ബോളിവുഡ് ആരാധകരില് ഞെട്ടലുണ്ടാക്കിയ ഒന്നായിരുന്നു കിംഗ് ഖാന് ഷാരൂഖ് ഖാന്റെ മകന് ആര്യന് ഖാനെ നാര്ക്കോട്ടിക് കണ്ട്രോള് ബ്യൂറോ അറസ്റ്റ് ചെയ്തത്. ആഴ്ചകള് നീണ്ട ജുഡീഷ്യല് കസ്റ്റഡിക്ക് ശേഷമാണ് ജാമ്യം ലഭിച്ചത്. എന്നാലിപ്പോള് ആര്യന് ഒരു വലിയ മയക്കുമരുന്ന് ഗൂഢാലോചനയുടെ ഭാഗമായിരുന്നു എന്നതിന് ‘തെളിവുകളൊന്നുമില്ല’ എന്ന് നാര്ക്കോട്ടിക് കണ്ട്രോള് ബ്യൂറോയുടെ (എന്സിബി) എസ്ഐടി അടുത്തിടെ വ്യക്തമാക്കി. ബോളിവുഡ് താരം ഷാരൂഖ് ഖാനെ അപകീര്ത്തിപ്പെടുത്താന് മാത്രമായിരുന്നു മകനെതിരെയുള്ള മയക്ക് മരുന്ന് കേസെന്ന് തെളിഞ്ഞിരിക്കയാണ് അന്വേഷണസംഘത്തിന്റെ പുതിയ കണ്ടെത്തല്.
ഈ സംഭവത്തെക്കുറിച്ച് തുറന്ന അഭിപ്രായം പറഞ്ഞിരിക്കുകയാണ് മലയാളത്തിന്റെ പ്രിയ നടന് ടൊവിനോ തോമസ്. നാരദന് എന്ന ചിത്രത്തിനായുള്ള അഭിമുഖത്തിനിടെയാണ് താരത്തിന്റെ തുറന്നു പറച്ചില്. ‘‘അവരുടെ ഉദ്ദേശം അതായിരുന്നുവെന്ന് ഞാന് കരുതുന്നു, ഇപ്പോള് നമുക്കറിയാവുന്നതില് നിന്ന്, ഷാരൂഖ് ഖാന്റെ പ്രശസ്തി, മകന്റെ പ്രശസ്തി എന്നിവയ്ക്ക് കളങ്കം വരുത്താനുള്ള രാഷ്ട്രീയ ഉദ്ദേശം ഉണ്ടായിരുന്നു, അത് പോലെ തോന്നുന്നു..” എന്നാണ് ടൊവിനോ പറഞ്ഞത്.
മാധ്യമ ലോകത്തെ മാറിയ സംസ്കാരവുമായി ബന്ധപ്പെട്ട് ഒരു ബോളിവുഡ് ഓണ്ലൈന് ചാനലിനോട് സംസാരിക്കാന് ടൊവിനോയും സംവിധായകന് ആഷിഖ് അബുവും മറ്റ് താരങ്ങളുമൊക്കെയുണ്ടായിരുന്നു. മുംബൈയില് നാരദന് എന്ന ചിത്രത്തിന്റെ പ്രിവ്യു ഷോയില് പങ്കെടുക്കാനെത്തിയതായിരുന്നു മലയാളത്തിലെ മിന്നും താരങ്ങള്. ആര്യന്റെ അറസ്റ്റിനെ സംബന്ധിച്ച് ആഷിഖ് അബുവും പ്രതികരിച്ചു. “ഇത് അരങ്ങേറിയതാണ്, ഇത് ആസൂത്രണം ചെയ്തതാണ്,” എന്നാണ് ആഷിഖ് പറഞ്ഞത്.
കെട്ടിച്ചമച്ച കഥകള് പ്രചരിപ്പിക്കുന്ന ഒരു വാര്ത്താ അവതാരകനായാണ് ടൊവിനോ ‘നാരദന്’ എന്ന സിനിമയിലെത്തുന്നത്. സിനിമയുമായി ബന്ധപ്പെട്ട ചോദ്യങ്ങള്ക്കിടയില് ഇരുവരോടും ആര്യന്റെ അറസ്റ്റിനെക്കുറിച്ചുള്ള ചോദ്യം ചോദിച്ചു. അപ്പോഴാണ് ഷാരൂഖ് ഖാന്റെ മകന് ആര്യന് ഖാന്റെ അറസ്റ്റ് രാഷ്ട്രീയ പ്രേരിതമായിരുന്നു, അച്ഛന്റെ സല്പ്പേരിന് കളങ്കമുണ്ടാക്കാനും ആയിരുന്നുവെന്ന് ടൊവിനോയും ആഷിഖ് അബുവും പറഞ്ഞത്. ഈ പൊളിറ്റിക്കല് ത്രില്ലര് സിനിമയില് അന്ന ബെന്നും അഭിനയിക്കുന്നുണ്ട്.
