ഇസ്ളാമിക് സ്റ്റേറ്റ് തീവ്രവാദികള് ഇറാഖിനും സിറിയയ്ക്കും പിന്നാലെ ഇസ്രായേലിനെ ആക്രമിക്കാന് തയ്യാറെടുക്കുന്ന എന്ന വാര്ത്തകള് വന്നിട്ട് അധികം നാളായില്ല. എന്നാല് ഇസ്രായേലിനെ ഇസ്ളാമിക് സ്റ്റേറ്റ് തീവ്രവാദികളില് നിന്നും രക്ഷിക്കുന്നതിനായി ദൈവം ബൈബിളില് പറഞ്ഞിരിക്കുന്നത് പോലെ കൂറ്റന് മണല്ക്കാറ്റും പെരുമാരിയും കഴിഞ്ഞ ദിവസം സൃഷ്ടിച്ചെന്ന് ഇസ്രായേല്. സിറിയന് അതിര്ത്തി വരെ എത്തിയ ഈ കൊടുങ്കാറ്റ് ഇസ്രായേലിലേക്ക് പ്രവേശിക്കാതെ ഗോലാന് മലനിരകള്ക്ക് സമീപം നിന്നെന്നാണ് റിപ്പോര്ട്ടില് പറയുന്നത്.
അസാധാരണമായ ഈ കാലാവസ്ഥാ വ്യതിയാനത്തിന്റെ വീഡിയോ ദൃശ്യങ്ങള് ഇസ്രായേല് ന്യൂസ് ഓണ്ലൈന് ഫേസ്ബുക്കില് അപ്ലോഡ് ചെയ്തിട്ടുണ്ട്. ഇത് ഇസ്രായേലിനെ ഇസ്ളാമിക് സ്റ്റേറ്റ് തീവ്രവാദികളില് നിന്നും രക്ഷിക്കാന് ദൈവം അയച്ചതാണെന്നും കൊടുങ്കാറ്റ് ദൈവീക ഇടപെടലാണെന്നുമാണ് ഇസ്രായേല് അവകാശപ്പെടുന്നത്. ഡിസംബര് 1 ന് വ്യാഴാഴ്ച രാവിലെ 8 മണിക്കാണ് ഈ കൊടുങ്കാറ്റ് ഉണ്ടായതെന്നും അത് ഇസ്രായേലിനും ഇസ്ളാമിക് സ്റ്റേറ്റ് തീവ്രവാദികള്ക്കും ഒരു മതില് പോലെ നിന്നെന്നും സിറിയന് അതിര്ത്തിയില് ഇസ്രായേലിലേക്ക് പ്രവേശിക്കാതെ ഗിരിശൃംഖത്തില് തന്നെ നിന്നെന്നുമാണ് പറയുന്നത്. ഇസ്രായേലിനെ ഇസ്ളാമിക് സ്റ്റേറ്റ് തീവ്രവാദികള് ആക്രമിച്ച സ്ഥലത്ത് തന്നെയായിരുന്നു ഈ കൂറ്റന് പൊടിക്കാറ്റ് രൂപപ്പെട്ടതെന്നും ഇസ്രായേല് ന്യൂസ് ഓണ്ലൈന് പറയുന്നു.
തികച്ചും വ്യത്യസ്താനുഭവമായിരുന്ന കാറ്റ് ഇസ്രായേലിന്റെ അതിരുകള് ഭേദിക്കാതെ ഇസ്രായേലിനും ഐഎസ്ഐഎസിനും ഇടയില് ഒരു വേലി പോലെ രൂപപ്പെട്ടെന്നും ഓണ്ലൈന് പറഞ്ഞു. വീഡിയോയ്ക്ക് അനുകൂലമായും പ്രതികൂലമായും അനേകം പ്രതികരണങ്ങളാണ് സാമൂഹ്യമാധ്യമങ്ങളില് വന്നത്. ഇസ്രായേലിനെ സംരക്ഷിക്കാനുള്ള ദൈവീക ഇടപെടല് എന്നാണ് ക്രൈസ്തവ വിശ്വാസികള് പ്രതികരിച്ചിരിക്കുന്നത്. എന്നാല് സംഗതി സത്യമാണെങ്കില് ഒരു സാധാരണ കാലാവസ്ഥാ വ്യതിയാനത്തെ ആത്മീയതയുമായി കൂട്ടിക്കുഴയ്ക്കേണ്ട കാര്യമില്ലെന്നു നിരീശ്വരവാദികള് പറഞ്ഞു. അതേസമയം വെറും കാലാവസ്ഥാ വ്യതിയാനം മാത്രമാണെങ്കില് ഇതിനെ ആരാണ് നിയന്ത്രിച്ചതെന്നും എന്തുകൊണ്ട് ഇസ്രായേലിലേക്ക് കടക്കാതെ ഐഎസ്ഐഎസിനും ഇസ്രായേലിനും ഇടയില് തങ്ങി നിന്നെന്നും ഇസ്രായേല് ന്യൂസ് ഓണ്ലൈന് ചോദിക്കുന്നു.
