കൊല്ക്കത്ത: തൃണമൂല് കോണ്ഗ്രസിന്റെ ദേശീയപാര്ട്ടി പദവി നഷ്ടപ്പെടാതിരിക്കാന് കേന്ദ്ര ആഭ്യന്തരമന്ത്രി അമിത്ഷായെ വിളിച്ചെന്ന ആരോപണം നിഷേധിച്ച് ബംഗാള് മുഖ്യമന്ത്രി മമതാ ബാനര്ജി. ആരോപണം തെളിയിച്ചാല് താന് രാജിവെച്ച് പണി നിര്ത്തുമെന്ന് മമത ബുധനാഴ്ച വെല്ലുവിളിച്ചു. കഴിഞ്ഞയാഴ്ചയാണ് ദേശീയ തെരഞ്ഞെടുപ്പ് കമ്മീഷന് തൃണമൂല് കോണ്ഗ്രസിന്റെയും എന്സിപിയുടെയും സിപിഐ യുടെയും ദേശീയപാര്ട്ടി പദവി എടുത്തുകളഞ്ഞത്.
എന്നാല് തന്റെ പാര്ട്ടിയുടെ പേര് ഇപ്പോഴും ഓള്ഇന്ത്യാ തൃണമൂല് കോണ്ഗ്രസ് എന്നു തന്നെയാണെന്നും മമത പറഞ്ഞു. പാര്ട്ടിയുടെ ദേശീയപദവി കാര്യത്തില് അമിത്ഷായെ മമതാ ബാനര്ജി വിളിച്ചെന്ന് ആരോപണം ഉന്നയിച്ചത് പ്രതിപക്ഷ നേതാവ് സുവേന്ദു അധികാരിയായിരുന്നു. എന്നാല് ആരോപണം തെളിയിക്കാനായാല് താന് രാജിവെയ്ക്കാമെന്ന് സെക്രട്ടറിയേറ്റില് വിളിച്ചുചേര്ത്ത വാര്ത്താസമ്മേളനത്തില മമത പരസ്യമായി പ്രഖ്യാപിച്ചു.
തെരഞ്ഞെടുപ്പ് കമ്മീഷന് എടുത്തുകളഞ്ഞതിന് പിന്നാലെ പാര്ട്ടിയുടെ ദേശീയപദവി കിട്ടാന് ഇടപെടണമെന്ന് ആവശ്യപ്പെട്ട് മമതാബാനര്ജി അമിത്ഷായെ വിളിച്ചു എന്നായിരുന്നു ചൊവ്വാഴ്ച സുവേന്ദു അധികാരി പറഞ്ഞത്. ''ഇന്നലെ അമിത്ഷാ രാജിവെയ്ക്കണമെന്ന് ആവശ്യപ്പെട്ടയാളാണ് മമതാബാനര്ജി. പക്ഷേ തെരഞ്ഞെടുപ്പ് കമ്മീഷന് ദേശീയപാര്ട്ടി പദവി എടുത്തുകളഞ്ഞതോടെ തീരുമാനം പുനസ്ഥാപിക്കണം എന്നാവശ്യപ്പെട്ട് മമത അനേകം തവണ ഇവര് അമിത്ഷായെ വിളിച്ചെന്നാണ് റിപ്പോര്ട്ടുകള് പറയുന്നത്.'' സിംഗൂറിലെ ഒരു റാലിയില് അധികാരി പറഞ്ഞു.
മമതാബാനര്ജി മറുപടിയുമായി ഉടനെത്തി.'' എല്ലാ പാര്ട്ടികളുടെയും ദേശീയ പദവി 10 വര്ഷത്തിന് ശേഷം പരിശോധിക്കാറുള്ളതാണ്. അടുത്ത റിവ്യൂ നടക്കേണ്ടത് 2026 ലാണ്. പക്ഷേ അവര് അത് ചെയ്തത് 2019 ലും. എന്റെ പാര്ട്ടിയുടെ പേര് ഓള് ഇന്ത്യാ തൃണമൂല് കോണ്ഗ്രസ് എന്നു തന്നെയായിരിക്കും. അതില് ബിജെപിയ്ക്ക് എന്തെങ്കിലും പ്രശ്നമുണ്ടെങ്കില് അവര് തെരഞ്ഞെടുപ്പ് കമ്മീഷനെ സമീപിക്കും. ഞങ്ങള് സാധാരണ ജനങ്ങളെയും.'' മമത പറഞ്ഞു.
''അധികാരത്തിലിരിക്കുന്ന ബിജെപിയ്ക്ക് അവര്ക്ക് ഇഷ്ടമുള്ള കാര്യങ്ങള് ചെയ്യുന്നതിന് എന്താണ് തടസ്സം. എന്നാല് അവര് മനസ്സിലാക്കേണ്ട കാര്യം അധികാരം താല്ക്കാലികം മാത്രമാണെന്നാണ്. കസേര വരികയും പോകുകയുമൊക്കെ ചെയ്യും. എന്നാല് ജനാധിപത്യം എന്നും തുടരും. ഭേദഗതികള് വരുത്താമെങ്കിലും ഭരണഘടനയും എന്നും തുടരും. അതിനെ ബുള്ഡോസര് കൊണ്ട് ഇല്ലാതാക്കാമെന്ന് കരുതേണ്ട. 2024 തെരഞ്ഞെടുപ്പില് ബിജെപിയ്ക്ക് ജയിക്കാനാകില്ല. ബിജെപി അധികാരത്തിലും വരില്ല. 2021 ബംഗാള് തെരഞ്ഞെടുപ്പില് അവര് പറഞ്ഞു 200 ന് മുകളില് സീറ്റ് എന്ന്. എന്നാല് ഡല്ഹി തെരഞ്ഞെടുപ്പില് 200 പോലും എത്തില്ലെന്നും പറഞ്ഞു.
