റഷ്യയില് മകള് യുദ്ധവിരുദ്ധ ചിത്രം വരച്ചതിന് അച്ഛന് തടവ് . മകള് സ്കൂളില് യുദ്ധവിരുദ്ധ ചിത്രം വരച്ചതിനെ തുടര്ന്നാണ് കോടതി അച്ഛനെ രണ്ട് വര്ഷത്തെ തടവിന് ശിക്ഷിച്ചത്. സായുധസേനയെ അപകീര്ത്തിപ്പെടുത്തിയെന്ന കുറ്റമാണ് ഇയാള്ക്ക് മേല് ചുമത്തിയിരിക്കുന്നത്. എന്നാല് തടവ് അനുഭവിക്കുന്നതിന് മുന്നേ ഇയാള് രക്ഷപ്പെടുകയായിരുന്നു. ഇയാള് എവിടെയാണെന്നത് സംബന്ധിച്ച് വിവരമൊന്നുമില്ലായെന്നാണ് റോയിട്ടേഴ്സ് റിപ്പോര്ട്ട്.
കുട്ടി വരച്ച ചിത്രത്തില് ഒരു ഉക്രൈന് പതാകയും ഇതിനൊപ്പം 'ഉക്രൈന് മഹത്വം' എന്നും എഴുതിയിട്ടുണ്ട്. കൂടാതെ റഷ്യന് പതാക വരച്ച് 'നോ ടു വാര്' എന്നും ഇതില് എഴുതിയിട്ടുണ്ട്. മകള് വരച്ച ചിത്രത്തിന്റെ പേരില് അലക്സി മോസ്കലിയോവ് എന്നയാളാണ് ശിക്ഷിക്കപ്പെട്ടത്. ഇയാള് വീട്ടുതടങ്കലില് നിന്ന് രക്ഷപ്പെട്ടതായി കോടതി പറഞ്ഞു.
ഈ മാസത്തിന്റെ തുടക്കത്തില് മോസ്കലിയോവിനെ വീട്ടുതടങ്കലിലാക്കുകയും പിന്നീട് ഇയാളെ 13 വയസ്സുള്ള മകള് മാഷയില് നിന്ന് അകറ്റുകയും ചെയ്തിരുന്നു. ശേഷം മോസ്കലിയോവിന്റെ ജന്മനാടായ യെഫ്രെമോവിലെ ചില്ഡ്രന്സ് ഹോമിലേക്ക് മാഷയെ മാറ്റി. ഇത് റഷ്യയിലെ മനുഷ്യാവകാശ പ്രവര്ത്തകരുടെ ഇടയില് വലിയ എതിര്പ്പിനും വിമര്ശനത്തിനും കാരണമായിത്തീര്ന്നു. എത്രയും പെട്ടെന്ന് അച്ഛനെയും മകളെയും ഒരുമിപ്പിക്കണമെന്നും മനുഷ്യാവകാശ പ്രവര്ത്തകര് ആവശ്യപ്പെട്ടു.
തിങ്കളാഴ്ച മുതല് തന്റെ കക്ഷിയെ കണ്ടിട്ടില്ലായെന്നും മോസ്കലിയോവ് ഓടിപ്പോയതാണോയെന്ന് അറിയില്ലായെന്നുമാണ് മോസ്കലിയോവിന്റെ അഭിഭാഷകന് വ്ളാഡിമിര് ബിലിയെങ്കോ റോയിട്ടേഴ്സിനോട് പറഞ്ഞത്, . ഈ നിമിഷം ഞാന് ആകെ ഷോക്കിലാണാണെന്നും അഭിഭാഷകന് പറഞ്ഞു.
