മുംബൈ: സ്വര്ണ വിലയില് വീണ്ടും കുത്തനെ ഇടിവ്. പവന്റെ വില 320 രൂപ കുറഞ്ഞ് 22,000 രൂപയായി. 2750 രൂപയാണ് ഗ്രാമിന്. രാജ്യാന്തര വിപണിയില് ഗ്രാമിന് 2,620.90 രൂപയാണ്. .4 ശതമാനത്തിന്റെ കുറവാണ് ഇന്നലെ ഉണ്ടായിരിക്കുന്നത്. ഈ മാസത്തെ ഏറ്റവും കുറഞ്ഞ നിരക്കാണിത്. നവംബര് ഒമ്പതിനാണ് സ്വര്ണ വില ഉയര്ന്ന നിലവാരമായ 23,480 ലെത്തിയത്.
അമേരിക്കന് പ്രസിഡന്റ് തെരഞ്ഞെടുപ്പില് ഡോണള്ഡ് ട്രംപ് മുന്നേറ്റം ആരംഭിച്ചത് മുതല് സ്വര്ണവും കരുത്ത് തെളിയിച്ചിരുന്നു. രണ്ടാഴ്ച്ചയ്ക്കുള്ളില് 1,480 രൂപയോളമാണ് സ്വര്ണവില കുറഞ്ഞത്. കള്ളപ്പണം തടയുന്നതിന്റെ ഭാഗമായി നോട്ടുകള് പിന്വലിച്ചതോടെ ഇന്ത്യന് വിപണിയില് സ്വര്ണവില താഴേക്ക് പോരാന് തുടങ്ങിയിരുന്നു. ഉപഭോഗത്തില് വന് ഇടിവുണ്ടായതാണ് സ്വര്ണവിലയിലെ ഇപ്പോഴത്തെ വന്തകര്ച്ചയ്ക്ക് കാരണം.
രൂപ വന് മൂല്യത്തകര്ച്ചയിലേക്കെന്ന് ആശങ്ക. ഒരു ഡോളറിന് 68.73 രൂപ എന്ന നിരക്കാണ് ഇന്നലെ രേഖപ്പെടുത്തിയത്. 39 മാസത്തെ ഏറ്റവും കുറഞ്ഞ നിരക്കാണിത്. 2013 ഓഗസ്റ്റ് 28നാണ് ഇതിനു മുമ്പ് രൂപ ഇത്രയും താഴ്ന്ന നിലയിലെത്തിയത്. ഡോളറുമായുള്ള രൂപയുടെ വിനിമയ മൂല്യം 70 രൂപ വരെ എത്തുമെന്നും റിപ്പോര്ട്ടുകളുണ്ട്. ഉയര്ന്നമൂല്യമുള്ള നോട്ടുകള് പിന്വലിച്ച ശേഷം രൂപയുടെ മൂല്യം മൂന്നുശതമാനമാണു കുറഞ്ഞത്.
ഡോളറിന്റെ മൂല്യം മറ്റുകറന്സികളെ അപേക്ഷിച്ചു കൂടിവരുന്നതും രാജ്യത്തിന്റെ വിപണിയിലുള്ള 84 ശതമാനം നോട്ടുകള് പിന്വലിച്ചതുമാണു രൂപയുടെ മൂല്യം താഴേക്കുപോകാന് കാരണം. ഇന്ത്യക്കാരടക്കമുള്ള നിക്ഷേപകര് ഓഹരി വിപണി ഉപേക്ഷിച്ചു കൂടുതല് സുരക്ഷിത നിക്ഷേപങ്ങള് തേടിയതും അഭ്യന്തര നിക്ഷേപകര് വന്തോതില് ഓഹരി വിറ്റഴിക്കുന്നതും രൂപയുടെ മൂല്യത്തെ ബാധിക്കുകയായിരുന്നു.
