ന്യൂഡല്ഹി: മുടി മോശമായി വെട്ടിയതിന് മോഡലിന് രണ്ടുകോടി രൂപ നഷ്ട പരിഹാരം നല്കണമെന്ന ഉപഭോക്തൃകോടതിയുടെ വിധി സുപ്രീം കോടതി റദ്ദാക്കി. രണ്ടു കോടി രൂപ നഷ്ടപരിഹാരം വളരെ കൂടുതലാണെന്ന് സുപ്രീം കോടതി വ്യക്തമാക്കി. ആഷ്ണ റോയി എന്ന മോഡലിനാണ് നേരത്തേ ഉപഭോക്തൃ തര്ക്ക പരിഹാര കമ്മീഷന് രണ്ടുകോടി രൂപ നഷ്ടപരിഹാരം നല്കണമെന്ന് വിധിച്ചത്.
നഗരത്തിലെ ഒരു പഞ്ചനക്ഷ്രത്ര ഹോട്ടലിലെ സലൂണിനെതിരേയാണ് ആഷ്ണ റോയി ഉപഭോക്തൃ തര്ക്ക പരിഹാര കമ്മീഷന് മുന്നിലെത്തിയത്. മോഡലിന്റെ പരാതിയില് 2018 ലാണ് സംഭവം നടന്നത്. 4 ഇഞ്ച് വെട്ടാന് ആവശ്യപ്പെട്ടപ്പോള് 4 ഇഞ്ച് നിര്ത്തി ബാക്കി വെട്ടുകയായിരുന്നു.
പ്രമുഖ ബ്രാന്ഡുകളുടെ മോഡലാണ് പരാതിക്കാരി. അതിനാല് മുടി വളരെ പ്രധാനമാണെന്നും അതില് നഷ്ട പരിഹാരം നല്കണമെന്നുമായിരുന്നു എന്സിഡിആര്സിയുടെ വെളിപ്പെടുത്തല്. എന്നാല് നഷ്ട പരിഹാരം നിശ്ചയിക്കുമ്പോള് പരാതിക്കാരുടെ അവകാശവാദത്തിന്റെ മാത്രം അടിസ്ഥാനത്തില് ആകരുതെന്നും വ്യക്തമായ തെളിവുകള് കണക്കിലെടുത്ത ഹാജരാക്കണമെന്നും സുപ്രീംകോടതി ജഡ്ജിമാരായ അനിരുദ്ധ ബോസ്, വിക്രംനാഥ്, എന്നിവരുടെ ബെഞ്ച് വ്യക്തമാക്കി.
മുടിയുടെ നീളം കുറഞ്ഞത് തന്റെ മോഡലിംഗ് കരിയറിനെ ബാധിച്ചെന്നും, അത് തന്നെ വിഷാദ രോഗിയാക്കിയെന്നും ഇവര് വ്യക്തമാക്കി. പ്രശ്ന പരിഹാരത്തിനായി ഹോട്ടലുകാര് നല്കിയ ചികിത്സാ സേവനം ഫലം കണ്ടില്ലെന്നും നമ്പര് വണ് മോഡല് ആകുക എന്ന ലക്ഷ്യം ഇതോടെ പരാജയപ്പെട്ടെന്നും പരാതിയില് മോഡല് വ്യക്തമാക്കി.
