സൂരറൈ പോട്ര് എന്ന ചിത്രത്തിന് ലഭിച്ച ദേശീയ പുരസ്കാരങ്ങളിൽ നന്ദി അറിയിച്ച് സംവിധായിക സുധ കൊങ്കര. അച്ഛന്റെ മരണത്തോടെയാണ് ഈ ചിത്രത്തിലേക്കുള്ള യാത്ര തുടങ്ങിയതെന്നും തന്റെ അച്ഛന്റെ അന്ത്യ നിമിഷങ്ങളാണ് ചിത്രത്തിലെ സൂര്യയുടെ അച്ഛന്റെ മരണനിമിഷങ്ങളായി കാണിച്ചതെന്നും സുധ കൊങ്കര പറയുന്നു.
സുധ കൊങ്കരയുടെ പോസ്റ്റിന്റെ പൂർണരൂപം:
‘‘ഈ സിനിമയുടെ യാത്ര തുടങ്ങിയത് എന്റെ അച്ഛന്റെ മരണത്തോടെയാണ്. മരണശയ്യയിൽ കിടന്നുകൊണ്ട് വാതിലിൽ നിൽക്കുന്ന എന്നോട് അടുത്തേക്ക് വരാൻ ആംഗ്യം കാണിക്കുന്ന അച്ഛന്റെ അന്ത്യനിമിഷത്തെ രൂപമാണ് എന്റെ മനസ്സിൽ അവസാനമായി പതിഞ്ഞത്. സൂരറൈ പോട്ര് എന്ന എന്റെ ചിത്രത്തിലെ ഒരു രംഗമായി ഞാൻ ആ നിമിഷം ഉൾപ്പെടുത്തി.
സിനിമാ പ്രവർത്തകർ എന്ന നിലയിൽ നമ്മളിൽ ഭൂരിഭാഗം പേരും ആത്യന്തികമായി നമ്മുടെ സിനിമകളിൽ നമ്മുടെ ജീവിതത്തിലെ മറക്കാനാകാത്ത നിമിഷങ്ങൾ ചേർത്തുവയ്ക്കാൻ ആഗ്രഹിക്കുന്നവരാണെന്നാണ് എന്റെ വിശ്വാസം. സൂരറൈ പോട്രുവിൽ ഞാൻ ഉൾപ്പെടുത്തിയ നമ്മുടെ ജീവിതത്തിൽ നിന്നുള്ള നിരവധി നിമിഷങ്ങൾക്ക് എന്റെ അച്ഛനോട് നന്ദിപറയുന്നു. ദേശീയ പുരസ്കാരങ്ങൾ നേടിയ ഈ നിമിഷത്തിൽ എന്റെ സന്തോഷം കാണാൻ അച്ഛൻ ഇല്ലല്ലോ എന്നുള്ളതാണ് എന്റെ ദുഃഖം. എന്റെ ഗുരുവിന് നന്ദി. നിങ്ങൾ പഠിപ്പിച്ചതൊന്നുമില്ലെങ്കിൽ ഞാൻ ഒരു വലിയ പൂജ്യമാണ്.
സ്വന്തം ജീവിതകഥ എന്നെ വിശ്വസിച്ചേൽപ്പിച്ച ക്യാപ്റ്റൻ ഗോപിനാഥിനും ആ ജീവിതകഥ അഭ്രപാളികളിൽ അനശ്വരമാക്കിയതിന് സൂര്യയ്ക്കും നന്ദി. സിനിമയുടെ നിർമാതാക്കൾക്കും ചിത്രത്തിന്റെ ഓരോ അണിയറപ്രവർത്തകർക്കും നന്ദി. മഹാകവി ഭാരതിയാരുടെ മഹത്തായ വരികളേക്കാൾ മറ്റൊന്നും ഈ നിമിഷത്തിൽ എനിക്ക് പറയാനില്ല, ‘‘സൂരറൈ പോട്ര്’’
ഏറ്റവും കഷ്ടത നിറഞ്ഞ നിമിഷങ്ങളിൽ എനിക്ക് താങ്ങും തണലുമായി നിന്ന എന്റെ കുടുംബത്തിന് നന്ദി. എന്റെ ജീവിതത്തിന്റെ നങ്കൂരം നിങ്ങളാണ്. എന്റെ എക്കാലത്തെയും പ്രിയ സുഹൃത്തുക്കളായ ജിവി, പൂർണിമ, ഡോ വിജയ് ശങ്കർ എന്നിവർക്ക് നന്ദി. എന്നിൽ വിശ്വസിച്ച് എന്റെ പിന്നിൽ കരിമ്പാറ പോലെ ഉറച്ചു നിന്ന് ഈ യാത്രയിൽ എന്നെ ഒരിക്കലും വീഴാൻ അനുവദിക്കാതെ കൂടെ നിന്ന എന്റെ അസിസ്റ്റന്റ് ഡയറക്ടർമാർക്ക് നന്ദി.
എന്റെ വിശ്വസ്തരായ പോരാളികളായ നിങ്ങളാണ് എന്റെ ഓരോ സിനിമയിലൂടെയും യാത്ര സാധ്യമാക്കുന്നത്. ഞാൻ തളർന്നപ്പോഴും പരാജയപ്പെടുമ്പോഴും വിമർശിച്ചുവെങ്കിലും എന്റെ വിജയങ്ങൾക്ക് ഒപ്പം നിന്ന് പിന്തുണച്ച മാധ്യമ സുഹൃത്തുക്കൾക്കും നന്ദി.
എല്ലാത്തിനുമുപരി എനിക്ക് നന്ദി പറയാനുള്ളത് എന്റെ പ്രിയപ്പെട്ട പ്രേക്ഷകരോടാണ്. ഏകദേശം രണ്ട് വർഷത്തിന് ശേഷം ഒടുവിൽ എന്റെ സിനിമ തിയറ്ററുകളിൽ എത്തിയപ്പോൾ നിങ്ങളുടെ ഓരോ ആഹ്ലാദാരവവും ഓരോ വിസിലടികളും എനിക്കും എന്റെ സിനിമയ്ക്കും പുതുജീവനേകി. നിങ്ങളാണെന്നെ മുന്നോട്ട് നയിക്കുന്ന ശക്തി. നിങ്ങളാണ് എന്റെ ദൈവങ്ങൾ.
ഏറ്റവുമൊടുവിൽ എന്നെപ്പോലെ നല്ല സിനിമകളുടെ പിറവിക്കായി തുടിക്കുന്ന ഓരോ സിനിമാപ്രവർത്തകർക്കും നന്ദി. നിങ്ങൾക്ക് താൽപ്പര്യമുള്ളപ്പോൾ, നിങ്ങൾ ആഗ്രഹിക്കുന്ന രീതിയിൽ, നിങ്ങൾ ഇഷ്ടപ്പെടുന്നവരോടൊപ്പം നിങ്ങൾ ഏറ്റവും ആഗ്രഹിക്കുന്ന തരത്തിൽ സിനിമകൾ ചെയ്യാൻ എല്ലാ വെല്ലുവിളികളും അതിജീവിച്ചാണ് നിങ്ങൾ പോരാടുന്നത്. കലയ്ക്കായി സ്വയം സമർപ്പിക്കാൻ കൊതിക്കുന്ന നിരവധി സ്ത്രീകൾക്ക് ജ്വലിക്കുന്ന വഴികാട്ടികളാണ് നിങ്ങൾ- ഹൃദയം നിറഞ്ഞ നന്ദിയോടെ സുധ കൊങ്കര’’
