അഹമ്മദാബാദ്: വികസനത്തിന്റെ മാതൃകയായി ബിജെപിയും കേന്ദ്രസര്ക്കാരും കൊട്ടിഘോഷിക്കുന്ന ഒന്നാണ് ഗുജറാത്ത് മോഡല്. എന്നാല് ഗുജറാത്തിലെ നല്ലൊരുഭാഗം ജനങ്ങള്ക്കും ഇപ്പോഴും മൊബൈല്ഫോണിനെക്കുറിച്ച് പോലും അജ്ഞതയെന്നും സ്ത്രീ പുരോഗമനത്തില് ഗുജറാത്ത് ഏറെ പിന്നിലാണെന്നുമാണ് റിപ്പോര്ട്ട്.
ഖേഡ എംപിയും കേന്ദ്ര ടെലികോം സഹമന്ത്രിയുമായ ദേവുസിംഗ് ചൗഹാന് ലോക്സഭയ്ക്ക് മുന്നില് വെച്ച റിപ്പോര്ട്ടില് ഗുജറാത്തിലെ 51 ശതമാനം സ്ത്രീകള്ക്കും മൊബൈല് ഫോണില്ലെന്ന് വ്യക്തമാക്കി. സംസ്ഥാനത്തെ 18452 ഗ്രാമങ്ങളില് 567 എണ്ണത്തില് ഇപ്പോഴും മൊബൈല് കണക്ടിവിറ്റി പോലുമില്ലെന്നും രാജ്യം 5 ജിയിലേക്ക് കുതിച്ചുകൊണ്ടിരിക്കുമ്പോള് 800 ഗ്രാമങ്ങളില് ഇപ്പോഴും 4 ജി പോലും എത്തിയിട്ടില്ലെന്നും റിപ്പോര്ട്ടില് പറയുന്നു.
വികസനം നടക്കാത്ത പ്രധാന ഏരിയ ഗിരിവര്ഗ്ഗ മേഖലയാണ്. ഗോത്രവര്ഗ്ഗക്കാര്ക്ക് ഭൂരിപക്ഷമുള്ള ജില്ലകളില് ഏകദേശം 90 ഗ്രാമങ്ങളില് ഇപ്പോഴും മൊബൈല് കണക്ടിവിറ്റി ഇല്ല. കച്ച്, നര്മ്മദ ജില്ലകളില് യഥാക്രമം 84,64 ഗ്രാമങ്ങളില് മൊബൈല് സേവനങ്ങള് എത്തിയിട്ടില്ല. ഡിജിറ്റല് ഇന്ത്യയ്ക്ക് കീഴില് ഒരു മൊബൈല്ഫോണ് പോലുമില്ലാത്ത ഗ്രാമം എന്നത് ഏറെ വിചിത്രമായ കാര്യമാണ്. ഇവിടെ സ്വകാര്യ കമ്പനികളുടെ പോലും ടവറുകള് ഇല്ല.
താഴ്ന്നവരുമാനക്കാര് താമസിക്കുന്ന ഇവിടേയ്ക്ക് സര്ക്കാരിന്റെ സ്വന്തം മൊബൈല് കമ്പനിയും എത്തിയിട്ടില്ല. 2019-21 ലെ കുടുംബാരോഗ്യ റിപ്പോര്ട്ട് പ്രകാരം 15-49 പ്രായക്കാര്ക്കിടയില് ഗുജറാത്തില് വെറും 48.80 ശതമാനം പേര്ക്കേ സ്വന്തമായി മൊബൈലുള്ളൂ. ഗുജറാത്തില് നില നില്ക്കുന്ന ഏറ്റവും വലിയ ലിംഗപരമായ അസമത്വത്തെയാണ് ഇത് സൂചിപ്പിക്കുന്നതെന്നാണ് വിമര്ശനം. ആധുനിക സാങ്കേതിക വിദ്യയും അതുവഴി ഉണ്ടാകാവുന്ന വരുമാനങ്ങളും സ്ത്രീകള്ക്ക് നിഷേധിക്കുകയാണ് ഇതിലൂടെ ചെയ്യുന്നതെന്നാണ് ഉയര്ന്നിരിക്കുന്ന വിമര്ശനം.
