കൊച്ചി: രണ്ടു ദിവസത്തെ കേരള സന്ദര്ശനത്തിനിടെ പ്രധാനമന്ത്രി നരേന്ദ്രമോഡി ക്രൈസ്തവ മതമേലധ്യക്ഷന്മാരുമായി കൂടിക്കാഴ്ച നടത്തും. കേരളത്തില് വന് രാഷ്ട്രീയ കുതിപ്പിനായിട്ടാണ് ബിജെപി തയ്യാറെടുക്കുന്നത്. ഇതിന്റെ ഭാഗമായി ഈസ്റ്റര് ദിനത്തില് ക്രൈസ്തവസഭാ നേതാക്കളുമായി നടത്തിയ കൂടിക്കാഴ്ചകള്ക്ക് പിന്നാലെയാണ് പ്രധാനമന്ത്രി കൂടി കൂടിക്കാഴ്ച നടത്താനെത്തുന്നത്.
കേരള സന്ദര്ശന പരിപാടികളുടെ ഭാഗമായിട്ടാണ് ഈ കൂടിക്കാഴ്ചയും വരുന്നത്. 24 നു കൊച്ചിയില് മെഗാറോഡ് ഷോയില് നരേന്ദ്രമോദി ജനങ്ങളെ അഭിസംബോധന ചെയ്യും. പിന്നീട് യുവം പരിപാടിയിലും അദ്ദേഹം പങ്കെടുക്കും. നിരവധി വികസന പദ്ധതികളുടെ ഉദ്ഘാടനം പ്രധാനമന്ത്രി നിര്വഹിക്കും. ബിജെപിയുടെ പിന്തുണയോട് കൂടി പുതിയൊരു കേരളാകോണ്ഗ്രസ് കൂടി കേരളത്തില് ഉദയം ചെയ്യാനൊരുങ്ങുകയാണ്.
ജോസഫ് ഗ്രൂപ്പിന്റെ കേരളാകോണ്ഗ്രസ് വിട്ട ജോണി നെല്ലൂരാണ് പുതിയ പാര്ട്ടി ഉടന് പ്രഖ്യാപിക്കാനിരിക്കുന്നത്. നാളെ ഉച്ചയ്ക്കു രണ്ടിന് എറണാകുളത്തു പുതിയ പാര്ട്ടിയുടെ പ്രഖ്യാപനമുണ്ടാകും. നാഷണല് പ്രോഗ്രസീവ് എന്നായിരിക്കും പേര് എന്നാണ് വിവരം. കേന്ദ്ര ന്യൂനപക്ഷ കമ്മിഷന് മുന് അംഗം വി.വി. അഗസ്റ്റിന് പാര്ട്ടി ചെയര്മാനായേക്കും. ഇടുക്കി ജില്ലയിലെ തോട്ടംമേഖലയില്നിന്നുള്ള രണ്ടു മുന് എം.എല്.എമാര് പാര്ട്ടിയില് ചേരാന് താത്പര്യം പ്രകടിപ്പിച്ചിട്ടുണ്ട്.
അതിനിടയില് കരള കോണ്ഗ്രസ് (ജോസഫ്) വൈസ് ചെയര്മാനും മുന് എം.എല്.എയുമായ മാത്യു സ്റ്റീഫനും പാര്ട്ടിയില് നിന്നും പുറത്തുപോയി. രാജിക്കത്ത് പാര്ട്ടി ചെയര്മാന് പി.ജെ. ജോസഫിനു ൈകമാറി. കേരള മുേന്നാക്ക സമുദായ ക്ഷേമ കോര്പ്പറേഷന് ഡയറക്ടര് സ്ഥാനവും അദ്ദേഹം രാജിവയ്ക്കും. ഉടുമ്പഞ്ചോലയിലും ഇടുക്കിയിലും എം.എല്.എയായിരുന്ന മാത്യു സ്റ്റീഫന് ഔഷധി ചെയര്മാനുമായിരുന്നു. പുതിയ പാര്ട്ടിയില് ജോണി നെല്ലൂരിനൊപ്പം മാത്യു സ്റ്റീഫന് പ്രവര്ത്തിക്കുമെന്നാണു സൂചന.
യു.ഡി.എഫില് പ്രഗത്ഭരായ നേതാക്കളില്ലെന്നും എല്.ഡി.എഫില് പിണറായി വിജയന് കഴിഞ്ഞാല് വേറെ നേതാവില്ലെന്നും നരേന്ദ്രമോദി ലോകരാജ്യങ്ങള്ക്ക് മുന്നില് ഇന്ത്യയുടെ പദവിയുയര്ത്തിയ പ്രധാനമന്ത്രിയാണെന്നും പറഞ്ഞു. തന്റെ കാലത്ത് എം.എല്.എയായിരുന്ന വി.ഡി. സതീശന് എന്തായിരുന്നുവെന്നു നന്നായി അറിയാം. യു.ഡി.എഫ്. വലിയ അപകടത്തിലാണ്. ഉമ്മന് ചാണ്ടിയും രമേശ് ചെന്നിത്തലയും നേതൃത്വം നല്കിയ കാലത്തെ സമീപനവും അംഗീകാരവും ഇപ്പോഴില്ലെന്ന ജോണി നെല്ലൂരിന്റെ അഭിപ്രായം ശരിയാണെന്നും അദ്ദേഹം പറഞ്ഞു.
''ബി.ജെ.പി, എ.എ.പി, എല്.ഡി.എഫ്, യു.ഡി.എഫ്. അടക്കമുള്ളവരുമായി ചര്ച്ച നടത്തിയിട്ടുണ്ട്. ബി.ജെ.പി. മധ്യമേഖല പ്രസിഡന്റ് എന്. ഹരിയുമായി റബര് കര്ഷകരുടെ പ്രശ്നങ്ങള് ചര്ച്ച ചെയ്തു. പാലാ ബിഷപ്പടക്കം എല്ലാ സമുദായ നേതാക്കളെയും കണ്ടു പിന്തുണ ചോദിച്ചിട്ടുണ്ട്. കൃഷിക്കാരുടെ അവകാശ പോരാട്ടങ്ങള്ക്കു നേതൃത്വം നല്കാന് കഴിയുന്ന സംഘടന എന്ന നിലയില് മുന്നോട്ടുപ്രവര്ത്തിക്കാനാണ് ഉദ്ദേശിക്കുന്നത്. ഇതിനുള്ള പിന്തുണ ആരുടെ ഭാഗത്തുനിന്നു ലഭിച്ചാലും സ്വീകരിക്കും. ഇപ്പോഴത്തെ ഒരു രാഷ്ട്രീയ പാര്ട്ടിയുമായും ബന്ധമില്ല''- അദ്ദേഹം പറഞ്ഞു.
