കൊച്ചി :ഒരുമിനിറ്റ് വൈകിയെത്തിയതിന് ഹോസ്റ്റലില് കയറ്റാതെ പുറത്തുനിര്ത്തിയ ബിരുദ വിദ്യാര്ഥിനിയെ തെരുവുനായ ആക്രമിച്ചു. എറണാകുളം തേവര സേക്രഡ് ഹാര്ട്ട് കോളജിലെ വിദ്യാര്ഥിനിക്കാണ് പരിക്കേറ്റത്. വ്യാഴാഴ്ച രാത്രി വനിതകളുടെ പ്രതിഭ ഹോസ്റ്റലിന് മുന്നിലാണ് സംഭവം. എസ്എഫ്ഐ പ്രവര്ത്തകരുടെ പ്രതിഷേധത്തിനൊടുവില് ഹോസ്റ്റല് വാര്ഡനെ സസ്പെന്ഡ് ചെയ്തു.
വൈകീട്ട് 6.30നകം ഹോസ്റ്റലില് കയറണമെന്നാണ് നിബന്ധന. എന്നാല്, കെമിസ്ട്രി ഡിപാര്ട്മെന്റിലെ ഫെസ്റ്റ് കഴിഞ്ഞ് വരുമ്പോള് ഒരു മിനിറ്റ് വൈകി 6.31നാണ് തങ്ങള് ഹോസ്റ്റലില് എത്തിയതെന്നും വാര്ഡന് പ്രവേശിക്കാന് സമ്മതിച്ചില്ലെന്നും വിദ്യാര്ഥിനികള് പറഞ്ഞു. തുടര്ന്ന് പുറത്തെ വരാന്തയില് ഇരുന്ന വിദ്യാര്ഥിനികളില് ഒരാളെ തെരുവുനായ ആക്രമിക്കുകയായിരുന്നു. പരിക്കേറ്റ വിദ്യാര്ഥിനിയെ ആശുപത്രിയിലെത്തിക്കാന് പോലും ഹോസ്റ്റല് ജീവനക്കാര് തയ്യാറായില്ല. തുടര്ന്ന് നാട്ടുകാരും സഹപാഠികളും ചേര്ന്നാണ് ആശുപത്രിയില് എത്തിച്ചത്.
