ന്യൂഡല്ഹി: കോണ്ഗ്രസ് നേതാവും ഇന്ത്യയുടെ ആദ്യ ഗവര്ണര് ജനറലുമായിരുന്ന സി രാജഗോപാലാചാരിയുടെ കൊച്ചുമകന് സി.ആര്. കേശവന് കോണ്ഗ്രസ് പാര്ട്ടി വിട്ടു. വ്യാഴാഴ്ച രാവിലെ കോണ്ഗ്രസ് അദ്ധ്യക്ഷന് മല്ലികാര്ജ്ജുനെ ഖാര്ഗേയുടെ പേരില് തന്റെ രാജിക്കത്ത് സാമൂഹ്യമാധ്യമത്തില് ഇടുകയായിരുന്നു.
എന്തുകൊണ്ടാണ് താന് പാര്ട്ടി വിടുന്നതെന്ന് ഇതില് കേശവന് എണ്ണിയെണ്ണി പറഞ്ഞിട്ടുണ്ട്. തനിക്ക് ഈ പാര്ട്ടിയെ തിരിച്ചറിയാനാകുന്നില്ലെന്നും അതുകൊണ്ടാണ് ദേശീതലത്തില് സംഘടനാ ഉത്തരവാദിത്വത്തില് നിന്നും പിന്തിരികയുകയും ഭാരത് ജോഡോ യാത്രയി നിന്നും വിട്ടു നിന്നതെന്നും പറയുന്നു. കഴിഞ്ഞ രണ്ടു ദശകമായി സമര്പ്പിതമായി പാര്ട്ടിയില് പ്രവര്ത്തിച്ചിട്ടും തനിക്ക് മൂല്യങ്ങളുടെ അവശിഷ്ടം പോലും കാണാനാകുന്നില്ലെന്ന് വേദനയോടെ പറയുന്നതായും കത്തില് പറഞ്ഞിട്ടുണ്ട്.
നിലവില് പാര്ട്ടിയുടെ ദൃഷ്ടാന്തങ്ങള്, നിലപാട്, പ്രചാരണം എന്നിവയോട് ഐക്യപ്പെട്ടുപോകാന് കഴിയുമെന്ന് മനസ്സാക്ഷിക്കുത്തലോടെ അല്ലാതെ പറയാനാകില്ല. ഇനി പുതിയ പാത കണ്ടുപിടിക്കേണ്ട സമയാമായി. അതുകൊണ്ടാണ് പ്രാഥമികാംഗത്വത്തില് നിന്നു തന്നെ രാജി വെയ്ക്കുന്നത്. ഇതുകൊണ്ട് താന് മറ്റൊരു പാര്ട്ടിയിലേക്ക് പോകുകയാണെന്ന ഊഹാപോഹം ഉയര്ന്നേക്കാന് സാധ്യതയുണ്ട്. എന്നാല് അതില് ആരോടെങ്കിലും മറുപടി പറയേണ്ട കാര്യം തനിക്കില്ല. അടുത്ത നടപടി എന്താണെന്ന് അറിയില്ലെന്നതാണ് വാസ്തവമെന്നും പറയുന്നു.
സി.ആര്. കേശവന് ഇന്ത്യന് നാഷണല് കോണ്ഗ്രസില് നിന്നുള്ള തന്റെ രാജിക്കാര്യം പ്രമുഖ തമിഴ്പത്രങ്ങള്ക്കെല്ലാം അയച്ചിട്ടുണ്ട്. വിശ്വസ്തതയോടെ തന്നില് പാര്ട്ടിയുടെയും സര്ക്കാരിന്റെയും ചുമതലകള് ഏല്പ്പിച്ച സോണിയാഗാന്ധിയോട് നന്ദി പറയുന്നതായും കത്തില് പറഞ്ഞിട്ടുണ്ട്. 2001 ലായിരുന്നു കേശവന് കോണ്ഗ്രസ് പാര്ട്ടിയില് ചേര്ന്നത്.
