തിരുവന്തപുരം: അക്കൗണ്ടില്ലാത്തയാള്ക്ക് അത് എടുത്തു നല്കിയാല് ആളൊന്നിന് 10 രൂപ, സാധാരണ കച്ചവടക്കാരെ ഇ പേമെന്റ് പരിശീലിപ്പിച്ചാല് 100 രൂപ, ചെറുകിട കച്ചവടക്കാരെയും കൈത്തൊഴിലുകാരെയും ഇക്കാര്യമെല്ലാം പഠിപ്പിക്കുന്ന പത്തു പേര്ക്ക് നൂറു രുപ സമ്മാനം. ഒരു നോട്ടു രഹിത ജില്ല സൃഷ്ടിക്കുന്ന സൊസൈറ്റിക്ക് ഒരു ലക്ഷം മുതല് അഞ്ചു ലക്ഷം രൂപ വരെ പാരിതോഷികം.
കറന്സി ലോകത്ത് നിന്നും കാര്ഡ് ലോകത്തേക്ക് ഇന്ത്യയെ പൂര്ണ്ണമായും മാറ്റുന്നതിന്റെ ഭാഗമായി കേന്ദ്ര സര്ക്കാരാണ് സാമ്പത്തിക പാരിതോഷികം പ്രഖ്യാപിച്ചിരിക്കുന്നത്. കഴിഞ്ഞ ദിവസം ഇന്ധനം നിറയ്ക്കലിനുള്ള കാര്ഡ് ഉപയോഗത്തിന് ഇളവ് പ്രഖ്യാപിച്ചതിന് തൊട്ടു പിന്നാലെയാണ് ഗ്രാമീണ മേഖലയില് കാര്ഡ് ഉപയോഗം വ്യാപകമാക്കാനുള്ള പ്രചരണ പരിപാടി സര്ക്കാര് ആരംഭിച്ചിരിക്കുന്നത്. ഇതിനകം കാര്ഡ് ഉപയോഗവുമായി ബന്ധപ്പെട്ട പരസ്യങ്ങളും ടെലിവിഷന് റേഡിയോ പത്ര മാധ്യമങ്ങളിലൂടെ കേന്ദ്ര സര്ക്കാര് ആരംഭിച്ചിരിക്കുകയാണ്.
നോട്ടു രഹിത ഇടപാടില് 40 പേര്ക്ക് പരിശീലനം നല്കുന്ന ഒരു വിഎല്ഇ യ്ക്ക് 200 രൂപ കിട്ടും. സ്മാര്ട്ട്ഫോണ്, സൈ്വപ്പിംഗ് യന്ത്രങ്ങള് എന്നിവ ഉപയോഗിച്ചുള്ള ഇടപാടുകള്, വിവിധ തരം ഇ വാലറ്റുകളുടെ ഉപയോഗം, ആധാര് അധിഷ്ഠിതമായ പണമിടപാടുകള് എന്നിവയില് പരിശീലനം നല്കണം. പൊതു സേവന കേന്ദ്രങ്ങളുടെ ഉടമകളായ ഗ്രാമ തല സംരംഭകരാണ് പരിശീലനം നല്കുന്നത്. രാജ്യത്തെ ഒരു കോടി ജനങ്ങളെയും 25 ലക്ഷം വരുന്ന ചെറുകിട കച്ചവടക്കാരെയും ഓണ്ലൈന് പണമിടപാട് സംബന്ധിച്ച കാര്യങ്ങളില് സാക്ഷരരാക്കുകയാണ് ഉദ്ദേശം. സംഭവത്തിന് മികച്ച പ്രതികരണവും കിട്ടുന്നുണ്ട്. ഇതിനകം ഓണ്ലൈന് ഇടപാട് പഠിക്കാന് 2,41,982 പേരും 10,000 ചെറുകിട വ്യാപാരികളും റജിസ്റ്റര് ചെയ്തിട്ടുണ്ട്. 2,20,000 പേര് ഇതിനകം ഇ പേമെന്റ് സംവിധാനം തുടങ്ങിയിട്ടുണ്ടെന്നാണ് കണക്കുകള്.
കറന്സിയില് നിന്നും കാര്ഡ് ഉപയോഗത്തിലേക്ക് മാറാന് സര്ക്കാര് ജനങ്ങളോട് അഭ്യര്ഥിച്ചെങ്കിലും സാധാരണക്കാര് നിറഞ്ഞ ഗ്രാമീണമേഖലയെ ഈ സംവിധാനത്തിന് കീഴില് എങ്ങിനെ കൊണ്ടുവരാം എന്നതായിരുന്നു നേരിടുന്ന പ്രധാന വെല്ലുവിളി. ഇത് മറികടക്കാനാണ് ഇപ്പോള് വ്യക്തികളെയും ഗ്രൂപ്പുകളെയും തയ്യാറാക്കാന് പാരിതോഷിക പരിപാടിയുമായി എത്തിയിരിക്കുന്നത്. നേരത്തേ പ്രഖ്യാപിച്ച നോട്ട് അസാധുവാക്കല് നടപടി ഏറ്റവും കൂടുതല് ബാധിച്ചിരിക്കുന്നതും ഗ്രാമീണമേഖലയിലെ ഇടത്തരക്കാരെയും കൂലിപ്പണിക്കാരെയുമാണ്.
