കുഞ്ഞുങ്ങള് ജീവിതത്തിലേക്ക് വന്നു കഴിഞ്ഞാല് പിന്നെ സംഗതി കളറാകും അതുകൊണ്ടു തന്നെ കൂടുതല് കുട്ടികള് ഉണ്ടാകുന്നതിനായി ദമ്പതികളെ പ്രോത്സാഹിപ്പിക്കുന്നതിനുള്ള വിവിധ പദ്ധതികള് ആസൂത്രണം ചെയ്യുകയാണ് സിംഗപ്പൂര് സര്ക്കാര്. എന്നാല് ഇവിടെ ജനനനിരക്ക് ക്രമാതീതമായി കുറവാണ്. ഇവര് നേരിടുന്ന ഏറ്റവും വലിയ വെല്ലുവിളിയും അതുതന്നെയാണ്.
ഇത് പരിഹരിക്കുന്നതിന്റെ ഭാഗമായി ഇവിടുത്തെ സര്ക്കാര് പിതൃത്വ അവധി (paternity leave) ദിനങ്ങള് വര്ദ്ധിപ്പിക്കാനുള്ള തീരുമാനത്തിലെത്തിയിരിക്കുകയാണ് . ഒരു കുഞ്ഞിന്റെ വരവില് അമ്മയോടൊപ്പം തന്നെ അച്ഛനും കൂടുതല് സമയം ചെലവഴിക്കുന്നതുകൊണ്ടാണ് ഇത്തരത്തില് ഒരു നടപടി ആസൂത്രണം ചെയ്തിരിക്കുന്നത്.
അമ്മയാകുന്ന സ്ത്രീകള്ക്ക് ഈ നടപടി വലിയ സഹായം ആകുമെന്നാണ് സര്ക്കാര് പറയുന്നത്. 2024 ജനുവരി ഒന്നു മുതല് ഈ പരിഷ്കാരം നടപ്പിലാക്കാനുള്ള തീരുമാനത്തിലാണ് സര്ക്കാര്.
തങ്ങളുടെ കരിയറില് മാത്രം ശ്രദ്ധ കേന്ദ്രീകരിക്കുന്ന അവസ്ഥ മാറി പുരുഷന്മാര് തങ്ങളുടെ കുടുംബാംഗങ്ങള്ക്ക് വേണ്ടി സമയം ചെലവഴിച്ചെങ്കില് മാത്രമേ ഇപ്പോള് അഭിമുഖീകരിക്കുന്ന പ്രശ്നത്തിന് ചെറിയൊരു പരിഹാരമെങ്കിലും രാജ്യത്ത് കണ്ടെത്താന് സാധിക്കുകയുള്ളൂ എന്നാണ് സര്ക്കാര് കരുതുന്നത്.
അതിനാല് തന്നെ അച്ഛനാകാന് പോകുന്ന എല്ലാ പുരുഷന്മാരും നാലാഴ്ചത്തെ പിതൃത്വ അവധി 2024 ജനുവരി മുതല് നിര്ബന്ധമായും എടുക്കണമെന്ന് പ്രധാനമന്ത്രിയുടെ നിര്ദ്ദേശിച്ചു. ഇതിനു പുറമെ ജനിക്കാന് പോകുന്ന എല്ലാ കുട്ടികള്ക്കും 'ബേബി ബോണസ് ' എന്ന പേരില് സാമ്പത്തിക ആനുകൂല്യം നല്കാനും സര്ക്കാര് തീരുമാനിച്ചിട്ടുണ്ട്.
