ലഖ്നൗ: മൊബൈല് ഫോണ് വാങ്ങാത്ത യുവാവിന് ഇഎംഐയിലൂടെ നഷ്ടമയാത് 7,620 രൂപ. ഉത്തര്പ്രദേശിലെ ലഖ്നൗവിലാണ് സംഭവം. രാകേഷ് കുമാര് റാവത്ത് എന്നയാര്ക്കാണ് തട്ടിപ്പിനെ തുടര്ന്ന് പണം നഷ്ടമായത്.
രാകേഷിന്റെ ബാങ്ക് അക്കൗണ്ടില് നിന്ന് 7,620 രൂപ ഡെബിറ്റ് ചെയ്തതിന്റെ മെസ്സേജ് വന്നപ്പോഴാണ് തട്ടിപ്പ് അറിയുന്നത്. സംഭവത്തെ തുടര്ന്ന് രാകേഷ് ബാങ്കിനെ സമീപിച്ചപ്പോള് മൊബൈല് ഫോണ് ഇഎംഐ ആയാണ് പൈസ പിടിച്ചിരിക്കുന്നത് എന്ന് ജീവനക്കാര് അറിയിച്ചു.
തട്ടിപ്പ് മനസിലാക്കിയ രാകേഷ് പോലീസിനെ സമീപിച്ചെങ്കിലും നടപടിയൊന്നും ഉണ്ടായില്ല. തുടര്ന്ന് പരാതിയുമായി കോടതിയെ സമീപിക്കുകയും കോടതി നിര്ദ്ദേശം അനുസരിച്ച് പോലീസ് എഫ്ഐആര് രജിസ്റ്റര് ചെയ്യുകയും ആയിരുന്നു.
തുടരന്വേഷണത്തിന്റെ ഭാഗമായി കടക്കാരനെ സമീപിച്ചപ്പോള് അയാള് തന്നെ ഭീഷണിപ്പെടുത്തുകയാണ് ചെയ്തത് എന്ന് രാകേഷ് പറഞ്ഞു. കടക്കാരനും കൂട്ടാളികളും കയ്യേറ്റം ചെയ്യുകയും ഭീഷണിപ്പെടുത്തുകയും ചെയ്തു. ആളുകളുടെ സമ്മതം ഇല്ലാതെ അവരുടെ ബാങ്ക് വിവരങ്ങള് വെച്ച് മൊബൈല് ഫോണുകള്ക്ക് താന് പണം നല്കാറുണ്ടെന്നും തനിക്ക് നിയമത്തെ പേടിയില്ലെന്നും കടക്കാരന് പറഞ്ഞതായി രാകേഷ് വ്യക്തമാക്കി.
രാകേഷിന്റെ വ്യാജ തിരിച്ചറിയല് കാര്ഡ്, ബാക്ക് അക്കൗണ്ട് വിവരങ്ങള് എന്നിവ വച്ചാണ് ലോണിന് അപ്ലൈ ചെയ്തിരിക്കുന്നത്. പരാതിയില് എഫ്ഐആര് രജിസ്റ്റര് ചെയ്ത് അന്വേഷണം ആരംഭിച്ചിട്ടുണ്ടെന്നു മഹാനഗര് എസ്എച്ച്ഒ വ്യക്തമാക്കി.
