പശ്ചിമ ബംഗാളില് നിന്നുള്ള ഒരു യുവാവിന്റെ ബിരുദാനന്തര ബിരുദ സര്ട്ടിഫിക്കറ്റ് വാര്ത്തകളില് ഇടം നേടുകയാണ്. കാരണം മറ്റൊന്നുമല്ല. പൊളിറ്റിക്കല് സയന്സില് ബിരുദാനന്തര ബിരുദം നേടിയ രാജ്കുമാര് എന്ന യുവാവ് ഇപ്പോള് ഗ്രാമങ്ങളില് നിന്ന് ഗ്രാമങ്ങളിലേക്ക് പച്ചക്കറികള് വിറ്റ് കുടുംബത്തിന് ജീവിക്കാനുള്ള കാശ് കണ്ടെത്തുകയാണ്.
ബിരുദാനന്തര ബിരുദ സര്ട്ടിഫിക്കറ്റ് മാത്രമല്ല, കരാട്ടെയില് ബ്ലാക്ക് ബെല്റ്റുമുണ്ട് രാജ് കുമാറിന്. പക്ഷേ സര്ട്ടിഫിക്കറ്റുകള് ഭക്ഷണം കൊണ്ടുത്തരില്ലെന്ന ബോധ്യം ഉള്ളതിനാലാണ് ചെറിയൊരു വരുമാനം കണ്ടെത്താനായി അദ്ദേഹം നിരവധി ജോലികള് ചെയ്യുന്നത്.
ഏതൊരുവനേയും പോലെ പഠിയ്ക്കുക, ജോലി നേടുക എന്ന സ്വപ്നമായിരുന്നു രാജ് കുമാറിനും. ദാരിദ്രത്തിനിടെയിലും തന്റെ പഠനം ഉപേക്ഷിച്ചില്ല. പല ജോലികള് ചെയ്ത് അദ്ദേഹം പഠനത്തിനുള്ള പണം കണ്ടെത്തി. അങ്ങനെ പോളിറ്റിക്കല് സയന്സില് ബിരുദാനന്തര ബിരുദം സ്വന്തമാക്കി. എന്നാല് ഇന്ന് ആ സര്ട്ടിഫിക്കറ്റുകള് പശ്ചിമ ബംഗാളിലെ നോര്ത്ത് ദിനാജ്പൂര് ജില്ലയിലെ റായ്ഗഞ്ച് മുനിസിപ്പാലിറ്റിയിലെ വാര്ഡ് നമ്പര് 13 ലെ രാജ്കുമാറിന്റെ വീടിന്റെ ഏതോ മൂലയില് കിടക്കുന്നു.
ഒരുപാട് ജോലികള് ചെയ്തു. ഏറ്റവും ഒടുവിലായി ഗ്രാമത്തിലെ പച്ചക്കറിക്കടയില് സെയില്സ്മാനാണ് ഇപ്പോള് രാജ്കുമാര്. 'ഭാവിയില് എനിക്ക് ജോലി ലഭിക്കുമോയെന്ന് അറിയില്ല, പക്ഷേ, ജീവിതത്തിന്റെ പോരാട്ടത്തില് ഞാന് ഒരിക്കലും തളരില്ലെന്ന്,' രാജ്കുമാര് പറയുന്നു. ഇത്രയും വിദ്യാഭ്യാസ യോഗ്യതയുള്ളവര് അവരുടെ ഗ്രാമത്തില് കുറവാണ്. സാമ്പത്തികമായും താഴ്ന്ന നിലയിലാണ് രാജ് കുമാറിന്റെ ജീവിതം. .ഇത്രയും വിദ്യാഭ്യാസമുള്ള അദ്ദേഹത്തിന് സര്ക്കാര് ജോലി നല്കേണ്ടതാണെന്നും അയല്വാസികള് പറയുന്നു.
