ലണ്ടന് : പഞ്ചാബ് നാഷണല് ബാങ്കില് നിന്നും കോടികള് തട്ടി മുങ്ങിയ മുന് കോടീശ്വരനും രത്നവ്യാപാരിയുമായ നീരവ് മോഡി ബ്രിട്ടനില് പിഴയടയ്ക്കാന് പണം കടം വാങ്ങുന്നു. ബ്രിട്ടനില് നിന്നും ഇന്ത്യന് സര്ക്കാരിന് കൈമാറുന്നതിനെതിരേ മോഡി സമര്പ്പിച്ച അപ്പീല് ബ്രിട്ടീഷ് കോടതി തള്ളുകയും 150,247 പൗണ്ട് (ഏകദേശം 146 ലക്ഷം) പിഴ അടയ്ക്കാന് വിധിക്കുകയും ചെയ്തിരുന്നു.
പുറത്താക്കല് കാത്തു ലണ്ടനിലെ എച്ച്എംപി വാണ്ടസ്വര്ത്ത് ജയിലില് കഴിയുന്ന 51 കാരനായ നീരവ് മോഡി പിഴപണം അടയ്ക്കാത്തതിനെ തുടര്ന്ന് വ്യാഴാഴ്ച കിഴക്കന് ലണ്ടനിലെ ബര്ക്കിംഗ്സൈഡ് മജിസ്ട്രേറ്റ് കോടതിയില് വീഡിയോ വഴി പ്രത്യക്ഷപ്പെട്ടിരുന്നു. താന് ജയിലില് ആണെന്നും കേസില് ഒരു അഭിഭാഷകനെ വെയ്ക്കാന് പോലും പണമില്ലെന്നും മോഡി പറഞ്ഞു. പിഴ താന് മാസം 10,000 പൗണ്ട് (ഏകദേശം 9.7 ലക്ഷം )വെച്ച് അടച്ചു തീര്ത്തുകൊള്ളാമെന്നും കോടതിയില് പറഞ്ഞു.
തന്നെ ഇന്ത്യയ്ക്ക് കൈമാറുന്നതിനെ എതിര്ത്ത് സമര്പ്പിച്ച ഹര്ജി തള്ളിയതും വന്തുക മോഡിയ്ക്ക് പിഴ വിധിച്ചതും ജനുവരി 9 നായിരുന്നു. 28 ദിവസത്തിനുള്ളില് പണം അടയ്ക്കണമെന്നുമായിരുന്നു അന്ന് കോടതി ഉത്തരവിട്ടത്. എന്നാല് ഇതുവരെ മോഡി ഒരു പൈസയും അടച്ചിട്ടില്ല. എന്താണ് പിഴ അടയ്ക്കാത്തത് എന്ന് ചോദിച്ചപ്പോള് തന്റെ സ്വത്തുകള് മരവിപ്പിച്ചിരിക്കുന്നതിനാല് നിയമനടപടികള് ചെയ്യാന് പോലും കയ്യില് പണമില്ലെന്നായിരുന്നു നീരവ് മോഡിയുടെ മറുപടി. പകരം ജയിലില് കിടന്നോളാമോ എന്നാണോ ഉദ്ദേശിക്കുന്നത് എന്ന് ചോദിച്ചപ്പോള് അതേ എന്ന് മോഡി മറുപടിയും നല്കി.
ഇന്ത്യയില് നല്കിയിരിക്കുന്ന വിലാസവും ജനനത്തീയതിയും കൃത്യമായി പറയാനും കോടതി ആവശ്യപ്പെട്ടു. യുകെയിലെ വിലാസം ചോദിച്ചപ്പോള് ഇല്ലെന്നായിരുന്നു മറുപടി. 30 വര്ഷമായി ജോലി ചെയ്യുകയും ജീവിക്കുകയും ചെയ്തിരുന്ന ഇന്ത്യയിലാണ് തന്റെ സ്വത്തിന്റെ ഭൂരിഭാഗവും. വ്യാജ ആരോപണം ഉന്നയിച്ച് ഇന്ത്യന് സര്ക്കാര് അത് മരവിപ്പിച്ചിരിക്കുകയാണെന്നായിരുന്നും പറഞ്ഞു.
10,000 പൗണ്ട് എവിടെ നിന്നും കിട്ടും എന്ന് ചോദിച്ചപ്പോള് കഴിഞ്ഞ രണ്ടു വര്ഷമായി താന് കടംവാങ്ങിയാണ് ജീവിക്കുന്നതെന്നും നാലുവര്ഷമായി ജയിലില് കഴിയുന്ന തന്റെ സ്വത്ത് ആദ്യ രണ്ടു വര്ഷം കൊണ്ടു തന്നെ തീര്ന്നെന്നും തുടര്ന്ന് കടം മേടിക്കേണ്ടി വന്നിരിക്കുകയാണെന്നും പറഞ്ഞു. എന്തിനാണ് ജയിലില് കിടക്കുന്നത് എന്ന ചോദ്യത്തിന് നാടുകടത്തല് കുറ്റത്തിനാണെന്നും മറുപടി പറഞ്ഞു. ഇന്ത്യയിലേക്ക് തിരിച്ചുപോയി സ്വന്തം നിരപരാധിത്വം തെളിയിക്കാന് പാടില്ലേ എന്ന ചോദ്യത്തിന് ഇന്ത്യയില് സംശുദ്ധമായ വിചാരണ തനിക്ക് കിട്ടില്ലെന്നായിരുന്നു മോഡിയുടെ മറുപടി. ഈ വര്ഷം ജയിലില് നിന്നും ഇറങ്ങുമോ എന്ന് ചോദിച്ചപ്പോള് അതും അറിയില്ലെന്നായിരുന്നു മറുപടി.
തുടര്ന്ന് കോടതി മാസം 10,000 പൗണ്ട് വെച്ച് ആറു മാസം നല്കാനും അതിന് ശേഷം വിചാരണ നേരിടാനും ആവശ്യപ്പെട്ടു. ഇന്ത്യയ്ക്ക് കൈമാറുന്നതിനെതിരേ നീരവ്മോഡി സമര്പ്പിച്ച ഹര്ജി എല്ലാ കോടതികളും തള്ളിയിരുന്നു. എന്നിരുന്നാലും നീരവ്മോഡി ഇതുവരെ ബ്രിട്ടന് വിട്ടു പോയിട്ടില്ല. ബാങ്ക് ചരിത്രത്തിലെ ഏറ്റവും വലിയ തട്ടിപ്പ് പഞ്ചാബ് നാഷണല് ബാങ്കില് നടത്തി മുങ്ങിയയാളാണ് നീരവ് മോഡി. 2019 മാര്ച്ചില് ഇദ്ദേഹത്തെ ലണ്ടന് പോലീസ് അറസ്റ്റ് ചെയ്തിരുന്നു.
