ആഷിഖ് അബു സംവിധാനം ചെയ്യുന്ന പുതിയ ചിത്രം ‘നീലവെളിച്ച’ത്തിലെ പാട്ടുകള്ക്ക് എതിരെ സംഗീതസംവിധായകന് എം.എസ് ബാബുരാജിന്റെ കുടുംബം. ബാബുരാജ് സംഗീതം നല്കിയ ഭാര്ഗവീനിലയം എന്ന സിനിമയിലെ പാട്ടുകള് റീമിക്സ് ചെയ്ത് ഉപയോഗിക്കുന്നതിനെതിരെയാണ് കുടുംബം രംഗത്തെത്തിയത്. നീലവെളിച്ചത്തിന്റെ നിര്മാതാവ് കൂടിയായ ആഷിഖ് അബുവിന് വക്കീല് നോട്ടീസ് അയച്ചു.
ബാബുരാജിന്റെ സംഗീതത്തിലെ സ്വാഭാവികതത്തനിമയും മാസ്മരികതയും നശിപ്പിക്കുന്ന റീമിക്സ് ഗാനങ്ങള് സമൂഹമാധ്യമങ്ങളില് നിന്നും ടിവി ചാനലുകളില് നിന്നും പിന്വലിക്കണം എന്നായിരുന്നു നോട്ടീസില് ആവശ്യപ്പെട്ടത്. മന്ത്രി സജി ചെറിയാനും ബാബുരാജിന്റെ മകന് എംഎസ് ജബ്ബാര് പരാതി നല്കി. തങ്ങളുടെ അറിവോ സമ്മതമോ ഇല്ലാതെയാണ് ഭാര്ഗവീനിലയിത്തിലെ പാട്ടുകള് ആഷിഖ് അബുവിന്റെ സിനിമയ്ക്ക് വേണ്ടി റീമിക്സ് ചെയ്തതെന്ന് ജബ്ബാര് ആരോപിച്ചു.
1964 പുറത്തിറങ്ങിയ ഭാര്ഗവീനിലയം എന്ന സിനിമയ്ക്ക് ഗാനങ്ങള് ഒരുക്കിയത് ബാബുരാജായിരുന്നു. വൈക്കം മുഹമ്മദ് ബഷീറിന്റെ നീലവെളിച്ചം എന്ന കഥയെ ആസ്പദമാക്കി പുറത്തിറങ്ങി ചിത്രമായിരുന്നു അത്. ബഷീറിന്റെ ഇതേ കഥയെ അടിസ്ഥാനമാക്കിയാണ് നീലവെളിച്ചം ഒരുങ്ങുന്നത്. ഭാര്ഗവീനിലയത്തിലെ അതേ ഗാനങ്ങളാണ് ചിത്രത്തില് ഉപയോഗിച്ചിരിക്കുന്നത്. താമസമെന്തേ വരുവാന്, അനുരാഗ മധുചഷകം എന്നീ ഗാനങ്ങളുടെ റീമിക്സ് ഇതിനോടകം തന്നെ പുറത്തുവന്നിരുന്നു. ബിജിബാലാണ് റീമിക്സ് പതിപ്പ് സംവിധാനം ചെയ്തിരിക്കുന്നത്.
