ആരാധകര്ക്ക് ഏറെയിഷ്ടമുള്ള താരമാണ് മലയാളത്തിന്റെ ലേഡി സൂപ്പര്സ്റ്റാര് മഞ്ജുവാര്യര്. താരത്തിനെക്കുറിച്ചുള്ള എല്ലാ വാര്ത്തകളും സോഷ്യല് മീഡിയയില് ശ്രദ്ധിക്കപ്പെടാറുണ്ട്. ഇപ്പോഴിതാ താരത്തിന്റെ സഹോദരനും സംവിധായകനുമായ മധു വാര്യര് പങ്കുവച്ച വീഡിയോയാണ് സോഷ്യല് മീഡിയയില് വൈറലാകുന്നത്. വീട്ടുമുറ്റത്ത് സൈക്കിള് സ്ലോ റെയ്സ് ചെയ്യുന്ന മഞ്ജുവാര്യരാണ് വീഡിയോയില്. വളരെ പതുക്കെയാണ് താരമിതില് സൈക്കിള് ചവിട്ടുന്നത്. കുതിരവട്ടം പപ്പുവിന്റെ പ്രശസ്തമായ ‘പടച്ചോനെ ഇങ്ങള് കാത്തോളീ...’ എന്ന ബാക്ക്ഗ്രൗണ്ട് ഡയലോഗും വീഡിയോയ്ക്കൊപ്പം ചേര്ത്തിട്ടുണ്ട്. കണ്ടാല് കോളജ് കുമാരിയെപ്പോലെയാണെന്ന കമന്റുമായി പതിവു പോലെ താരത്തിന്റെ പുതിയ വീഡിയോയും ഏറ്റെടുത്തിരിക്കുകയാണ് ആരാധകര്.
ഇതേ വീഡിയോ മഞ്ജുവും സോഷ്യല് മീഡിയയില് ഷെയര് ചെയ്തിട്ടുണ്ട്. ‘ഒരു ട്രോളന് ചേട്ടന് കൂടെയുണ്ടെങ്കില് ഇങ്ങനെയാകും...’ എന്ന കമന്റിനൊപ്പമാണ് മഞ്ജു വീഡിയോ ഷെയര് ചെയ്തിരിക്കുന്നത്. അജിത്തിനൊപ്പം അഭിനയിച്ച തമിഴ് ചിത്രം തുനിവ്, ആയിഷ, വെള്ളരിപട്ടണം എന്നിവയാണ് അടുത്തിടെ തിയേറ്ററുകളിലെത്തിയ മഞ്ജുവിന്റെ ചിത്രങ്ങള്.
