പ്രത്യേക പരിഗണന വേണ്ടുന്ന നിരവധി കുഞ്ഞുങ്ങൾ നമുക്കു ചുറ്റുമുണ്ടാകും. സാധാരണ കുട്ടികൾക്കില്ലാത്ത പല കഴിവുകളും ഇത്തരം കുട്ടികൾക്കുണ്ടാകും. അത്തരത്തിലൊരു കഴിവുമായെത്തി സോഷ്യല് ലോകത്തെ അദ്ഭുതമാകുകയാണ് ഒരു അഞ്ചുവയസ്സുകാരൻ. ചോക്കു കൊണ്ട് തറയിൽ പലതരം ഫോണ്ടുകളെഴുതിയാണ് ഈ മിടുക്കൻ ശ്രദ്ധ നേടുന്നത്. സെബാസ്റ്റ്യൻ എന്ന ഓട്ടിസ്റ്റിക്കായ കുട്ടിയാണ് വളരെ അനായാസം പല ഫോണ്ടുകൾ എഴുതി ആരാധകരെ സ്വന്തമാക്കുന്നത്. വളരെ വേഗതയിലാണ് എഴുത്തെങ്കിലും മനോഹരമായ കയ്യക്ഷരമാണ് സെബാസ്റ്റ്യന്റേത്.
സെബാസ്റ്റ്യന് ഹൈപ്പർലെക്സിയ എന്ന അവസ്ഥയുണ്ട്. ഹൈപ്പർലെക്സിയ എന്നത് അക്ഷരങ്ങളോടോ അക്കങ്ങളോടോയുള്ള അതിശയകരമായ ആകർഷണമാണ്. ഹൈപ്പർലെക്സിയുള്ള കുട്ടികൾ അവരുടെ സമപ്രായക്കാരെക്കാൾ വളരെ കൂടുതൽ വായിക്കുകയും പലപ്പോഴും വളരെ ചെറിയ പ്രായത്തിൽ തന്നെ വായിച്ചു തുടങ്ങുകയും ചെയ്യും. തന്റെ ഈ അവസ്ഥ അവൻ നന്നായി ഉപയോഗിക്കുക തന്നെ ചെയ്തു. ഇൻസ്റ്റാഗ്രാമിൽ പങ്കുവെച്ച ഈ വീഡിയോ വളരെ വേഗമാണ് വൈറലായത്.
വളരെ നിഷ്പ്രയാസം മനോഹരമായാണ് വ്യത്യസ്ത ഫോണ്ടുകളുടെ പേരുകൾ അതാത് ഫോണ്ടുകളിൽ സെബാസ്റ്റ്യന് എഴുതുന്നത്. പതിനെട്ട് മാസമായി താൻ എഴുത്തിലും വായനയിലും ആസക്തിയുള്ളവനായിരുന്നുവെന്ന് സെബാസ്റ്റ്യന്റെ ഇൻസ്റ്റാഗ്രാം ബയോയിൽ പറയുന്നു. സെബാസ്റ്റ്യന് പലതരം ഫോണ്ടുകൾ പരിശീലിക്കുന്ന നിരവധി വീഡിയോകൾ ഇൻസ്റ്റാഗ്രാം പേജിലുണ്ട്. ഈ കുരുന്നിന്റെ കഴിവിന് അഭിന്ദനമറിയിച്ച് നിരവധി കമന്റുകളും ലൈക്കുകളുമാണ് വീഡിയോയ്ക്ക് താഴെ.
