ഭുവനേശ്വര്: സമുദായക്കാര് ഊരുവിലക്ക് കല്പ്പിച്ച ഗ്രാമീണന് ഭാര്യയുടെ മൃതദേഹം ദഹിപ്പിക്കേണ്ടി വന്നത് ടയറുകള് കത്തിച്ച്. ഒഡീഷയിലെ ബോലാംഗിര് ജില്ലയിലെ ഗുഡ്ഭേലാ ബ്ളോക്കില് ടാര്സ്ഗുഡ ഗ്രാമത്തില് നിന്നും റിപ്പോര്ട്ട് ചെയ്യപ്പെട്ട സംഭവത്തില് മെഘു ഭോയ് എന്നയാള്ക്കാണ് ഭാര്യ സജന (45) യുടെ മൃതദേഹം വാഹനത്തിന്റെ പഴയ ടയറുകള്ക്ക് മുകളില് വെച്ച് ദഹിപ്പിക്കേണ്ടി വന്നത്.
മകള് അന്യജാതിയില് പെട്ട യുവാവിനെ വിവാഹം കഴിച്ചതിന്റെ പേരില് ഭാര്യയ്ക്ക് വേണ്ടി മരണാനന്തര ചടങ്ങുകള് നടത്താന് പോലും ഗ്രാമീണര് മെഘുവിനെ അനുവദിച്ചില്ല. ഭാര്യയുടെ മൃതദേഹം തനിയെ ചുമക്കേണ്ടിയും വന്നു. അസുഖം ബാധിച്ചതിനെ തുടര്ന്ന് സജന സമീപത്തെ പ്രാദേശിക ആശുപത്രിയില് ചികിത്സയില് ആയിരുന്നു. രണ്ടു വര്ഷം മുമ്പ് മകള് അന്യജാതിക്കാരനെ വിവാഹം കഴിച്ചത് മൂലം ഭ്രഷ്ട് കല്പ്പിച്ചതിനാല് ആരും മെഘുവിനോട് സഹകരിക്കാന് തയ്യാറായില്ല. സജനയുടെ മൃതദേഹം ഒന്നു പിടിക്കാനെങ്കിലും തന്നെ സഹായിക്കണമെന്ന് മെഘു യാചിച്ചിട്ട് പോലും ബന്ധുക്കള് കനിഞ്ഞില്ല. വയറിളക്കത്തെ തുടര്ന്ന് ചൊവ്വാഴ്ചയാണ് മെഘു സജനയെ ഗുഡ്ഭേലാ ആശുപത്രിയില് പ്രവേശിപ്പിച്ചത്.
തുടര്ന്ന് ഏതാനും മരുന്ന് കുറിച്ച് നല്കിയിട്ട് വേഗത്തില് വാങ്ങാന് ആവശ്യപ്പെട്ടു. എന്നാല് മരുന്നു വാങ്ങാന്പോലും മെഘുവിന്റെ കയ്യില് പണമില്ലായിരുന്നു. സഹായം ആവശ്യപ്പെട്ട് ഇയാള് ബന്ധുക്കളുടെ അരികില് എത്തിയെങ്കിലും ആരും ഇയാള്ക്ക് പണം നല്കാന് കൂട്ടാക്കിയില്ല.
ഊരുവിലക്ക് കല്പ്പിച്ചയാളെ ഒരു തരത്തിലും സഹായിക്കാന് കഴിയില്ലെന്നായിരുന്നു ബന്ധുക്കള് പറഞ്ഞത്. ഒടുവില് മെഡിക്കല് ഷോപ്പ് ഉടമ തന്നെ ഇയാളെ സഹായിച്ചു. മരുന്ന് സൗജന്യമായി തന്നെ നല്കി. എന്നാല് മരുന്നുമായി മെഘു എത്തിയപ്പോള് സജന അവസാന ശ്വാസം വലിച്ചിരുന്നു. സംസ്ക്കാര ചടങ്ങിലും ബന്ധുക്കള് പങ്കെടുക്കാതെ വന്നതോടെ മെഘു ഭാര്യയുടെ മൃതദേഹം സ്വയം ചുമന്ന് അഞ്ച് വലിയ ടയറുകളും ചുള്ളിക്കമ്പുകളും ഉണങ്ങിയ ഇലകളുമെല്ലാം വെച്ച് മൃതദേഹം ദഹിപ്പിച്ചു.
