ഇസ്ളാമാബാദ്: ഇന്ത്യയുമായി ഉണ്ടാക്കിയ യുദ്ധങ്ങള് പാകിസ്താനെ പാപ്പരാക്കിയെന്ന് തുറന്ന് സമ്മതിച്ച് പാകിസ്താന് പ്രധാനമന്ത്രി ഷഹബാസ് ഷെരീഫ്. ഇന്ത്യയോടൊപ്പം ഇനി ഒരുമിച്ച് നില്ക്കുകയും സമാധാനം പുനസ്ഥാപിച്ച് പുരോഗതിയിലേക്ക് മുന്നേറുകയാണ് വേണ്ടതെന്നും പറഞ്ഞു.
ഇന്ത്യയുമായി ഉണ്ടാക്കിയ മൂന്ന് യുദ്ധങ്ങള് പാകിസ്താനെ സാമ്പത്തീക പ്രതിസന്ധിയിലും തൊഴിലില്ലായ്മയിലും പട്ടിണിയിലേക്കുമാണ് നയിച്ചത്. പാകിസ്താനില് എഞ്ചിനീയര്മാരും ഡോക്ടര്മാരും വിദഗ്ദ്ധരായ തൊഴിലാളികളുമുണ്ട്. അവരുടെ മികവ് സമാധാനവും അഭിവൃദ്ധിയും കൊണ്ടുവരാനായി ഉപയോഗിക്കാനാണ് പാകിസ്താന് ആഗ്രഹിക്കുന്നത്. എങ്കില് മാത്രമേ ഇരു രാജ്യങ്ങള്ക്കും പുരോഗതിയിലേക്ക് ഉയരാനാകൂ എന്നും പറഞ്ഞു.
അയല്രാജ്യത്തിനൊപ്പം സമാധാനപരമായി പുരോഗതിയിലേക്ക് പോണോ അതോ തര്ക്കിച്ച് സമയവും സമ്പത്തും കളഞ്ഞുകുളിക്കണോ എന്ന് തീരുമാനം എടുക്കേണ്ട സമയമായിരിക്കുകയാണ്. യുദ്ധം നടത്തി ആര്ക്കും മുമ്പോട്ട് പോകാനാകില്ല. രണ്ടു രാജ്യങ്ങളും അണുവായുധ ശേഖരമുള്ളവരായതിനാല് കടുത്ത ഒരു യുദ്ധമുണ്ടായാല് എന്താണ് സംഭവിച്ചതെന്ന് പറയാന് പോലും ആരും ബാക്കി കാണത്തില്ലെന്ന കാര്യം ഓര്ക്കണമെന്നും പറഞ്ഞു.
അല് അറേബ്യന് ടെലിവിഷന് നല്കിയ അഭിമുഖത്തിലാണ് ഷഹബാസ് ഷെരീഫ് ഇക്കാര്യം പറഞ്ഞത്. പാകിസ്താന് ആഗ്രഹിക്കുന്നത് സമാധാനവും ശാന്തിയുമാണെന്നും കശ്മീരില് ഇപ്പോള് എന്താണ് നടക്കുന്നത് അത് നിര്ത്തണമെന്ന് ഇന്ത്യന് പ്രധാനമന്ത്രിയോട് അഭ്യര്ത്ഥിക്കുന്നതായും പറഞ്ഞു.
പാകിസ്താന്റെ അഹങ്കാരം ശമിപ്പിക്കുമെന്നും അവരെ ലോകത്തിന് മുന്നില് പിച്ചച്ചട്ടി എടുപ്പിക്കുമെന്നും 2019 ലെ തെരഞ്ഞെടുപ്പ് പ്രചരണത്തില് നരേന്ദ്രമോഡി നടത്തിയ പ്രസംഗത്തിന്റെ വീഡിയോ പാക് പ്രതിപക്ഷം കഴിഞ്ഞ ദിവസം പ്രചരിപ്പിച്ചിരുന്നു. എന്നാല് ഈ വീഡിയോ ഇമ്രാന്ഖാന്റെ പാര്ട്ടി പാകിസ്താന് ഭരിച്ച സമയത്തേതായിരുന്നു എന്നോര്ക്കണമെന്ന് പറഞ്ഞായിരുന്നു ഭരണകക്ഷി തിരിച്ചടിച്ചത്.
