ന്യുഡല്ഹി: ഹഷീന്ബാഗിലെ കെട്ടിടങ്ങള് പൊളിക്കുന്നത് ചോദ്യം ചെയ്ത് സിപിഎം സമര്പ്പിച്ച ഹര്ജി പരിഗണിക്കാന് സുപ്രീം കോടതി വിസമ്മതിച്ചു. നിര്മ്മാണങ്ങള് അനധികൃതമാണെങ്കില് പൊളിക്കുന്നതില് ഇടപെടാനാവില്ല. കയ്യേറ്റങ്ങള് ഒഴിപ്പിക്കാം. എല്ലാ ഒഴിപ്പിക്കലുകളും തടയാനാവില്ല. ഹര്ജിക്കാര്ക്ക് വേണമെങ്കില് ഹൈക്കോടതിയെ സമീപിക്കാം. വിഷയത്തില് ഒരു രാഷ്ട്രീയ പാര്ട്ടി കോടതിയെ സമീപിച്ചതിലും സുപ്രീം കോടതി അതൃപ്തി പ്രകടിപ്പിച്ചു.
ഹര്ജി പിന്വലിച്ച് ഹൈക്കോടതിയെ സമീപിക്കണം. നടപടിയില് മുറിവുണ്ടായ കക്ഷിയാണ് ഹര്ജി നല്കേണ്ടത്. ഉപജീവന മാര്ഗം സംരക്ഷിക്കാനാണ് തങ്ങളിവിടെ ഇരിക്കുന്നത്. അല്ലാതെ ഇത്തരം കാര്യങ്ങള്ക്കല്ലെന്നും ജസ്റ്റീസ് നാഗേശ്വര് റാവു വിമര്ശിച്ചു.
എന്നാല് നടപടിക്ക് രണ്ടു ദിവസത്തേക്ക് എങ്കിലും സ്റ്റേ നല്കണമെന്ന് സിപിഎം ആവശ്യപ്പെട്ടുവെങ്കിലും പരമോന്നത കോടതി അംഗീകരിച്ചില്ല. പിന്വലിച്ചില്ലെങ്കില് ഹര്ജി തള്ളുമെന്ന് കോടതി അറിയിച്ചതിനെ തുടര്ന്ന് സിപിഎം ഹര്ജി പിന്വലിച്ചു.
നിങ്ങള് ഹൈക്കോടതിയില് പോകാതെ നേരെ സുപ്രീം കോടതിയിലേക്ക് വന്നു. ഇതെന്താണ്. ഒരു രാഷ്ട്രീയ പാര്ട്ടി വന്ന് ഞങ്ങളോട് എന്തു ചെയ്യണമെന്ന് ആവശ്യപ്പെടുകയാണോ? അനധികൃതമായി നിര്മ്മിച്ച വീടാണെങ്കില്, അത് പൊളിക്കുന്നതിനെതിരെ എല്ലാവര്ക്കും നേരെ സുപ്രീം കോടതിയിക്കേ് എത്താനുള്ള ലൈസന്സ് നല്കാനാവില്ലെന്നും കോടതി വിമര്ശിച്ചു.
നിയമത്തിന്റെ ലംഘനമുണ്ടെങ്കില് കോടതി ഇടപെടും. എന്നാല് അതില് ഇത്തരം രാഷ്ട്രീയ പാര്ട്ടികളുടെ ഇടപെടല് വേണ്ട. ഇത്തരത്തില് ഹര്ജി നല്കരുത്. ഇന്നത്തെ ദിവസം ഇതിനു വേണ്ടി കളഞ്ഞു. നിയമപ്രകാരമല്ല നടപടികള് നടക്കുന്നതെങ്കില് നിങ്ങള് ഹൈക്കോടതിയെ സമീപിക്കൂവെന്നും സുപ്രീം കോടതി ആവശ്യപ്പെട്ടു.
ഷഹീന്ബാഗിലെ അനധികൃത കെട്ടിടങ്ങള് പൊളിച്ചുനീക്കാന് ഇന്നു രാവിലെയാണ് ദക്ഷിണ ഡല്ഹി മുനിസിപ്പല് കോര്പറേഷന് ബുള്ഡോസറുകളുമായി എത്തിയത്. ജനകീയ പ്രതിഷേധത്തെ തുടര്ന്ന് അധികൃതര്ക്ക് നടപടി താത്ക്കാലികമായി പിന്വലിക്കേണ്ടിവന്നിരുന്നു. പൗരത്വ നിയമത്തിനെതിരെ തലസ്ഥാനത്ത് നടന്ന സമരങ്ങളുടെ കേന്ദ്രമായിരുന്നു ഷഹീന്ബാഗ്.
