പാതിരാത്രിയില്‍ വീടുവീടാന്തരം കയറി ഇറങ്ങി മോഷണം നടത്തുന്ന നിരവധി വിരുതന്മാര്‍ എല്ലാ നാട്ടിലും ഉണ്ട്. കാലം മാറുന്നതിനനുസരിച്ച് മോഷണത്തിന്റെ രീതിയിലും കള്ളന്മാര്‍ മാറ്റം വരുത്താറുണ്ട്. എന്നാല്‍ ഇതൊന്നുമറിയാത്ത മണ്ഡന്മാരാണ് കക്കാന്‍ വരുന്നതെങ്കിലോ പിടി വരുന്ന വഴിറിയില്ല. ഇത്തരത്തില്‍ ആന മണ്ഡത്തരം ചെയ്ത് പിടിയിലായ നിരവധി കള്ളന്മാരെ കുറിച്ച് നാം കേട്ടിട്ടുണ്ട്. എന്നാല്‍ അതിനെയൊക്കെ മറികടന്നിരിക്കുകയാണ് ഇവിടെ ഒരു കൂട്ടം കള്ളന്മാര്‍. മോഷണം നടത്താന്‍ ധൈര്യം മാത്രമല്ല അല്പം വിവരം കൂടി വേണം അതിനുദാഹരണമാണ് ഈ കള്ളന്മാര്‍. അമേരിക്കയിലെ മില്‍വാക്കിയില്‍ ആണ് സംഭവം. ഒരു അപ്പാര്‍ട്ട്‌മെന്റില്‍ മോഷണത്തിനായി കയറിയ കൊള്ളസംഘം അവിടെ നിന്നും ഏകദേശം 8,000 ഡോളര്‍ മോഷ്ടിച്ചു. അതായത് എട്ട് ലക്ഷം രൂപ. വസ്തുവിന്റെ ചുമതലയുള്ള എറിക്ക വിന്‍ഷിപ്പ് ആണ് ഇക്കാര്യം മാധ്യമങ്ങളോട് പറയുന്നത്.
പൈസയെല്ലാം കൈക്കലാക്കിയ ശേഷം കള്ളന്മാരില്‍ ഒരാള്‍ സിസിടിവിയ്ക്ക് മുന്നില്‍ എത്തി. എന്നാല്‍ അതെന്താണെന്ന് അയാള്‍ക്ക് മനസ്സിലാവുന്നില്ല. കൂട്ടത്തിലുണ്ടായിരുന്ന കള്ളന്മാരോട് ഇതെന്താണ് സാധനം എന്ന് ചോദിച്ചുകൊണ്ട് അയാള്‍ അതെടുത്ത് ബാഗിലിട്ടു. മോഷണം വിജയകരമായി പൂര്‍ത്തിയാക്കി കള്ളന്മാര്‍ തങ്ങളുടെ ഒളിസങ്കേത്തില്‍ എത്തി. മോഷണമുതല്‍ ബാഗില്‍ നിന്നും എടുത്ത് പുറത്ത് വെച്ചു. കൂട്ടത്തില്‍ ക്യാമറയുമുണ്ട്. മോഷണമുതല്‍ പങ്കിടാനായി എല്ലാവരും കൂടിയിരുന്ന മേശയുടെ മധ്യഭാഗത്ത് തന്നെ ക്യാമറയും വെച്ചു.
ഈ കാര്യങ്ങള്‍ എല്ലാം നടക്കുമ്പോള്‍ ക്യാമറ ഓണായിരുന്നു. കള്ളന്മാരുടെ കഷ്ടകാലം എന്ന് പറയട്ടെ അവരുടെ എല്ലാ ചലനങ്ങളും ക്യാമറ ഒപ്പിയെടുത്തു. ഇതെല്ലാം മോഷണത്തിനായി കയറിയ വീട്ടുടമയുടെ കൈവശമുണ്ടായിരുന്ന സെക്യൂരിറ്റി ഫൂട്ടേജില്‍ കൃത്യമായി കിട്ടുകയും ചെയ്തു. കള്ളന്മാര്‍ മോഷണ മുതല്‍ പങ്കിടുന്നതും മയക്കുമരുന്ന് ഉപയോഗിക്കുന്നതുമെല്ലാം ക്യാമറയില്‍ കൃത്യമായി പതിഞ്ഞിരുന്നു. എന്തായാലും ഇതിനെല്ലാം ഒടുവില്‍ പോലീസ് കൃത്യമായി ഇവര്‍ ഇരുന്നിടത്ത് വന്ന് പൊക്കിയെടുത്തു ജയിലിലിട്ടു. എട്ടു ദിവസത്തോളമുള്ള കൊള്ള സങ്കേതത്തിലെ സംഭവങ്ങള്‍ ക്യാമറിയില്‍ പതിഞ്ഞിരുന്നു. ഇതിലും വലിയ ഒരു അബദ്ധം ഇവര്‍ക്കിനി പറ്റാനില്ല.
Comments