ആലപ്പുഴ: എടത്വ കൃഷി ഓഫിസര് കള്ളനോട്ട് കേസില് കുടുങ്ങിയ സംഭവത്തില് ജിഷമോള്ക്ക് കള്ളനോട്ട് നല്കിയെന്നു കരുതുന്ന കളരിയാശാന് പിടിയിലായതായി സൂചന. ഇയാള്ക്ക് രാജ്യാന്തര കള്ളനോട്ടുസംഘവുമായി ബന്ധമുണ്ടെന്ന് സംശയം ഉയര്ന്നിട്ടുണ്ട്.
ജിഷമോള് അറസ്റ്റിലായതിനു പിന്നാലെ ഇയാള് ഒളിവില് പോയിരുന്നു. ജിഷമോള്ക്ക് കള്ളനോട്ടു നല്കിയത് ഇയാളാണെന്നായിരുന്നു മൊഴി. വാളയാറില് ഇയാള്ക്കൊപ്പം മറ്റൊരാള് കൂടി പിടിയിലായിട്ടുണ്ട്. രണ്ടുപേര്ക്കും ആലപ്പുഴയിലെ കള്ളനോട്ട് ഇടപാടില് ബന്ധമുണ്ടെന്ന് പോലീസിന് സൂചന കിട്ടിയിട്ടുണ്ട്. പാലക്കാട്ട് നിന്നും ഇരുവരേയും ഉടന് കസ്റ്റഡിയില് വാങ്ങും.
സൂഷ്മ പരിശോധനയില് മാത്രം കള്ളനോട്ടാണെന്ന് തിരിച്ചറിയുന്ന വിധത്തിലാണ് പിടികൂടിയ കള്ളനോട്ടുകള് ഇരിക്കുന്നത്. ഇതിന്റെ ഫൊറന്സിക് പരിശോധന തിരുവനന്തപുരത്തെ ഫൊറന്സിക് ലാബില് നടക്കുകയാണ്. റിപ്പോര്ട്ട് കിട്ടിയാല് റിസര്വ് ബാങ്കിന്റെ കൂടി അഭിപ്രായത്തിനു വിടും. രണ്ടു നടപടികള്ക്കും ശേഷം അന്വേഷണം കേരള പൊലീസിനു കീഴിലെ തീവ്രവാദവിരുദ്ധ സേനയ്ക്കു (എടിഎസ്) കൈമാറിയേക്കും.
ആലപ്പുഴയില് നിന്നും പിടിയിലായ ജിഷ ഇപ്പോള് പേരൂര്ക്കടയിലെ മാനസീകാരോഗ്യ കേന്ദ്രത്തില് ചികിത്സയില് കഴിയുകയാണ്. അതിനാല് പൊലീസിന്റെ ചോദ്യംചെയ്യല് നീളുകയാണ്. അറസ്റ്റിനു മുന്പായി ചോദ്യം ചെയ്തപ്പോള് ജിഷ നല്കിയ മറുപടികള് പലതും കളവാണെന്ന് അന്വേഷണത്തില് വ്യക്തമായിരുന്നു. വിഷാദരോഗത്തിനു ജിഷ തന്നെയാണ് തുടര്ചികിത്സ ആവശ്യപ്പെട്ടത്.
