഷകനോടു വെളിപ്പെടുത്തി. ദിലീപിന്റെ വീട്ടില് പള്സര് സുനിയെ കണ്ടെന്നും ഒരു വി.ഐ.പി. കേസില് ഇടപെട്ടിട്ടുണ്ടെന്നും ബാലചന്ദ്രനും വെളിപ്പെടുത്തിയിരുന്നു. എന്നാല് വി.ഐ.പ.ി ആരാണെന്നുമാത്രം വെളിപ്പെടുത്തിയിട്ടില്ല.
കഴിഞ്ഞ ദിവസം ബാലചന്ദ്രകുമാറിന്റെ മൊഴി അന്വേഷണ സംഘം രേഖപ്പെടുത്തിയിരുന്നു. തുടര്ന്നു ചില നിര്ണ്ണായക വിവരങ്ങളും തെളിവുകളും സീല് വച്ച കവറില് വിചാരണക്കോടതിയില് സമര്പ്പിച്ചു. ബാലചന്ദ്രകുമാറിന്റെ മൊബൈല് ഫോണും സമര്പ്പിച്ചതായാണു വിവരം.
