തിരുവനന്തപുരം: കേരളത്തിന്റെ പ്രത്യേക പ്രതിനിധിയായി നിയമിക്കപ്പെട്ട മുന് മന്ത്രി കെ.വി. തോമസിന് ഓണറേറിയം അനുവദിച്ച ഫയലിന്മേല് തീരുമാനമായില്ല. തിടുക്കത്തില് തീരുമാനം വേണ്ടന്ന മന്ത്രിതല നിര്ദേശത്തെത്തുടര്ന്നാണിത്.
ബജറ്റിലെ ഇന്ധന നികുതി, സെസ് നിര്ദേശങ്ങള്ക്കെതിരേ ജനരോഷം ആളിക്കത്തുകയാണ്. അതിനിടെ കെ.വി. തോമസിന് വന് തുക ഓണറേറിയം കൂടി ഉടന് അനുവദിച്ചു നല്കുന്നതു പ്രതിപക്ഷം ആയുധമാക്കുമെന്നു മുന്കൂട്ടി കണ്ടാണ് ധനമന്ത്രാലയം ഫയല് തല്ക്കാലം മടക്കുന്നത്. മുഖ്യമന്ത്രിയുടെ ഓഫീസിന്റെ അഭിപ്രായം തേടിയ ശേഷം ഫയലിന്മേല് അന്തിമ തീരൂമാനം മതിയെന്നു ധനമന്ത്രി അറിയിച്ചിട്ടുണ്ട്.
ഫയലില് അന്തിമ അനുമതിക്കായി ധനമന്ത്രിയുടെ അഭിപ്രായം തേടിയ ഘട്ടത്തിലാണ് ഓണറേറിയം ഉടന് അനുവദിക്കേണ്ടതില്ലെന്ന നിലപാട് ധനമന്ത്രി സ്വീകരിച്ചത്. ഇതോടെ കെ.വി തോമസിന്റെ ഓണറേറിയം ഫയല് ധനകാര്യ എക്സ്പെന്ഡിച്ചര് സെക്രട്ടറി സജ്ഞയ് കൗളിനു കൈമാറി.
ഡല്ഹിയില് കേരളത്തിന്റെ പ്രത്യേക പ്രതിനിധിയായി നിയമതിനായ തോമസ് തനിക്ക് ശമ്പളം വേണ്ടെന്നും പകരം ഓണറേറിയം അനുവദിച്ചാല് മതിയെന്നും കാട്ടി സര്ക്കാരിന് കത്ത് നല്കിയിരുന്നു.
തോമസിന്റെ കത്ത് പൊതുഭരണ വകുപ്പ് തുടര് നടപടിക്കായി ധനകാര്യ വകുപ്പിനു കൈമാറിയിരുന്നു. അതേസമയം ഈ മാസം 25 നുശേഷം ഇതു സംബന്ധിച്ച തീരുമാനം ഉണ്ടാകുമെന്നാണ് സൂചന.
