നടി നിഖില വിമലിന്റെ ആരോപണത്തില് പ്രതികരണവുമായി എംവി ജയരാജന്. മുസ്ലീം വിവാഹ ചടങ്ങുകളില് സ്ത്രീകള്ക്ക് ഭക്ഷണം കഴിയ്ക്കുന്നതിനു വേണ്ടി പ്രത്യേക സ്ഥലം ഒരുക്കുന്നുവെന്നാണ് നിഖില വിമല് പറഞ്ഞത്. എന്നാല് താരത്തിനു ഇതു കഴിഞ്ഞ് വന് വിമര്ശനങ്ങള് നേരിടേണ്ടി വന്നു. സിപിഐഎം ജില്ലാ സെക്രട്ടറി എംവി ജയരാജന് നിഖില വിമല് പറഞ്ഞതിനോട് എതിര്പ്പ് പ്രകടിപ്പിച്ചിട്ടുണ്ട്.
‘‘എന്നാല് ഞങ്ങളുടെ അനുഭവം മറിച്ചാണ്, സ്ത്രീകള്ക്ക് മാത്രം ഭക്ഷണം കഴിയ്ക്കാന് പ്രത്യേകം ഒരു സ്ഥലം എവിടെയുമില്ല. മഹാഭൂരിപക്ഷം സ്ഥലത്തും സ്ത്രീകളും,കുട്ടികളും, പുരുഷന്മാരും കുടുംബസമേതം ഒരുമിച്ചിരുന്ന് ഭക്ഷണം കഴിക്കുന്നതാണ് ഞങ്ങള് കാണാറുള്ളത്’’ എം.വി ജയരാജന് പറഞ്ഞു. മുസ്ളീം കല്ല്യാണത്തിന് ഞാന് പോകാറുള്ളതാണ്, അവിടെയൊന്നും ഞാന് സ്ത്രീകളെന്നോ, പുരുഷന്മാരെന്നോ വേര്തിരിവ് കണ്ടിട്ടില്ലെന്നും അദ്ദേഹം പറഞ്ഞു.
പണ്ട് കാലങ്ങളില് മുസ്ലീം സമുദായത്തില് സ്ത്രീകളോട് വിവേചനം ഉണ്ടായിരുന്നു. പെണ്കുട്ടികള് വിദ്യ അഭ്യസിയ്ക്കാന് പാടില്ലെന്നായിരുന്നു. എന്നാല് ഇന്ന് ആ സ്ഥിതിയില് മാറ്റങ്ങള് സംഭവിച്ചിട്ടുണ്ട്. മെഡിക്കല് രംഗത്ത് പോലും ഇന്ന് മുസ്ളീം പെണ്കുട്ടികളുടെ എണ്ണം വളരെ കൂടുതലാണ്. കാലങ്ങളായി ആ സമുദായത്തിന്റെ നവോത്ഥാന ചിന്തയില് വന്ന മാറ്റങ്ങളുടെ ഫലമായിട്ടാണിതെന്നും എംവി ജയരാജന് പറഞ്ഞു.
വിവാഹം കഴിഞ്ഞാല് പെണ്കുട്ടിയുടെ വീട്ടില് പുരുഷന്മാര് താമസിക്കുന്ന സംവിധാനം പണ്ട് കാലത്ത് മുസ്ളീം സമുദായത്തില് പ്രത്യേകിച്ച് മലബാര് സൈഡില് നിലനിന്നിരുന്നു. അത് മറ്റ് സ്ഥലങ്ങളില് നിന്നും വ്യത്യസ്തമായ രീതിയാണ്. എന്നാല് അതിലൊക്കെ ഇപ്പോള് മാറ്റം വന്നിട്ടുണ്ട്. ഹിന്ദു സമുദായത്തിലും ചില ആചാരാനുഷ്ടാനങ്ങള് ഉണ്ട്. അതിലും കാലികമായ മാറ്റങ്ങള് പിന്നീട് ഉണ്ടാവുകയാണ് ചെയ്തതെന്നും എംവി ജയരാജന് പറഞ്ഞു.
