രാഹുല് ഗാന്ധിക്കെതിരെ നോട്ടീസ് അയക്കാനൊരുങ്ങി ഡല്ഹി സര്വകലാശാല. സര്വകലാശാല ക്യാംപസില് അനുമതിയില്ലാതെ സന്ദര്ശനം നടത്തരുതെന്ന് ആവശ്യപ്പെട്ടാണ് രാഹുല് ഗാന്ധിക്കെതിരെ നോട്ടീസ് നല്കുന്നത്. നോട്ടീസ് ഉടന് അയക്കുമെന്നും രജിസ്ട്രാര് വികാസ് ഗുപ്ത അറിയിച്ചു.
രാഹുല് ഗാന്ധി ദിവസങ്ങള്ക്ക് മുന്പ് സര്വകലാശാല ഹോസ്റ്റലിലെത്തി വിദ്യാര്ത്ഥികളെ സന്ദര്ശിച്ചിരുന്നു. ഇതിന് പിന്നാലെയാണ് സര്വകലാശാലയുടെ ഇത്തരമൊരു നീക്കം. ക്യാംപസിലെ ബിരുദാനന്തര ബിരുദ വിദ്യാര്ത്ഥികളുടെ ഹോസ്റ്റലില് വെള്ളിയാഴ്ചയാണ് രാഹുല് ഗാന്ധി സന്ദര്ശനം നടത്തിയത്. വിദ്യാര്ത്ഥികളോട് സംവദിച്ചതിന് ശേഷം അദ്ദേഹം അവരോടൊപ്പം ഭക്ഷണം കഴിക്കുകയും ചെയ്തിരുന്നു.
വിദ്യാര്ത്ഥികളുടെ സുരക്ഷയെ ഇത്തരത്തിലുളള സന്ദര്ശനം ബാധിക്കുമെന്നും ശരിയായ മാള്ഗനിര്ദേശങ്ങള് പാലിച്ചുകൊണ്ട് മാത്രം സന്ദര്ശനം നടത്തണമെന്നും ഡല്ഹി സര്വകലാശാല രജിസ്ട്രാര് വികാസ് ഗുപ്ത പറഞ്ഞു. ഭാവിയില് ഇത്തരം സന്ദര്ശനങ്ങള് ആവര്ത്തിക്കപ്പെടരുത്. ചൊവ്വാഴ്ചയോ ബുധനാഴ്ചയോ രാഹുല് ഗാന്ധിക്കെതിരെ നോട്ടീസ് അയക്കുമെന്നും അദ്ദേഹം വ്യക്തമാക്കി. അതേസമയം കോണ്ഗ്രസിന്റെ വിദ്യാര്ത്ഥി സംഘടനയായ നാഷണല് സ്റ്റുഡന്റ്സ് യൂണിയന് ഓഫ് ഇന്ത്യ ഭരണപക്ഷത്ത് നിന്നുള്ള സമ്മര്ദ്ദത്തെ തുടര്ന്നാണ് രാഹുല് ഗാന്ധിക്കെതിരെ സര്വകലാശാല നടപടിയെടുക്കാനൊരുങ്ങുന്നതെന്ന് ആരോപിച്ചു. എന്നാല് ഈ ആരോപണം അടിസ്ഥാനരഹിതമാണെന്നും അത്തരത്തിലൊരു സമ്മര്ദ്ദമില്ലെന്നും സര്വ്വകലാശാല അധികൃതര് വ്യക്തമാക്കി.
