ന്യൂഡല്ഹി: നോട്ട് അസാധുവാക്കലുമായി ബന്ധപ്പെട്ട ദുരിതത്തിന്റെ യഥാര്ത്ഥ പ്രതിരൂപം എന്ന നിലയില് കരയുന്ന ഒരു വിമുക്തഭടന്റെ ചിത്രം വൈറലാകുന്നു. ഗുര്ഗോണിലെ ഒരു കൊച്ചുമുറിയില് തനിയെ കഴിയുന്ന നന്ദലാല് എന്ന 78 കാരന്റെ ചിത്രമാണ് സാമ്പത്തിക നിയന്ത്രണത്തിന്റെ ഇന്ത്യന് മുഖമായി മാറുന്നത്. ഒരിക്കല് സ്വന്തമായിരുന്ന വീട്ടില് നിന്നും ഇപ്പോള് 100 ചതുരശ്ര അടി മാത്രമുള്ള മുറിയിലാണ് ഇയാളുടെ ജീവിതം.
പതിനഞ്ച് വര്ഷം മുമ്പ് വിവാഹം ചെയ്തയച്ച ദത്തുപുത്രി വല്ലപ്പോഴും വന്നു കാണും. ജീവിതത്തില് സ്വന്തമെന്ന് പറയാന് മറ്റാരുമില്ല. മകളുടെ വിവാഹത്തിന് വേണ്ടിയാണ് ഇയാള് വീട് വിറ്റത്. ഫരീദാബാദിലേക്ക് അവര് പോയതിന് ശേഷം തനിച്ചാണ് താമസം. ഗുര്ഗോണ് സെക്ടര് 6 ലെ ഭീം നഗറിലെ വാടകവീട്ടിലാണ് നന്ദലാല് താമസിക്കുന്നത്. ഒരു ചെറിയ കിടക്ക, ഒരു പെട്ടി, ഒരു പ്ളാസ്റ്റിക് കസേര, ഒരു ബക്കറ്റ്, ഒരു ആഷ്ട്രേ, ഒരു വാട്ടര്ബോട്ടില്, ദൈവങ്ങളുടെ രണ്ടു ഛായാചിത്രങ്ങള് ഇത്രയുമാണ് മുറിയിലുള്ളത്.
പഞ്ചാബിലും ജമ്മുവിലും കശ്മീരിലും അതിര്ത്തി കാത്തതിന്റെ പേരില് സര്ക്കാര് നല്കുന്ന പെന്ഷന് വാങ്ങാന് സ്റ്റേറ്റ് ബാങ്കിന്റെ ഗുര്ഗോണ് ബാങ്കില് അക്കൗണ്ടും പേരിലുണ്ട്. എസ്ബിഐ യുടെ ഗുര്ഗോണിലെ ന്യൂ കോളനി ബ്രാഞ്ചിലെ ആള്ക്കൂട്ടത്തിനിയില്. വിഷണ്ണനായി കണ്ണു നിറഞ്ഞു നില്ക്കുന്ന നന്ദലാലിന്റെ മുഖം ഇപ്പോള് സാമ്പത്തിക നിയന്ത്രണത്തില് ബുദ്ധിമുട്ടുന്ന സാധാരണക്കാരന്റെ മുഖമായി മാറിയിരിക്കുകയാണ്്. പെന്ഷന് വാങ്ങാന് ബാങ്കിന് മുന്നില് മൂന്ന് ദിവസം നില്ക്കേണ്ടി വന്നതിന്റെ മുഴുവന് വിഷണ്ണതയും ഇദ്ദേഹത്തിന്റെ മുഖത്തുണ്ട്.
ബാങ്കിന് മുന്നിലെ ക്യൂവില് നിന്നുകൊണ്ട് കരയുന്ന നന്ദലാലിന്റെ ചിത്രം ബുധനാഴ്ച ഹിന്ദുസ്ഥാന് ടൈംസ് ദിനപ്പത്രമാണ് പുറത്തുവിട്ടത്. 500,1000 നോട്ടുകള് പിന്വലിച്ച നരേന്ദ്രമോഡി സര്ക്കാരിന്റെ നടപടിയില് ജനം നരകിക്കുന്നു എന്ന ആശയത്തില് ചിത്രം പിന്നീട് സോഷ്യല് മീഡിയ ഏറ്റെടുക്കുകയായിരുന്നു. എന്താണ് അവര് തന്റെ പണം തനിക്ക് തരാത്തത് എന്ന നന്ദലാലിന്റെ ചോദ്യം ബാങ്കുകള്ക്കും എടിഎമ്മുകള്ക്കും മുന്നില് ക്യൂ നില്ക്കുന്ന ദശലക്ഷക്കണക്കിന് ആള്ക്കാരുടേതായി മാറുകയും ചെയ്യുന്നതായിട്ടാണ് വിലയിരുത്തല്. അതേസമയം ഏറ്റവും ഒടുവില് ക്യൂ നില്ക്കുന്നവരുടെ തന്നെ കാരുണ്യം വൃദ്ധന് തുണയാകുകയായിരുന്നു. എല്ലാവരും അദ്ദേഹത്തെ കയറ്റിവിടാന് തയ്യാറായി.
വീട്ടു ജോലിക്കെത്തുന്നയാള്ക്കും പച്ചക്കറി കടക്കാരനും പാലുകാരനുമെല്ലാം ഡിസംബര് ആദ്യ ആഴ്ച കിട്ടുന്ന 8000 രൂപ പെന്ഷന് കൊടുത്തു തീര്ക്കേണ്ടതുണ്ട്. എന്നാല് ആകെ കിട്ടിയത് 1000 രൂപയാണെന്നും ഇയാള് പറയുന്നു. വിഭജന കാലത്ത് പാകിസ്താനില് നിന്നും ഗൂര്ഗോണില് എത്തിയ നന്ദലാലിന്റെ ഭാര്യ മൂന്ന് ദശകം മുമ്പ് വേര്പിരിഞ്ഞു പോയി. ഇതിന് ശേഷം ഇദ്ദേഹം ഒരു പെണ്കുഞ്ഞിനെ ദത്തെടുത്തു. ഇപ്പോള് അവര് മാത്രമാണ് ആശ്രയം. ഇടയ്ക്കിടെ അവര് പിതാവിന് പണം അയച്ചു കൊടുക്കും. വീടിനും അടുത്ത ചായക്കടയിലുമായാണ് ദിവസം ചെലവഴിക്കുന്നത്.
കടപ്പാട്: ഹിന്ദുസ്ഥാന് ടൈംസ്
