മലപ്പുറം: താനൂര് ബോട്ടപകടത്തില് കാണാതായ എട്ടുവയസ്സുകാരനെ കണ്ടെത്തി. മെഡിക്കല് കോളജ് ആശുപത്രിയില് ചികിത്സയില് ആയിരുന്ന കുട്ടിയെ വീട്ടുകാരുടെ തിരച്ചിലില് ആദ്യം കണ്ടെത്താന് കഴിഞ്ഞിരുന്നില്ല. കോഴിക്കോട് മെഡിക്കല് കോളജ് ആശുപത്രിയില് ആയിരുന്നുവെന്ന് വൈകിയാണ കുടുംബത്തിന് വിവരം ലഭിക്കുന്നത്. അപകടത്തില് പെട്ടവരെ പ്രവേശിപ്പിച്ച തിരൂരങ്ങാടിയിലും പരപ്പനങ്ങാടിയിലുമുള്ള ആശുപത്രികളില് തിരച്ചില് നടത്തിയെങ്കിലൂം കണ്ടെത്താന് കഴിഞ്ഞിരുന്നില്ല. ഇതോടെ ഒരാളെ കാണാതായെന്ന് റിപ്പോര്ട്ട് വന്നിരുന്നു.
നേവിയും ഫയര്ഫോഴ്സും എന്ഡിആര്എഫും കാണാതായ കുട്ടിക്കു വേണ്ടി തിരച്ചില് നടത്തുന്നതിനിടെയാണ് മെഡിക്കല് കോളജ് ആശുപത്രിയില് ഉണ്ടെന്ന വിവരം കുടുംബത്തിന് ലഭിക്കുന്നത്.
അപകടത്തില് 22 പേര് മരിച്ചതായി ഔദ്യോഗികമായി സ്ഥിരീകരിച്ചു. ഇനിയും ആരെയും കണ്ടെത്താനില്ലാത്തതിനാല് തിരച്ചില് ഉടന് അവസാനിപ്പിക്കും. ഫയര്ഫോഴ്സ് തിരച്ചില് ഇന്ന് നിര്ത്തുമെന്ന് ഡിജിപി നേരത്തെ അറിയിച്ചിരുന്നു.
അതേസമയം, ബോട്ട് ഓടിച്ചത് അംഗീകാരമില്ലാതെയാണെന്ന് രജിസ്ട്രേഷറിംഗ് അതോറിറ്റി അറിയിച്ചു. ബോട്ടിന്റെ സര്വേ നടത്തിയിരുന്നു. 24 പേരെ വച്ച് യാത്ര ചെയ്യാനാണ് ഉടമ അനുമതി തേടിയിരുന്നത്. ബോട്ടിന്റെ രജിസ്ട്രേഷന് നടപടികള് പൂര്ത്തിയാകും മുന്പ് ബോട്ട് സര്വീസിലിറക്കി.
