ലണ്ടന് : ലോകകപ്പില് അര്ജന്റീനയുടെ കിരീട നേട്ടത്തില് നിര്ണ്ണായക പങ്കുവഹിച്ച താരത്തെ പൊക്കാന് വന് നീക്കവുമായി ഇംഗ്ളീഷ് പ്രീമിയര്ലീഗ് വമ്പന്മാരായ ചെല്സി. പ്രീമിയര് ലീഗില് വലിയ തിരിച്ചടി നേരിടുന്ന ക്ലബ്ബ് ചുവടുകള് ശക്തമാക്കുന്നതിന്റെ ഭാഗമായിട്ടാണ് നടപടി.
താരത്തെ സ്വന്തമാക്കാന് 120 യൂറോയുടെ കരാറാണ് മുന്നിലേക്ക് നീട്ടിയിരിക്കുന്നത്. 2022 ഒടുവില് അവസാനിച്ച ഖത്തര് ലോകകപ്പിലെ ഏറ്റവും മികച്ച താരത്തില് ഒരാളായ അര്ജന്റീനാ മിഡ്ഫീല്ഡര്ക്കായി ചെല്സി നടത്തുന്ന നീക്കം പ്രീമിയര് ലീഗ് ചരിത്രത്തിലെ വമ്പന് ട്രാന്സ്ഫറുകളില് ഒന്നായിരിക്കും. ഇതിനകം ചെല്സി നോനി മഡ്യൂക്കേ, മിഖൈലേ മുഡ്രീക്ക്, ഡോവിഡ് ഡാട്രോ ഫൊഫാന, ആന്ദ്രേ സാന്റോസ്, മലോ ഗുസ്തോ എന്നിവരെ കരാറിലാക്കിക്കഴിഞ്ഞു. ഇതിനൊപ്പം അത്ലറ്റിക്കോ മാഡ്രിഡില് നിന്നും പോര്ച്ചുഗീസ് യുവതാരമായ ജാവോ ഫെലിക്സിനെ ലോണ് അടിസ്ഥാനത്തില് കൊണ്ടുവരികയും ചെയ്തിട്ടുണ്ട്. ഇപ്പോള് അര്ജന്റീനയുടെ എന്സോ ഫെര്ണാണ്ടസിനായിട്ടാണ് ശ്രമിക്കുന്നത്.
ഖത്തര്ലോകകപ്പിലെ മികച്ച യുവതാരമായി തെരഞ്ഞെടുക്കപ്പെട്ടയാളാണ് എന്സോ. പോര്ച്ചുഗീസ് ക്ലബ്ബ് ബനഫിക്കയുടെ താരമാണ് എന്സോ. അര്ജന്റീനിയന് ക്ലബ്ബ് റിവര് പ്ളേറ്റില് നിന്നും കഴിഞ്ഞ ആഗസ്റ്റിലാണ് എന്സോ ഫെര്ണാണ്ടസ് ബനഫിക്കയില് എത്തിയത്. 10 ദശലക്ഷം പൗണ്ടിന് പോര്ച്ചുഗീസ് ക്ലബ്ബിലെത്തിയ താരം ബെനഫിക്കയ്ക്കായി 29 മത്സരങ്ങളില് കളത്തില് ഇറങ്ങിക്കഴിഞ്ഞു. നാലുഗോളുകളും താരം സ്കോര് ചെയ്തു.
