കണ്ണൂര്: ഭാര്യ അമല ഉന്നയിച്ച ഗുരുതര ആരോപണങ്ങള്ക്കു മറുപടിയുമായി കരിപ്പൂര് സ്വര്ണക്കടത്തു കേസിലെ പ്രതി അര്ജുന് ആയങ്കി. ഫെയ്സ്ബുക്ക് പോസ്റ്റിലാണ് അര്ജുന് ആയങ്കി വിശദീകരണം നല്കിയത്.
''അവളുടെ അമ്മ പറഞ്ഞതു ബാധ കൂടിയതാണ്, മുമ്പും ഇതുപോലെ ഉണ്ടായിട്ടു പൂജ ചെയ്ത് മാറ്റിയതാണ് എന്നൊക്കെയാണ്. എനിക്കതിലൊന്നും വിശ്വാസമില്ലാത്തതിനാല് കണ്ണൂരില് ഡോക്ടറെ കാണിച്ചുകൊണ്ടിരുന്നതാണ്. അവളുടെ നന്മയാണ് നിങ്ങള് ആഗ്രഹിക്കുന്നതെങ്കില് അതിനുവേണ്ടി സഹായിക്ക്.
അതല്ല എനിക്കെതിരേ കിട്ടിയ ഒരായുധമായിട്ടാണ് ഇതിനെ കാണുന്നതെങ്കില് നിങ്ങളത് ആഘോഷിക്ക്. ആരാന്റമ്മയ്ക്കു ഭ്രാന്തായാല് കാണാന് നല്ല ചേലാണ്''-ആയങ്കി കുറിച്ചു.
തന്റെ ജീവിതത്തില് ചെയ്ത ഏറ്റവും വലിയ അബദ്ധം പ്രേമിക്കാതെ ഒരുവളെ കല്യാണം കഴിച്ചു എന്നതാണെന്നു ഫെയ്സ്ബുക്കില് ആയങ്കി ഇട്ട പോസ്റ്റിനു മറുപടിയെന്ന നിലയിലായിരുന്നു ഭാര്യ അമല കഴിഞ്ഞ ദിവസം ഫെയ്സ്ബുക്ക് െലെവിലെത്തി ഗുരുതര ആരോപണങ്ങള് ഉന്നയിച്ചത്.
അര്ജുന് ആയങ്കിയും സുഹൃത്തുക്കളും കുടുംബവും ചേര്ന്നു തന്നെ പീഡിപ്പിക്കുകയാണെന്നും തനിക്ക് എന്തെങ്കിലും സംഭവിച്ചാല് അതിനു കാരണം അര്ജുന്റെ കുടുംബത്തിനായിരിക്കുമെന്നും അമല ആരോപിച്ചിരുന്നു.
