കോവിഡ് സാര്സ് വൈറസുകള് ഗര്ഭസ്ഥ ശിശുക്കളെയും ബാധിക്കുമെന്ന് പുതിയ കണ്ടെത്തല്. അമ്മയ്ക്കുണ്ടാകുന്ന കോവിഡ് ബാധ ഭ്രൂണത്തെ ബാധിച്ചശേഷം വളര്ന്നു വരുന്ന ഗര്ഭസ്ഥ ശിശുക്കളില് വൈകല്യങ്ങള് സൃഷ്ടിക്കുന്നു. ഇതിനോടൊപ്പം തന്നെ തലച്ചോറിലെയും മറ്റ് അവയവങ്ങളിലെയും രക്തക്കുഴലുകളില് മുറിവുകളുണ്ടാക്കുമെന്നും പഠനം വെളിപ്പെടുത്തി.
കഴിഞ്ഞ ദിവസം വിയന്ന സര്വ്വകലാശാലയിലെ ഗവേഷകര് കോവിഡ് ബാധിച്ച ഗര്ഭിണികളില് എം.ആര്. ഐ സ്കാനിങ് വഴി നടത്തിയ പഠനമാണ് ഞെട്ടിക്കുന്ന വിവരങ്ങള് പുറത്തുകൊണ്ടുവന്നിരിക്കുന്നത്. 76ല് അധികം ഭ്രൂണങ്ങളാണ് സ്കാനിങ്ങിന് വിധേയമാക്കിയത്. ഭ്രൂണങ്ങളില് ഉണ്ടാകുന്ന ആഘാതം വകഭേദങ്ങള്ക്കനുസരിച്ച് മാറികൊണ്ടിരിക്കും. ഒമിക്രോണിന്റെ ഡെല്റ്റ ഉപവകഭേദം പോലെ കോവിഡ് മഹാമാരിയുടെ തുടക്കത്തില് വ്യാപിച്ച വകഭേദങ്ങളാണ് കൂടുതല് പ്രശ്നക്കാര്.
അമ്മയില് നിന്ന് കുഞ്ഞിലേക്ക് ഓക്സിജനും പോഷകങ്ങളും എത്തിക്കുന്ന പ്ലാസന്റ അന്യ പദാര്ത്ഥങ്ങള് കടക്കുന്നത് പ്രതിരോധിക്കുമെങ്കിലും കോവിഡ് വൈറസുകള് അതിനെയും അതിജീവിച്ചാണ് കുഞ്ഞിനുള്ളിലേക്ക് കടക്കുന്നത്. പ്ലാസന്റയില് കണ്ടെത്തിയ മുറിവുകള് ഗര്ഭസ്ഥ ശിശുവിനെയും ആരോഗ്യത്തെയും പ്രതികൂലമായി ബാധിക്കുമെന്ന് പഠനം വെളിപ്പെടുത്തുന്നു.