കഴിഞ്ഞ വര്ഷം ഒക്ടോബറിലാണ് 24കാരനായ ആര്യന് മയക്കുമരുന്ന് കേസില് അറസ്റ്റിലായത്. കേസും അറസ്റ്റും കഴിഞ്ഞ് 4 മാസം പിന്നിട്ടപ്പോള് ആരോപണത്തില് തെളിവുകള് ഇല്ലെന്ന റിപ്പോര്ട്ട് പുറത്ത് വന്നു. ഈ കാലയളവില് നടന്ന മാധ്യമ വിചാരണക്കും അപകീര്ത്തിപ്പെടുത്തുന്ന വാര്ത്തകള്ക്കും എന്ത് ന്യായീകരണമാണ് നിരത്താനുള്ളതെന്നും നടന് ടോവിനോ തോമസ് ചോദിച്ചു. ആര്യന് ഖാനെതിരെയുള്ള കേസിന് പുറകില് രാഷ്ട്രീയ മുതലെടുപ്പ് ഉണ്ടായിരുന്നെന്നാണ് സംവിധായകന് ആഷിഖ് അബു പറഞ്ഞത്. വാര്ത്തകള്ക്കായുള്ള മത്സരമാണ് മാധ്യമരംഗം നേരിടുന്ന വെല്ലുവിളിയെന്നും ആഷിഖ് അബു ചൂണ്ടിക്കാട്ടി. ‘നാരദന്’ എന്ന പുതിയ ചിത്രത്തിലൂടെ സംവദിക്കുന്നതും മാധ്യമ ലോകത്തെ ഈ പ്രവണതകളെ കുറിച്ചാണ്. സെന്സേഷണല് വാര്ത്തകള്ക്ക് വേണ്ടിയുള്ള നെട്ടോട്ടമാണ് പുതിയകാല മാധ്യമ പ്രവര്ത്തകരെ കൂടുതല് സമ്മര്ദ്ദത്തിലാക്കുന്നത്. ബ്രേക്കിംഗ് ന്യൂസുകള്ക്കായുള്ള മത്സരം വര്ദ്ധിച്ചതോടെ പല വാര്ത്തകളും യാഥാര്ഥ്യമാണോയെന്ന് പോലും പലരും പരിശോധിക്കാറില്ല. ചില മാധ്യമങ്ങള് തലക്കെട്ടില് ഒരു ചോദ്യചിഹ്നം നല്കിയാണ് സ്വന്തം നില സുരക്ഷിതമാക്കുന്നതെന്ന് ടോവിനോ പറഞ്ഞു. എന്നാല് വാര്ത്ത തെറ്റാണെന്ന് തെളിഞ്ഞാല് തിരുത്താന് പോലും തയ്യാറാകാത്തവര് ഈ മേഖലയില് സാധാരണയാണെന്ന് അന്ന ബെന് ചൂണ്ടിക്കാട്ടി. ഒരാളെ അപകീര്ത്തിപ്പെടുത്താനും ബ്ലാക്ക്മെയില് ചെയ്യാനും മാധ്യമങ്ങളെ ദുരുപയോഗം ചെയ്യുന്ന രീതി തെറ്റാണെന്ന് ടോവിനോ പറഞ്ഞു.
ആര്യന് ഖാന് കേസില് തെളിവുകള് ഇല്ലെന്ന് പ്രത്യേക അന്വേഷണ സംഘം കഴിഞ്ഞ ദിവസം കണ്ടെത്തിയത് വലിയ വാര്ത്തയായില്ല. എന്നാല് ആഡംബര കപ്പലിലെ റെയ്ഡും അറസ്റ്റും ചോദ്യം ചെയ്യലും ജയില്വാസവുമെല്ലാം മാധ്യമങ്ങള് ആഘോഷിക്കുകയായിരുന്നു. ഷാരൂഖ് ഖാനെ മാധ്യമ വിചാരണ നടത്തിയവരും തെളിവില്ലെന്ന വാര്ത്തയോട് നിസ്സംഗതയാണ് പുലര്ത്തിയത്.
